Su Kinaidsa kanu Isa al-Masih pantag kanu Kawagib'in
20
Aden isa a gay a 'bpamandu su Isa al-Masih lu kanu Suti a 'Bpagagaman enggu ibpangusiat'in su pantag kanu Mapia a Tutuma. Na minubay sa lekanin su manga mapulu nu 'bpamangurban enggu su manga gulu nu pangitaban taman den kanu 'gkangaunutan nu manga Yahudi 2 sa nia nilan pidtalu sa lekanin na “Edtalu ka kun sa lekami u ngin i kawagib'engka sa kapenggula nengka sa langun nu nia? Entain i minenggay sa leka sa kawagib sa entu?” 3 Nia inisumpat'u Isa al-Masih na “Idsan ku bun mambu sekanu. Edtalu nu kun sa laki 4 u ngintu, su kinapanalawat'u Yahiya na ebpun kanu Kadenan atawa ka ebpun kanu manusia?”5 Na mimbibitialai den silan sa nia pidtalu nu uman i isa na “Amaika nia tanu edtalun i ebpun sa Kadenan na idsa nin sa lekitanu u ngintu ka da tanu palitiayi su Yahiya. 6 Ugaid'a amaika nia tanu menem edtalun i ebpun sa manusia, na pamalantayn tanu sa watu nu langun nu taw a nia sia kagina 'bpaginugutan nilan i nabi su Yahiya.”
7 Kagina ka maitu na nia nilan nakasawal na “Di nami katawan u endaw ganat su kabpanalawat'in.” 8 Na nia pidtalu nu Isa al-Masih kanilan na “Amaika maitu na di ku bun edtalun sa lekanu u endaw nakabpun su kawagib ku sa kapenggula ku sa langun nu nia.”
Su Pakenalan pantag kanu Patutuludu sa Pamumulanen a di Kasaligan
9 Na pidtalu menem'u Isa al-Masih su nia a pakenalan kanu manga taw sa “Aden kun mama a namumulan sa ubas. Na inipatuludu nin kanu manga 'bpangangawid ka linemu sa mawatan a dalepa. Na nauget i kinambalingan nin. 10 Guna su nauma den su kapegkasabpet na sinemugu sekanin kanu ulipen nin lu kanu pinatuludu nin a 'bpamangangawid ka enggu nin 'gkakua su umun nin kanu pamumulan nin. Ugaid'a pinametay nilan su ulipen taman sa pinauli nilan sa dala nakua nin. 11 Na sinemugu menem sekanin 'bpaluman sa ulipen. Na maitu bun ba, pinametay nilan bun su entu enggu pinagkaya nilan pan taman sa pinauli nilan bun a dala nakua nin. 12 Na sinemugu menem sekanin 'bpaluman sa ulipen. Na su ikatelu a nia a ulipen a sinugu nin na pinakapasangan nilan a benal taman sa inidtug'ilan lu sa liu.
13 “Na nia nadtalu nu kigkuan kanu pamumulanan a ubas na ‘Ngin i mapia a enggulan ku? Nia mapia na nia ku sugun na su wata ku a mama a pinadtaya ka basi pagadatan nilan.’
14 “Ugaid'a endaw i kinailay nu manga 'bpangangawid sa lekanin na mimbibitialai silan sa nia nilan pidtalu kanu uman i isa na ‘Sia kanu ka nia den su pebpusakan, imatayan tanu sekanin ka enggu tanu makua su ipebpusaka lun a nia.’ 15 Na inidtug'ilan lu kanu liu nu pamumulanan a ubas ka inimatayan nilan.
“Na ngin basi i enggulan nu kigkuan kanu pamumulanen a entu? 16 Na lemu sekanin ka pangimatayan nin su manga 'bpangangawid a entu enggu ipatuludu nin sa ped su pamumulanen a entu a ubas.”
Guna makineg'u manga taw su nia na nia nilan nadtalu na “Di man isugut'u Kadenan a manggula su entu!” 17 Daka pidtulikan silan nu Isa al-Masih ka inidsa nin kanilan i “Amaika maitu na ngin i maena nu nakadalem a nia kanu kitab a
‘Su watu a inendan nu manga panday na walay na entu ba i nabaluy a balapantag kanu langun na watu nu walay’?a
18 Na apia entain i makagebpa kanu entu ba a watu na malupet-lupet enggu apia entain menem i kaulugan nu entu ba a watu na matapung-tapung.”
Su Pantag kanu Kapembayad sa Buwis
19 Na su manga gulu nu pangitaban enggu su manga mapulu nu 'bpamangurban na kiugan nilan semigkem su Isa al-Masih sa kanu entu ba a kutika kagina naimamanan nilan i silan i pedtumbuken nu Isa al-Masih kanu entu a pakenalan nin. Ugaid'a 'gkagilekan silan kanu madakel a taw.
20 Guna su maitu na nangilay silan sa mapia a timpu sa kadulat'ilan kanu Isa al-Masih tembu sinemugu silan sa namagigiling sa senep sa atay i kapagidsa nin ka enggu nilan kadulatan kanu kangadtalu nin asal'a makapalad'ilan kanu 'gkasaligan nu gubilnadul. 21 Nia nilan inidsa sa lekanin na “Gulu, katawan nami i su pedtalun nengka enggu su ibpamandu nengka na benal enggu di ka mapambidaya kanu taw. Ibpamandu nengka su lalan kanu Kadenan sia luyud kanu bantang. 22 Na ngintu, wagib sa lekitanu a manga Yahudi i mayad sa buwis kanu Sultan sa Ruma atawa ka dili?”
23 Ugaid'a 'gkatawan bun nu Isa al-Masih su mawag a kahanda nilan. Na nia nin pidtalu kanilan na 24 “Pananggiti aku nu sia sa kuleta a sinsiliu.b Entain i kipalas sa nia enggu entain i kingala lun?” Na nia nilan inisumpat na “Kanu Sultan sa Ruma.” 25 Daka nia pidtalu nu Isa al-Masih kanilan na “Amaika maitu na inggay nu kanu Sultan su ngin i kanu Sultan enggu inggay nu kanu Kadenan su ngin i kanu Kadenan.”
26 Na da nilan bun kadulati su Isa al-Masih sia kanu kangadtalu nin lu kanu madakel a taw. Nia pan mula na da silan makadtalu ka sangat a nangagaip silan kanu inisumpat'u Isa al-Masih kanilan.
Su Pantag kanu Kambibiag'u Minatay
27 Na aden manga taw a lusud kanu lumpukan a Sadusiyu a pedtalu sa dala kambibiag 'bpaluman nu namamatay. Na sinupegan nilan su Isa al-Masih ka inidsa nilan lun i 28 “Gulu, nia inisulat'u Nabi Musa sa lekitanu na amaika matay su mama a dala makamuliataw kanu kaluma nin na dait a pangaluman nu suled'in su balu nin a entu. Na su mambata nilan na mabaluy a wata nu suled'in a entu a minatay. 29 Na aden pitu kataw a edsusuled a mama. Na su kaka sa langun na nangaluma ugaid'a minatay a dala wata nin. 30 Daka pinangaluma menem'u ikadua su balu nu kaka nin na minatay bun. 31 Na maitu bun ba su ikatelu taman sa naibped matay su pitu kataw a edsusuled a dala bun makamuliataw. 32 Nia mauli lun na minatay bun mambu su babay. 33 Na amaika maitu na sia kanu kambibiag 'bpaluman nu namamatay na entain i kikaluma kanu babay a entu? Kagina nagkaluma nin langun su pitu kataw a entu a edsusuled.” 34 Nia inisawal'u Isa al-Masih kanilan na “Su manga taw sia sa dunia na mamangaluma enggu pamangaluman. 35 Ugaid'a sia sa Mauli a Gay na su manga taw a makatalima kanu uyag-uyag a da taman nin na di den silan mamangaluma enggu pamangaluman. 36 Di den silan temala sa kapatay 'bpaluman ka nia nilan den pagidsan na su manga malaikat. Na silan su mabaluy a manga wata nu Kadenan a mimbibiag 'bpaluman. 37 Na apia sia kanu kitab sa kanu timpu a lu su Nabi Musa kanu kayu a pegkalaw-kalaw na naamad i aden kambibiag 'bpaluman nu manga minatay sia kanu kinatawag'in kanu Kadenan a su Kadenan a pedsimban nu Ibrahim, Iskak enggu Yakub.c 38 Su namamatay na di den pakasimba kanu Kadenan ka su manga bibiag bu i pakasimba lun kagina silan bu i aden uyag-uyag'in sia kanu Kadenan.”
39 Na nia inisumpat'u ped a manga gulu nu pangitaban lu na “Gulu, mapia a benal i pidtalu nengka a nan.” 40 Na da den ba a entu nakatika lun midsa.
Su Idsa pantag kanu Masih
41 Na su Isa al-Masih menem i minidsa kanilan sa “Panun a entu ka nadtalu nu manga taw i ‘Su Masihd na tupu nu Daud’? 42 Kagina su Daud demun i midtalu sia nakadalem kanu Kitab Zabur i
‘Pidtalu nu Kadenan a Mapulu kanu Mapulu ku i
“Ayan ka sia tampal kanu kawanan ku
43 taman sa pasugiuden ku su manga kuntela nengka kanu palad'u ay nengka.” ’e
44 Amaika su Daud ka nia nin kinatawag kanu Masih na Mapulu na panun basi a entu i kinadtupu nin lun?”
45 Na sia kanu adapan nu taw a 'bpamakikineg na pidtalu nu Isa al-Masih kanu 'bpamangunut lun i 46 “Pangingati nu su manga gulu nu pangitaban a malilini lemambungf kanu kapendadalakaw nilan asal'a kapagadatan silan nu manga taw lu kanu manga padian. Na nia nilan kiugan na makapagagayan silan lu kanu 'bpagagayanan nu manga mapulu lu kanu manga pedsambayangan tanu a manga Yahudi enggu lu kanu manga pegkakanduli. 47 Na 'bpamagakalan nilan su manga balu a babay asal'a maakup-akup'ilan su manga kaaden nu entu a manga balu. Na 'bpangeni-ngeni silan sa malendu asal'a makapailay nilan i balaagama silan. Na silan ba a entu i makatalima sa labi lawan den i kapasang'in a kasiksan.”