Su Pakenalan pantag kanu Masela a Kapegkalilang
22
Na nia pan pidtalu nu Isa al-Masih kanilan sa ukit a pakenalan na 2 “Sia kanu kapendatu nu Kadenan na nia nin kalagidan na mana bun su isa a Sultana a pebpakalagianan nin sa masela a kapegkalilang su wata nin a mama.b 3 Na pinaangayan nin kanu manga ulipen nin su langun nu pinangenggat kanu entu a pakalagian. Ugaid'a dala pegkiug pedtalabuk kanilan. 4 Na napasugu menem sekanin 'bpaluman kanu ped a manga ulipenc lu kanilan sa nia nin katigan na ‘Edtalu nu kanu manga pinangenggat a entu i lemu den silan kanu pegkalilangan ka naadil den su manga pegken, nasumbali den su pinagkasebud a sapi taman sa nalutu den su langun.’ 5 Ugaid'a da silan ipamamantag'u pinamangenggat a entu ka makin minawa su uman i isa, aden linemu kanu inawidan nin, su ped na linemu kanu pendagangan nin, 6 su ped menem na sinigkem'ilan su manga ulipen ka pinamungkaidanan nilan taman sa inimatayan nilan. 7 Na sangat a nalipunget su Sultan. Daka pinasuguan nin kanu manga sundalu nin sa kaimatay kanu namangimatay taman sa inipatutung'in su dalepa nilan. 8 Entu pan ka pidtalu nin kanu manga ulipen nin i ‘Kagina ka naadil den su pakalagian a nia, ugaid'a su manga pinangenggat na da makadait kanu nia, 9 na makin kanu lu kanu manga lalan ka enggat'u kanu pegkalilangan su apia entain a mailay nu.’ 10 Na linemu den mambu su manga ulipen kanu manga lalan ka pinangenggat'ilan den su apia entain a nailay nilan a manga taw magidsan i dupang atawa ka dikena taman sa napenu na manga taw a tinemalabuk su entu a pegkalilangan.11 “Na linemudep mambu su Sultan ka 'bpagilayn nin su manga ana. Daka nailay nin su isa a mama a dala makambalegkas sa balegkas sa kapegkalilang. 12 Na pidtaluan nin su mama sa ‘Pakat, nginan ka sia ka a da ka makambalegkas sa balegkas sa kapegkalilang?’ Ugaid'a di pakasumpat su mama. 13 Daka pidtalu nu Sultan kanu manga ulipen nin i ‘Pawik'u su ay nin enggu lima nin ka idtug'u lu kanu kalibutengan a 'bpamanguliang i taw nin enggu 'bpamegkiget i ngipen nin.’ ”
14 Na nia pan pidtalu nu Isa al-Masih na “Madakel man su pinangenggat ugaid'a paidu bu su manga napamili.”
Su Kapendulat kanu Isa al-Masih pantag kanu Kapembayad sa Buwis
15 Daka su manga taw a lusud kanu lumpukan a Parisiyu na namangawa ka pinagitung'ilan u panun i kadulat'ilan kanu Isa al-Masih sia kanu manga kadtalu nin. 16 Na sinemugu silan kanu 'bpamangunut kanilan apeg'u manga taw nu Hirudd lu kanu Isa al-Masih. Na nia nilan pidtalu sa lekanin na “Gulu, katawan nami i matidtu ka a taw enggu bantang su ibpamandu nengka kanu manga taw a lalan kanu Kadenan. Di ka mapambidaya enggu di nengka 'bpagilayn su malatabat'u taw. 17 Na ngin i kailay nengka lun, ngintu, wagib sa lekitanu a manga Yahudi i kabayad sa buwis kanu Sultan sa Ruma atawa ka dili?” 18 Na 'gkatawan bun nu Isa al-Masih su mawag a kahanda nilan. Daka nia nin inisumpat kanilan na “Manga taw a dikena senep sa atay i kabpagagama nin, nginan ka pembatalun aku nu? 19 Pananggiti aku nu sia sa kuleta a 'bpagusalen sa kapembayad sa buwis.” Na initan nilan mambu sa dinarius. 20 Daka nia pidtalu nu Isa al-Masih kanilan na “Entain i kipalas sa nia enggu entain i kingala lun?” 21 Nia nilan inisawal na “Kanu Sultan sa Ruma.” Daka nia nin pidtalu kanilan na “Amaika maitu na inggay nu kanu Sultan su ngin i kanu Sultan enggu inggay nu kanu Kadenan su ngin i kanu Kadenan.” 22 Na guna nilan makineg su nia na sangat a nangagaip silan taman sa namakaawa silan.
Su Kinabatalu kanu Isa al-Masih pantag kanu Kambibiag 'Bpaluman
23 Na kanu entu bun ba a gay na aden manga taw a lusud kanu lumpukan a Sadusiyu a pedtalu sa dala kambibiag 'bpaluman nu namamatay i sinemupeg kanu Isa al-Masih ka inidsa nilan lun i 24 “Gulu, nia inisulat'u Nabi Musa kanu kitab na ‘Amaika su mama ka minatay a dala makambata kanu kaluma nin na dait a pangaluman nu suled'in a mama su balu nin ka su mambata nilan na mabaluy a wata nu suled'in a entu a minatay.’e 25 Na aden pitu kataw a edsusuled a mama. Na su kaka sa langun na nangaluma ugaid'a minatay a dala makamuliataw. Na pinangaluma nu ikadua su balu nu kaka nin. 26 Na maitu bun ba i nanggula nin na minatay bun a dala makamuliataw. Daka pinangaluma menem'u ikatelu taman sa nagkaluma man langun nu babay su pitu kataw a edsusuled a dala makamuliataw. 27 Nia mauli sa entu na minatay bun su babay. 28 Na sia kanu kambibiag 'bpaluman nu namamatay na entain kanu pitu kataw a entu a edsusuled i kikaluma kanu babay? Kagina nagkaluma nin silan langun.” 29 Nia inisumpat'u Isa al-Masih kanilan na “Pakasibay kanu sabap sa di nu 'gkatuntayan su nakadalem kanu kitab enggu su kabarakat'u Kadenan. 30 Kagina kanu kambibiag 'bpaluman nu namamatay na dikena den 'bpangaluma su manga mama enggu dikena den 'bpangaluman su manga babay ka mana den silan manga malaikat lu kanu sulega. 31 Ugaid'a makapantag sa u embibiag 'bpaluman su namamatay na ngintu, da nu pamun mabatia sia kanu kitab su kinadtalu nu Kadenan sa lekanu sa
32 ‘Saki su Kadenan a pedsimban nu Ibrahim, Iskak enggu Yakub’f?
Su namamatay na di den pakasimba kanu Kadenan ka su manga bibiag bu i pakasimba lun.” 33 Na guna makineg'u madakel a taw su nia a panduan nin na sangat a nangagaip silan.
Su Balapantag sa Langun na manga Kasuguan
34 Ugaid'a su manga taw a lusud kanu lumpukan a Parisiyu na guna nilan makineg i da den kasumpati nu manga taw a lusud kanu lumpukan a Sadusiyu su Isa al-Masih na mindidilimudan silan ka pibpawangan nilan su Isa al-Masih. 35 Na isa kanilan a gulu bun nu pangitaban i minatalu kanu Isa al-Masih sa nia nin inidsa lun na 36 “Gulu, endaw kanu manga kasuguan i balapantag sa langun?” 37-38 Na nia inisumpat'u Isa al-Masih na “Nia balapantag sa langun kanu manga kasuguan na ‘Ikalimu nengka su Kadenan a Mapulu sa senep sa atay,g ginawa enggu itungan.’h 39 Nia menem temundug na ‘Ikalimu nengka su ped'engka sa mana bun kanu ginawa nengka.’i 40 Na naputus kanu nia ba a dua a kasuguan su langun nu kasuguan nu Musa enggu su panduan nu manga nabi.”
Su Kinaidsa nu Isa al-Masih kanu manga Taw pantag kanu Masih
41 Na gagalu na 'gkangalimud pamun su manga taw a lusud kanu lumpukan a Parisiyu na minidsa su Isa al-Masih kanilan 42 sa nia nin inidsa na “Sa lekanu a kalangan, entain i kitupu kanu Masih?” Na nia nilan inisawal na “Tupu nu Daud.” 43 Daka nia pidtalu nu Isa al-Masih kanilan na “Panun a entu ka tinawag'u Daud sa Mapulu su Masih sa kanu kinadtalu nin sia nakanggulalan kanu Suti a Ruh sa
44 ‘Pidtalu nu Kadenan a Mapulu kanu Mapulu ku i
“Ayan ka sia tampal kanu kawanan ku
taman sa pasugiuden ku su manga kuntela nengka kanu palad'u ay nengka” ’j?