Su Kinauma nu Isa al-Masih sa Awrusalim
21
Na guna su pakasupeg den lu sa Awrusalim su Isa al-Masih enggu su 'bpamangunut lun taman sa nakauma silan kanu dalepa a bedtuan sa Bitpaig lu kanu Palaw nu Ulibus na sinugu nu Isa al-Masih su dua kataw a 'bpamangunut lun 2 sa nia nin lun pidtalu na “Lu kanu kanu dalepa a nan sa 'gkasangulan nu'a, ka endaw i kauma nu na aden mailay nu lu a iniketan a kimar a aden pipis'in. Na bekali nu ka it'u silan sia sa laki. 3 Na u aden 'gkenu sa lekanu sa entu, na edtalu nu kanilan i nasisita nu Mapulu su nia. Na paganaten kanu nilan mamagayas.” 4 Na kanu nia ba a nanggula na natuman su nakadalem kanu kitab a sia nakanggulalan kanu manga nabia a5 “Edtalu nu kanu manga taw sa Awrusalimb i
‘Ilay nu, pakauma su Datu nu a mababa i muletad'in a nia nin bu pigkudan na su pipis a kimar.’ ”c
6 Daka ginemanat den mambu su dua kataw a 'bpamangunut lun ka pinggula nilan den su inisugu nu Isa al-Masih kanilan 7 taman sa nait'ilan man su kimar enggu su pipis'u kimar lu kanu Isa al-Masih. Na inampisan nilan su entu kanu manga lambung'ilan, entu pan ka pigkudan nu Isa al-Masih. 8 Na su madakel a benal a taw na inipamelat'ilan su manga lambung'ilan lu kanu lalan enggu su manga ped menem na namegkua sa manga laun na kayu ka inibelat'ilan bun kanu lalan. 9 Na su madakel a taw a 'gkangauna enggu 'bpamedtundug kanu Isa al-Masih na ibpamelalis'ilan i
“Pugin su tupu nu Daud!
Palihalan su pakauma a sinugu nu Kadenan!
Pugin su Kadenan a lu sa sulega!”
10 Na guna su 'bpeludep den su Isa al-Masih kanu siudad a Awrusalim na timbang a langun na taw lu na nangabusiug silan sa nia nilan pamakaidsa na “Entain i nia?” 11 Na nia mambu 'bpamedtalun nu madakel a taw na “Sekanin su nabi a si Isa, a taw sa Nasarit a sakup'u prubinsia a Galili.”
Su Kinapamugaw nu Isa al-Masih kanu manga Padagang lu kanu Suti a 'Bpagagaman
12 Na linemu su Isa al-Masih kanu lama-lama nu Suti a 'Bpagagaman ka pinamugaw nin su langun nu padagang enggu su 'bpamamasa taman sa pinamangkulat'in su lamisan nu 'bpamanambi sa kuleta enggu su manga ayanan nu manga padagang sa malapati 13 ka nia nin pidtalu kanilan na “Nia nakadalem kanu kitab na ‘Su walay ku na bedtuan sa walay a 'bpangeni-ngenian.’d Ugaid'a inumbal'u a salag'u manga tanegkawn.”
14 Na aden di pamakailay enggu di pamakalakaw i nangeni sa tabang kanu Isa al-Masih lu kanu Suti a 'Bpagagaman, na pinagkapia nin mambu silan. 15 Ugaid'a sangat a nalipunget su manga mapulu nu 'bpamangurban enggu su manga gulu nu pangitaban guna nilan mailay su manga kagaipan a entu a pinggula nu Isa al-Masih taman den kanu kabpamelalis'u manga wata lu kanu Suti a 'Bpagagaman sa “Pugin su tupu nu Daud!” 16 Na nia nilan pidtalu kanu Isa al-Masih na “Nginan, 'gkakineg'engka bun i pedtalun na manga wata a nan?” Na nia inisumpat'u Isa al-Masih kanilan na “Uway, 'gkakineg ku. Ngintu, da nu pamun mabatia kanu kitab i ‘Pigkahanda nu Kadenan i kapugi sa lekanin nu manga wata apeg den nu manga wata a pedsusu pamun’e?” 17 Guna su maitu na tinagak'in silan ka linemu kanu dalepa a Bitani ka lu ba sekanin napalepas sa magabi.
Su Kinalanes'u Kayu a Igus
18 Na kanu kinagkapita sa kapembalingan nu Isa al-Masih lu sa Awrusalim na nagutem sekanin. 19 Daka aden nailay nin a kayu a igus sia kanu ligid'u lalan, na pibpawangan nin su entu ugaid'a dala natun nin lun a unga ka laun bu. Na nia nin pidtalu kanu kayu a igus na “Iganat saguna na di ka den munga taman sa taman.” Na kanu entu demun ba na migkulay su kayu a igus. 20 Na guna mailay i entu nu 'bpamangunut lun na sangat a nangagaip silan taman sa nia nilan nadtalu na “Panun a entu i kinadsambuta demun malanes'u kayu a igus?” 21 Na nia inisumpat'u Isa al-Masih kanilan na “Saben-sabenal a pedtalun ku sa lekanu i amaika aden salig'u taman sa dala kandua-dua nu lun na dikena maya bu ba i magaga nu enggula kanu pinggula ku kanu kayu a igus ka apia nia nu pan edtalun kanu palaw i ialat'in i ginawa nin kanu lagat na manggula su entu. 22 Na langun man na ipangeni-ngeni nu na matalima nu amaika aden salig'u.”
Su Kinaidsa kanu Isa al-Masih pantag kanu Kawagib'in
23 Na nakauma menem su Isa al-Masih kanu Suti a 'Bpagagaman. Na kanu kabpamandu nin lu na sinupegan sekanin nu manga mapulu nu 'bpamangurban enggu su 'gkangaunutan nu manga Yahudi ka inidsa nilan lun i “Ngin i kawagib'engka sa kapenggula nengka sa langun nu nia? Entain i minenggay lun i nia sa leka?” 24 Na nia inisumpat'u Isa al-Masih kanilan na “Aden satiman a makaidsa ku sa lekanu. Amaika ka sawalen nu, na edtalun ku bun mambu sa lekanu u endaw nakabpun su kawagib ku sa kapenggula ku kanu langun nu nia. 25 Ngintu, endaw ebpun su kawagib'u Yahiya sa kabpanalawat, kanu Kadenan atawa ka kanu manusia?” Na mimbibitialai silan sa nia nilan pidtalu kanu uman i isa kanilan na “Amaika nia tanu edtalun i ebpun kanu Kadenan na idsa nin sa lekitanu u ngintu ka da tanu palitiayi si Yahiya. 26 Ugaid'a amaika nia tanu menem edtalun i ebpun sa manusia na makagilek i madakel a nia a taw ka langun nilan na 'bpaginugut sa nabi si Yahiya.” 27 Daka nia nilan bu nakasumpat kanu Isa al-Masih na “Di nami katawan.” Na nia mambu pidtalu nu Isa al-Masih kanilan na “Amaika maitu na di ku bun edtalun sa lekanu u endaw nakabpun su kawagib ku sa kapenggula ku sa langun nu nia.
Su Pakenalan pantag kanu Dua Kataw a Wata
28 “Ngin basi i kapegkailay nu sa nia? Aden mama a aden dua kataw a wata nin a mama. Sinupegan nu mama su kaka a wata nin ka pidtalu nin lun i ‘Datu, enggalebek ka pan saguna lu kanu pamumulanan tanu a ubas.’ 29 Ugaid'a nia inisumpat'u wata na ‘Di aku pegkiug.’ Ugaid'a da matana-tana na midsambi su itungan nin ka linemu bun lawa sekanin. 30 Na sinupegan menem'u mama su ikadua a wata nin ka maitu bun ba i pidtalu nin kanu pidtalu nin kanu kaka a wata nin. Na nia menem inisumpat'u wata a nia na ‘Uway, lemu aku Ama.’ Ugaid'a nia mauli sa entu na da sekanin lu. 31 Na entain basi kanu dua kataw a entu a manga wata i naginugut kanu kiug'u ama nin?” Na nia nilan inisumpat na “Su kaka a wata.” Daka nia mambu pidtalu nu Isa al-Masih kanilan na “Saben-sabenal a pedtalun ku sa lekanu i nia pan mauna makalusud kanu kapendatu nu Kadenan su 'bpamangubela sa buwis enggu su manga sundal kumin sa lekanu, 32 ka su Yahiya na nakatingguma sa lekanu asal'a makatutulu nin sa lekanu su ukit sa kaikelasan ugaid'a da nu sekanin paginuguti. Na su manga taw a nia a 'bpamangubela sa buwis enggu su manga sundal na pinaginugutan nilan su Yahiya. Ugaid'a sekanu, na apia nailay nu den i midtataubat den silan na da kanu bun edtataubat.
Su Pakenalan pantag kanu manga Dupang a 'Bpangangawid
33 “Pakikineg'u pamun su ped pan a nia a pakenalan. Aden mama a namumulan sa ubas. Inalad'in su pamumulanan nin a entu enggu inumbalan nin sa lupitan na ubasf taman sa pinatindegan nin sa 'bpanandengan. Entu pan ka inipatuludu nin kanu manga 'bpangangawid ka linemu sa mawatan a dalepa. 34 Guna su nauma den su kapegkasabpet na napasugu sekanin sa manga ulipen nin lu kanu manga 'bpangangawid asal'a makua nin su umun nin sa kanu nasabpet. 35 Ugaid'a sinigkem'u manga 'bpangangawid su manga ulipen nin. Na su sakataw na pinametay nilan enggu su sakataw menem na inimatayan enggu su sakataw menem na pinamalantay nilan sa watu. 36 Na sinemugu menem su kigkuan sa labi pan i kadakel'in a ulipen lu kanu manga 'bpangangawid. Na maitu bun ba i pinakaidan nilan lun kanu nangauna a entu a sinugu. 37 Nia den mauli sa entu na nia nin den sinugu na su wata nin a mama sa nia nin 'gkadtalu na ginawa na ‘Pagadatan nilan su wata ku a nia.’ 38 Ugaid'a guna mailay nu manga 'bpangangawid su wata nin na nia nilan pidtalu kanu uman i isa kanilan na ‘Sia kanu ka nia den su pebpusakan, imatayan tanu sekanin ka enggu tanu makua su ipebpusaka lun a nia.’ 39 Daka endaw i kinauma nu wata nin na sinigkem'ilan ka inidtug'ilan lu kanu liu nu pamumulanan a ubas ka inimatayan nilan. 40 Na guna den makauma su kigkuan kanu pamumulanan a ubas, na ngin basi i enggulan nin kanu manga 'bpangangawid a entu?” 41 Na nia nilan lun inisumpat na “Imatayan nin su manga dupang a entu a manga taw entu pan ka ipatuludu nin su pamumulanan nin a ubas sa ped a manga 'bpangangawid a makaenggay lun sa umun sa uman makasabpet.”
42 Na nia pan pidtalu nu Isa al-Masih kanilan na “Ngintu, da nu pamun mabatia su nakadalem kanu kitab a
‘Su watu a inendan nu manga panday na entu bun ba i nabaluy a balapantag kanu langun nu watu nu walay.g
Su Kadenan i migkahanda sa entu a nanggula.
Sangat a makagaip-gaip kanu mata nu uman i isa su entu a kahanda nu Kadenan’h?
43 Na nia ba i sabap'in ka ngintu ka pedtalun ku sa lekanu i su kapendatu nu Kadenan na iawa den sa lekanu ka inggay kanu bangsa a penggalebeken nin su dait a enggalebeken nu taw a luyud kanu Kadenan. 44 Na apia entain i makagebpa kanu nia ba a watu na malupet-lupet enggu apia entain menem i kaulugan nu nia ba a watu na matapung-tapung.”
45 Na guna i entu makineg'u manga mapulu nu 'bpamangurban enggu su manga taw a lusud kanu lumpukan a Parisiyu na naimamanan nilan i silan i pedtumbuken nu Isa al-Masih kanu entu a pakenalan nin. 46 Daka pebpapangilay nilan u panun i kasigkem'ilan kanu Isa al-Masih ugaid'a 'gkagilekan silan kanu madakel a taw kagina ipedtimbang'ilan su Isa al-Masih sa isa bun a nabi.