Su Kinabubus kanu Isa al-Masih sa Lana a Kamutan
12
Na nem gay bun den bagu mauma su Kanduli nu Kalipuas na linemu su Isa al-Masih sa Bitani a dalepa ni Lasaru a pinambibiag'u Isa al-Masih 'bpaluman. 2 Na kanu kinauma nu Isa al-Masih lu na inadilan sekanin sa makagabi nilan. Na kaped'ilan kineman si Lasaru. Nia nanalagad kanilan na si Marta. 3 Saleta mambu na si Mariam na kinemua sa manga tenga sa litru a mapulu a benal i alaga nin a kamutan a lana na nardua a da simbul'in ka inibubus'in kanu ay nu Isa al-Masih entu pan ka pinunasan nin kanu buk'in. Daka napenu na baw nu kamutan su lusud'u walay. 4 Na nia pidtalu ni Yahuda Iskalia a isa bun kanu 'bpamangunut lun enggu temipu sa lekanin na 5 “Ngintu ka da 'bpasa su nan a kamutan sa telu gatus a dinariusb ka inggay kanu manga miskinan i pasa nin?” 6 Ugaid'a dikena nia nin kinadtalu sa nia i 'gkalat i nanam'in kanu manga miskinan ka nia nin kinadtalu sa nia na sabap sa tanegkawn sekanin. Na sekanin i sinaligan sa kapedtuludu kanu kuleta nilan ugaid'a 'bpamanegkawn nin su ped. 7 Daka nia pidtalu nu Isa al-Masih na “Padtaday nu den sekanin ka inidtatalama nin i nan sa kanu gay a kalebeng sa laki. 8 Ka su manga miskinan na tatap'u bun man silan 'gkangadtagapeda ugaid'a saki na dikena nu tatap madtagapeda.”9 Na guna katawi nu madakel a manga taw sa Yudia i lu su Isa al-Masih kanu entu a dalepa na linemu silan. Ugaid'a dikena nia nilan kinalu i sabap bu kanu Isa al-Masih ka nia nilan ped a kinalu na asal'a 'gkailay nilan si Lasaru a pinambibiag'u Isa al-Masih. 10 Daka guna su maitu na iniamung 'gkahanda nu manga mapulu nu 'bpamangurban si Lasaru sa kaimatay nilan lun 11 kagina sabap sa lekanin na madakel a manga Yahudi i tinemagak den kanilanc ka naginugut kanu Isa al-Masih.
Nauma den su Kapayag kanu Sigay nu Kaka nu Manusia
12 Na kanu temundug a gay na su madakel a taw a tinemalabuk kanu entu a kanduli na nakineg'ilan i pakauma su Isa al-Masih lu sa Awrusalim. 13 Na guna su maitu na kinemua silan sa manga laun na libi ka inalaw nilan su Isa al-Masih a ibpelalis'ilan i
“Pugin su Kadenan!d Palihalan su pakauma a Datu nu manga taw a Israil a sinugu nu Kadenan!”e
14 Na guna makailay sa manguda a kimarf su Isa al-Masih na pigkudan nin su entu. Na natuman su nakadalem kanu kitab a
15 “Manga taw sa Awrusalim,g da kanu magilek. Ilay nu! Pakauma den su Datu nu a migkuda sa manguda a kimar.”h
16 Na kanu entu demun ba a kutika na da katuntayi nu 'bpamangunut kanu Isa al-Masih su pantag sa entu. Sekali nilan pan natuntayan na guna su nakapabpapului den sekanin. Na nagkalendem'ilan mambu i su langun nu entu ba na nakadalem sia kanu kitab apeg den nu pinggula nu manga taw lun.
17 Saleta mambu na su madakel a taw a natabu kanu kinapambibiag'u Isa al-Masih kani Lasaru sa ukit a kinatawag'in lun lu kanu kubul na ibpangimbenal'ilan bun su entu. 18 Na nia ba i sabapan na kinalu nu madakel a taw kanu Isa al-Masih kagina nakineg'ilan su pinggula nin a entu a tanda a kagaipan. 19 Guna su maitu na mimbibitiala su manga taw a lusud kanu lumpukan a Parisiyu sa “Ilay nu! Langun na manga taw na 'bpamangunut den sa lekanin, na da den manggula tanu sa nia.”
20 Na aden bun manga dikena-Yahudi a tinemalabuk kanu Kanduli nu Kalipuas asal'a makasimba silan kanu Kadenan. 21 Na su nia a manga taw na linulud'ilan si Pilipus a taw sa Bitsaida sa prubinsia a Galili ka inidsa nilan lun i “Datu, mapakay a makilala nami si Isa?” 22 Daka pibpawangan ni Pilipus si Anduk ka pidtalu nin lun su makapantag sa entu. Entu pan ka linemu silan dua kanu Isa al-Masih ka pidtalu nilan su entu. 23 Na nia pidtalu nu Isa al-Masih kanilan na “Nauma den ba a nia su kutika a ipayag den su sigay nu Kaka nu Manusia. 24 Saben-sabenal a pedtalun ku sa lekanu i nia tabia a kagkadakel'u satiman a lagas na maulugj pan sia kanu lupa ka u di maulug na di 'gkadakel. Ugaid'a amaika makalebeng kanu lupa na metu taman sa munga sa madakel. 25 Na su taw a kalilingayan nin su umul'in na makin madala sa lekanink su entu ugaid'a su taw a di nin kalilingayan i umul'in sia sa dunia na makatalima sa uyag-uyag a da taman nin. 26 Na apia entain i enggalebek kanu penggalebeken ku na dait a paginugutan aku nin enggu apia endaw aku 'bpawang na lu bun ba sekanin. Na su penggalebek kanu galebek ku na balasan sekanin nu Ama.”
27 Na pidtalu menem'u Isa al-Masih i “'Gkalingasa a benal i ginawa ku saguna. Na ngintu, dait ba a edtalun ku i ‘Ama, ilipuas aku nengka kanu nia a kamalasayan’? Dili guna dait ka nia ba i sabapan na kinasia ku na asal'a matala ku su nia a kamalasayan.” 28 Daka pidtalu nu Isa al-Masih kanu Kadenan i “Ama, ipayag'engka den su sigay nengka.” Daka aden suala a ebpun sa sulega a nia nin pedtalun na “Inipayag ku den man su sigay ku enggu ipayag ku pamun su entu.”
29 Na guna i entu makineg'u madakel a taw lu na nia nilan pidtalu na “Linemugung.” Su ped na nia nilan pidtalu na “Ipembitiala sekanin nu malaikat.” 30 Ugaid'a nia pidtalu nu Isa al-Masih kanilan na “Dikena nia kinatulun nu nia a suala i kapianan ku ka kapianan nu. 31 Na nauma den ba a nia su kakukum kanu dunia. Na mabugaw den su datu nu dunia.l 32 Na amaika makatunggul aku den na isupeg ku su langun nu taw sia sa laki.” 33 Na pidtalu nin i nia ka papegkatawan nin u panun i ukit a kapatay nin.
34 Daka nia pidtalu sa lekanin nu madakel a taw na “Panun i kapedtalu nengka sa nasisita a mataym su Kaka nu Manusia inunta na nia nakapamandu sa lekami na nia nakadalem kanu kitab na su Masih na maguyag-uyag taman sa taman? Na entain besen a Kaka nu Manusia i pedtalun nengka a nan?” 35 Na nia pidtalu nu Isa al-Masih kanilan na “Su pakatayaw sa lekanu na di den mauget na maawa den sa lekanu. Na gagalu na sia pan su entu na pamakut kanu den lemakaw asal'a di kanu masaut'u malibuteng. Kagina su 'bpelalakaw sia kanu malibuteng na di nin katawan u endaw sekanin pebpawang. 36 Na salig kanu kanu palitan a pakatayaw gagalu na sia pan sa lekanu ka enggu kanu mabaluy a 'bpamangunut lun.” Na endaw i kinadtalu nu Isa al-Masih sa nia na minawa sekanin taman sa da den pailay kanu madakel a taw.
Su Di Kabpaginugut'u manga Yahudi kanu Isa al-Masih
37 Na apia madakel den i nailay nilan a pinggula nu Isa al-Masih a kangagaipan a tanda na da bun silan salig sa lekanin. 38 Na natuman sia ba su kadtalu nu Nabi Isayas sia kanu kitab a
“Hu Kadenan a Mapulu, ngin i nia ka da gaid naginugut kanu kadtalu nami?
Ngintu ka da nilan kasabuti i inipayag'engka den kanilan su bagel'engka?”n
39 Na nia man sabapan a dala nilan kapaginugut na kagina nadtalu bun nu Nabi Isayas sia kanu kitab i
40 “Pinisek'u Kadenan su mata nilan enggu pinagkategas'in su atay nilan ka u dikena maitu na makailay su mata nilan, makakenal su pamikilan nilan taman sa edtaubat silan enggu pagkapian ku silan.”o
41 Na pidtalu nu Nabi Isayas i nia kagina nailay nin su sigay nu Isa al-Masih.p Na entu ba i sabap'in i kinadtalu nin makapantag kanu Isa al-Masih.
42 Apia ka maitu na madakel bun a 'gkangaunutan i namedsalig kanu Isa al-Masih ugaid'a da nilan bu pakatawi kagina 'gkagilekan silan kanu manga taw a lusud kanu lumpukan a Parisiyu. Ka u katawan nilan na iawa silan kanu walay a pedsambayangan. 43 Kagina nia balapantag kanilan na su pugi nu manusia kumin kanu pugi nu Kadenan.
44 Na nia bun ba su kadtalu nu Isa al-Masih kanu adapan nu madakel a taw sa nia nin kadtalu na “Su pedsalig sa laki na dikena saki bu i pedsaligan nin ka apeg'u sinemugu sa laki. 45 Na su nakailay sa laki na nailay nin bun su sinemugu sa laki. 46 Sinemia aku asal'a katayawan ku su sakadunia asal'a su langun nu semalig sa laki na maawa sia kanu kalibutengan.
47 “Na apia entain i nakakineg kanu manga ibpangusiat ku a di nin ipenggulalan na dikena saki i kemukum sa lekanin kagina dikena nia ku kinasia sa dunia i kukumen ku su sakadunia ka nia ku kinasia na ibpelipuas ku su entu. 48 Na su pegkias sa laki enggu su di pedtalima kanu usiatan ku na nia bun kemukum kanilan sia sa Mauli a Gay na su ibpangusiat ku bun ba a nia sa kanilan. 49 Kagina dikena ebpun sa laki su manga ibpangusiat ku ka ebpun kanu Ama a sinemugu sa laki. Na su Ama i pedsugu sa laki kanu ngin i ipangusiat ku. 50 Katawan ku i su ipedsugu nin na pakaenggay sa uyag-uyag a da taman nin. Kagina ka maitu na nia ku bu pedtalun na u endaw bu i ipapedtalu sa laki nu Ama.”