Su Kinapayag'u Isa al-Masih kanu Manggula nin
26
Na guna mapasad'u Isa al-Masih edtalu su langun nu entu, na nia nin pidtalu kanu 'bpamangunut lun na 2 “Katawan nu na dua gay bun den saguna na mauma den su Kanduli nu Kalipuas, na ipalad den su Kaka nu Manusia ka enggu makatutuk kanu kayu a pinambalawaga.”3 Saleta mambu na su manga mapulu nu 'bpamangurban enggu su 'gkangaunutan nu manga Yahudi na mindidilimudan silan lu kanu tulugan nu mapulu sa langun nu 'bpamangurban a si Kaipas 4 ka pinagitung'ilan u panun i kasigkem'ilan kanu Isa al-Masih sa di kasipatan ka enggu nilan kaimatayan. 5 Ugaid'a nia nilan pidtalu na “Dikena kanu timpu nu Kanduli a nia asal'a di mangaden sa kasamukan su manga taw.”
Su Kinabubus sa Kamutan a Lana kanu Ulu nu Isa al-Masih
6 Na kanu lu su Isa al-Masih sa Bitani kanu walay nu mama a bedtuan sa Simiun a midsakit sa debpig paganay 7 na aden babay a sinemupeg kanu Isa al-Masih a aden it'in a mapulu a benal i alaga nin a kamutan a sia nakabetad sa taguan a bedtuan sa alabastru. Na inibubus'u babay su entu kanu ulu nu Isa al-Masih kanu kabpagagayan nin pegkan. 8 Na guna mailay nu 'bpamangunut lun su entu na nasakit i ginawa nilan sa nia nilan nadtalu na “Nginan ka pendalatan nin i nan? 9 Mabpasa pan a benal i nan sa mapulu i alaga nin. Na inggay kanu manga miskinan su pasa nin.” 10 Na 'gkatawan bun nu Isa al-Masih su pedtalu-talun nilan. Daka nia nin pidtalu kanilan na “Nginan ka pedsamuken nu i babay a nia? Dait man su penggalebeken nin a nia sa laki. 11 Su manga miskinan na tatap'u bun silan 'gkadtagapeda ugaid'a saki na dikena nu tatap madtagapeda. 12 Na su pinggula nu babay a nia a kinabubus'in sa kamutan a lana sa laki na inadil'in su lawas ku unan nu kalebeng sa laki. 13 Na saben-sabenal a pedtalun ku sa lekanu i apia endaw ipangusiat kanu lusud'u dunia su Mapia a Tutuma na mapanudtul bun su pinggula nu babay a nia a tademan sa lekanin.”
14 Daka si Yahuda Iskalia a isa bun kanu sapulu enggu dua a pinamili nu Isa al-Masih na linemu kanu manga mapulu nu 'bpamangurban 15 ka nia nin pidtalu kanilan na “Ngin i makaenggay nu sa laki ka ipalad ku sekanin sa lekanu?” Daka inenggan nilan sekanin sa telu-wati a pilak. 16 Na iganat kanu entu ba na pibpapangilay den nu Yahuda Iskalia i mapia a kutika a katipu nin kanu Isa al-Masih.
Su Kabpagadil kanu Kapedsela-sela kanu Kanduli nu Kalipuas
17 Na kanu muna-muna a gay a kapegkan kanu pan a dala pakembang'in na sinemupeg kanu Isa al-Masih su 'bpamangunut lun ka inidsa nilan lun i “Endaw kami nengka kiugan a makapagadil sa makan kanu Kanduli nu Kalipuas?”a 18 Na nia nin pidtalu kanilan na “Lu kanu kanu siudad ka edtalu nu kanu isa a mama lu i nia kadtalu nu Gulu na ‘Masupeg den su kutika ku. Na san ku ipedsela-sela su Kanduli nu Kalipuas kanu walay nengka a kaped ku su 'bpamangunut sa laki.’ ” 19 Na pinggula den mambu nu 'bpamangunut lun su inisugu nin kanilan. Na lu nilan den ba inadil su pegken nilan kanu Kanduli nu Kalipuas.
Su Kinapayag'u Isa al-Masih pantag kanu Katipu lun
20 Na kanu kinagkagabi na nagagayan su Isa al-Masih apeg'u sapulu enggu dua a 'bpamangunut lun ka kineman silan. 21 Na sia kanu kapegkan nilan na nia nin pidtalu kanu 'bpamangunut lun na “Saben-sabenal a pedtalun ku sa lekanu i isa sa lekanu i temipu sa laki.” 22 Na sangat a nalidu a benal i ginawa nilan taman sa nia nadtalu nu uman i isa kanu Isa al-Masih na “Natalatantu a dikena saki i entu, Mapulu.” 23 Ugaid'a nia nin pidtalu na “Su kaped ku sinemumbuk sa pan kanu ladia i temipu sa laki. 24 Na dait man a matay su Kaka nu Manusia a mana bun su nakasulat pantag sa lekanin sia kanu kitab. Ugaid'a duan-duan nin den su taw a entu a temipu kanu Kaka nu Manusia! Nia pan tinemu sa lekanin i dala den embata.” 25 Na pidtalu bun mambu ni Yahuda Iskalia a temipu kanu Isa al-Masih i “Gulu, saki ba su entu?” Daka nia inisumpat'u Isa al-Masih na “Seka den i midtalu sa nan!”
Su Bagu a Kapasadan
26 Na kanu kapegkan nilan na kinemua su Isa al-Masih sa pan. Endaw i kinadsukul-sukul'in lun enggu kinapugi nin kanu Kadenan na pidtebi-tebi nin ka inenggay nin kanu 'bpamangunut lun sa nia nin pidtalu na “Kua nu su nia ka nia ba su badan ku.” 27 Na kinemua menem sekanin sa tagayan a aden ig'a ubas'in enggu midsukul-sukul kanu Kadenan. Entu pan ka inenggay nin kanilan sa nia nin pidtalu na “Uman i isa sa lekanu na minem kanu nia, 28 ka nia ba su lugu ku a minalut kanu kapasadan nu Kadenan a ipatuga asal'a maampun su kabaladusan nu taw. 29 Na pedtalun ku sa lekanu i iganat saguna na di aku den minem 'bpaluman sa ig'a ubas taman sa kanu gay a inemen tanu su entu a binagu den sia kanu kapendatu nu Ama ku.”
Su Kinapayag'u Isa al-Masih kanu Manggula nu 'Bpamangunut lun
30 Na guna silan makapasad edsengal sa kapugi kanu Kadenan na linemu silan kanu Palaw nu Ulibus. 31 Na kanu sia silan sa lalan na nia pidtalu nu Isa al-Masih kanilan na “Kanu nia bun ba a magabi na langun nu na temagak sa laki a mana bun su kadtalu nu Kadenan a nakadalem kanu kitab a
‘Imatayan ku su pedtuganul kanu manga bili-bilib na amaika maitu na mamakadsambal su manga bili-bili a pedtuganulen nin.’c
32 Ugaid'a ulian nu kapambibiag sa laki 'bpaluman na muna aku sa lekanu lu sa Galili.” 33 Na nia pidtalu ni Pitru na “Apia langun nilan na temagak sa leka ugaid'a mana i saki na dili.” 34 Na nia inisumpat'u Isa al-Masih sa lekanin na “Saben-sabenal a pedtalun ku sa leka i kanu nia bun ba a magabi na ikias aku nengka sa makatelu bagu kemuku su manuk a kalasan.” 35 Daka nia pidtalu ni Pitru sa lekanin na “Di ku a benal seka ikias apia nia nin kaaden i ipatay ku pan.” Na maitu bun ba i pidtalu nu langun nu ped pan a 'bpamangunut lun.
Su Kinapangeni-ngeni nu Isa al-Masih
36 Na linemu su Isa al-Masih enggu su 'bpamangunut lun kanu pamumulanan a bedtuan sa Gitsimanid na kanu kinauma nilan lu na pinapagagayan nin silan lu sa nia nin pidtalu kanilan na “Sia kanu demun ba gagalu na kabpangeni-ngeni ku.” 37 Na pinaunut'in si Pitru enggu su dua kataw a manga wata ni Zabidi a si Yakub enggu si Yuhan. Na lu den ba linemudsu masimuket enggu malasay a benal su manggiginawa nin. 38 Daka nia nin pidtalu kanilan na “'Gkalidu a benal i ginawa ku a mana su ipatay ku den. Sia kanu demun ba ka endiaga kanu a kaped ku.” 39 Na nakatangka bu sekanin sa paidu na nakasugiud sekanin mangeni-ngeni sa nia nin pidtalu na “Ama ku, amaika mapakay bu na ilipus aku nengka pan kanu kainem ku kanu tagayan nu kamalasayan a pakatingguma sa laki ugaid'a apia ka maitu na dikena su kiug'u ginawa ku i kaunutan ka su kahanda nengka i matuman.”
40 Na guna sekanin embalingan lu kanu telu kataw na nia nin nauman na pedtulug silan. Daka nia nin pidtalu kani Pitru na “Nginan, di kanu demun makandiaga sa apia sakauras bu kaped ku? 41 Endiaga kanu enggu pangeni-ngeni kanu asal'a di kanu masasat ka di man pegkiug 'gkasasat su ginawa ugaid'a malubay su badan.” 42 Na ginanatan nin menem silan 'bpaluman ka nangeni-ngeni pamun sa nia nin pidtalu na “Ama ku, amaika nia nin bu kasulut i kaukitan ku su kamalasayan a nia a pakatingguma sa laki na tuman ka den su kahanda nengka.” 43 Na mimbalingan menem sekanin na nauman nin den menem silan a pedtulug kagina pedtulatuden a benal silan. 44 Na ginanatan nin menem silan 'bpaluman ka nangeni-ngeni sa maitu bun ba, na ikatelu den i nia a kinapangeni-ngeni nin. 45 Na mimbalingan menem sekanin kanu 'bpamangunut lun sa nia nin pidtalu kanilan na “Nginan, pedtulug kanu pamun besen enggu 'bpangintelenen? Ilay nu, masupeg den a benal su kutika a ipalad su Kaka nu Manusia kanu manga baladusa. 46 Embangun kanu den ka su pedtipu sa laki na masupeg den a benal na entanu den ka alawn tanu sekanin.”
Su Kinasigkem kanu Isa al-Masih
47 Na pedtalu pamun su Isa al-Masih na nakauma si Yahuda a isa kanu sapulu enggu dua a pinamili nin. Kaped'in i madakel a benal a taw a aden it'in a manga sundang enggu manga ibpametay ka sinugu silan nu manga mapulu nu 'bpamangurban enggu su 'gkangaunutan nu manga Yahudi. 48 Na su pedtipu na inenggan nin sa sinial su manga ped'in sa nia nin pidtalu na “U entain su salamen ku sa sium na sekanin su mama, na sigkem'u den.” 49 Na endaw demun i kinauma ni Yahuda na sinupegan nin su Isa al-Masih sa nia nin pidtalu na “Salam, Gulu!” Entu pan ka sinium'in. 50 Na nia pidtalu nu Isa al-Masih sa lekanin na “Pakat, enggula ka den u ngin i kahanda nengka sa kinasia nengka.” Daka kinua sekanin nu manga kaped'i Yahuda ka sinigkem'ilan. 51 Ugaid'a isa kanu kaped'u Isa al-Masih i binindas'in su guluk'in ka tinimbas'in su ulipen nu mapulu sa langun nu 'bpamangurban. Na nia nasugat na su tangila nin taman sa nakabpitas su entu. 52 Daka nia pidtalu nu Isa al-Masih sa lekanin na “Imbalingan nengka i guluk'engka a nan kanu taguban nin ka langun na taw a musal sa guluk na nia nin bun ipatay na guluk. 53 Ngintu, nia nengka kataw ka di pasianen nu Ama ku su ngibu-ngibuan a malaikat'in amaika mangeni aku sa tabang sa lekanin? 54 Ugaid'a amaika maitu na panun pan i katuman kanu nakadalem kanu kitab a dait a manggula ku?”
55 Daka pidtalu menem'u Isa al-Masih kanu manga taw a entu i “Nginan, ribildi aku ka sinemia kanu a minit pan sa manga sundang enggu manga ibpametay sa kasigkem'u sa laki? Uman gay na 'gkailay aku nu bun lu kanu Suti a 'Bpagagaman kanu kabpamandu ku inunta na di aku nu bun pedsigkemen. 56 Ugaid'a dait man a manggula su nia ka enggu matuman su nakadalem kanu Kitab a Inisulat'u Manga Nabi.” Daka su 'bpamangunut kanu Isa al-Masih na midtatalaguy ka tinagak'ilan sekanin.
Su Kinaadap kanu Isa al-Masih lu kani Kaipas
57 Na su namedsigkem kanu Isa al-Masih na lu nilan sekanin pinananggit kanu tulugan ni Kaipas a mapulu sa langun nu 'bpamangurban. Na mindidilimudan lu ba su manga gulu nu pangitaban enggu su 'gkangaunutan nu manga Yahudi. 58 Saleta mambu na pidtatanggunutan ni Pitru su Isa al-Masih taman den lu kanu lama-lama nu tulugan ni Kaipas ugaid'a lu bu sekanin sa mawatan. Na linemudep sekanin kanu lama-lama ka nagagayan kaped'u manga panunugun ka 'bpagilayn nin u ngin i manggula.
59 Na su manga mapulu nu 'bpamangurban enggu su langun den nu 'bpamangukume na 'bpangilay silan sa bitiala a makasendit kanu Isa al-Masih asal'a kapaimatayan nilan sekanin 60 ugaid'a dala natun nilan apia madakel pan i midsaksi sa dikena benal. Na da matana-tana na aden dua kataw a sinemupeg 61 ka nia nilan pidtalu na “Pedtalun nu nia a mama i ‘Magaga ku gemubal su Suti a 'Bpagagaman, na sa dalem'u telu gay na patindegen ku 'bpaluman.’f”
62 Na midtindeg su mapulu sa langun nu 'bpamangurban ka pidtalu nin kanu Isa al-Masih i “Nginan, dala demun makasawal'engka kanu ipedsendit'ilan a nia sa leka?” 63 Ugaid'a dala bun inek-inek'u Isa al-Masih. Na inidsan menem sekanin nu mapulu sa langun nu 'bpamangurban sa “Idsapa nengka kanu kaisa-isa nin a Kadenan, ngintu, seka ba su Masih, su Tunggal'u Kadenan?” 64 Na nia inisumpat'u Isa al-Masih na “Uway, pidtalu nengka den ba a nan. Pedtalun ku sa lekanu i iganat saguna na mailay nu su Kaka nu Manusia a magagayan kanu tampal sa kawanan nu Barakat sa Langun enggu makatingguma sekanin sia sa dunia a lu makasaleta kanu manga gabun sa kawang-kawangan.”g 65 Daka kinisih nu mapulu sa langun nu 'bpamangurban su balegkas'in ka nia nin pidtalu na “Sakutu sekanin! Enduken ka nasisita tanu pan i ped a makadsaksi? Nakineg'u den su kasakutu nin. 66 Na ngin i lekanu sa entu?” Daka nia nilan inisumpat na “Wagib sekanin a matay.” 67 Daka dinudan nilan su beneng'in enggu sinuntuk'ilan taman sa tinebpi nilan pan 68 sa nia nilan lun pidtalu na “Amaika seka su Masihi na edtalu ka kun a nan sa lekami u entain i 'bpametay sa leka?”
Su Kinakias'i Pitru kanu Isa al-Masih
69 Na saleta mambu na si Pitru na 'bpagagayan lu kanu liu, lu kanu lama-lama nu tulugan nu mapulu sa langun nu 'bpamangurban. Na isa kanu manga panunugun a babay i sinemupeg lun ka nia nin pidtalu na “Kaped ka bun nu taw a nan sa Galili a si Isa.” 70 Ugaid'a inikias'in su entu sa nia nin pidtalu sia kanu kaadapan nu manga taw na “Saben-sabenal a di ku katawan i pedtalun nengka a nan.”
71 Daka linemu menem sekanin kanu lalan sa kabpeliu kanu alad na nailay menem sekanin nu isa bun a panunugun a babay, na pidtalu nu panunugun a entu kanu manga taw a pedtindeg lu i “Su mama a nia na kaped bun nu taw a nan sa Nasarit a si Isa.” 72 Ugaid'a inikias menem 'bpaluman ni Pitru su entu taman sa midsapa pan sa nia nin pidtalu na “Di ku a benal katawan i mama a nan.”
73 Na dala matana-tana na su manga taw a pedtindeg lu na sinupegan nilan si Pitru ka pidtalu nilan lun i “Natalatantu a isa ka bun kanilan kagina 'gkatusan kanu legku nengka.” 74 Ugaid'a inidsinta ni Pitru su ginawa nin taman sa inidsapa nin i “Di ku a benal katawan i mama a nan.” Na midsambuta demun su kinakuku na manuk a kalasan. 75 Na nagkalendem mambu ni Pitru su pidtalu sa lekanin nu Isa al-Masih a “Bagu makakuku su manuk a kalasan na makatelu aku nengka den makakias.” Na linemiu si Pitru ka sangat a nakapaguguliang sa kinalidu na ginawa nin.