Su Kinatipu ni Yahuda kanu Isa al-Masih
18
Guna mapasad'u Isa al-Masih su langun nu entu na minawa sekanin lu apeg'u 'bpamangunut lun. Na linemipag silan lu kanu baugan a Kidrun a aden pamumulanan nin lu kanu lipag'in ka linemudep silan lu ba. 2 Na katawan bun ni Yahuda a pedtipu kanu Isa al-Masih su dalepa ba a entu kagina katatapan bun a su Isa al-Masih enggu su 'bpamangunut lun na 'gkangalimud lu ba. 3 Na si Yahuda na pibpawangan nin su dalepa ba a entu kaped'in su lumpukan nu manga sundalua enggu su manga tamengb a sinugu nu manga mapulu nu 'bpamangurban enggu su manga taw a lusud kanu lumpukan a Parisiyu. Na aden it'u manga sundalu enggu su manga tameng a manga sulu, manga palitan enggu manga matalem.4 Na kagina ka su Isa al-Masih na 'gkatawan'in bun su langun nu 'gkanggula nin na sinumbak'in silan sa nia nin pidtalu kanilan na “Entain i 'bpanuntulen nu?” 5 Nia nilan lun inisumpat na “Si Isa a taw sa Nasarit.” Daka nia pidtalu nu Isa al-Masih kanilan na “Saki i entu.” Na kaped'ilan bun lu ba pedtindeg si Yahuda a pedtipu kanu Isa al-Masih.
6 Na endaw i kinadtalu nu Isa al-Masih sa kanilan sa “Saki i entu” na nakasunud silan taman sa naudtang kanu lupa. 7 Na inidsan menem silan 'bpaluman nu Isa al-Masih sa “Entain i 'bpanuntulen nu?” Na nia nilan inisumpat na “Si Isa a taw sa Nasarit.” 8 Nia pidtalu nu Isa al-Masih na “Pidtalu ku den sa lekanu i ‘Saki i entu.’ Na amaika saki i 'bpanuntulen nu na suguti nu sa makaawa i 'bpamangunut a nia sa laki.” 9 Na kanu kinadtalu nu Isa al-Masih sa nia na natuman su kadtalu a “Apia sakataw na dala madala kanu inenggay nengka sa laki.”c
10 Na si Simiun Pitru na aden guluk'in na binindas'in ka tinimbas'in su ulipen nu mapulu sa langun nu 'bpamangurban. Na nia nasugat na su kawanan a tangila nin taman sa nakabpitas su entu. Nia ngala nu entu a ulipen na Malku. 11 Daka nia pidtalu nu Isa al-Masih kani Pitru na “Imbalingan nengka i guluk'engka a nan kanu taguban nin. Ka ngintu, di ku katigkelan su kamalasayand a pigkahanda nu Ama sa laki?”
12 Guna su maitu na su Isa al-Masih na sinigkem'u lumpukan nu manga sundalu kaped'ilan su mapulu nilan enggu su manga tameng a sinugu nu manga Yahudi.e Iniketan nilan sekanin 13 enggu lu nilan muna pinananggit kani Anas a panugangan ni Kaipas. Na si Kaipas i mapulu sa langun nu 'bpamangurban kanu entu ba a lagun. 14 Na sekanin bun i minenggay sa indawan kanu manga Yahudi sa nia tinemu i sakataw bu i matay kumin kanu madakel a taw.f
15 Na si Simiun Pitru enggu su sakataw pan a 'bpagunut kanu Isa al-Masih na pidtatalundug'ilan su Isa al-Masih. Su sakataw a entu a 'bpagunut na kilala sekanin nu mapulu sa langun nu 'bpamangurban. Na nakaludep sekanin kanu lama-lama nu mapulu sa langun nu 'bpamangurban a initan kanu Isa al-Masih 16 ugaid'a si Pitru na lu bu nakadtaman kanu liu nu pintuan. Na su sakataw a 'bpagunut a kilala nu mapulu sa langun nu 'bpamangurban na linemu kanu bengawan ka pidtalu nin kanu babay a tameng'u pintuan i paludepen nin si Pitru. 17 Na nia pidtalu nu panunugun a babay a tameng'u pintuan kani Pitru na “Ngintu, dikena ba isa ka bun a 'bpagunut kanu mama a nan?” Daka nia inisumpat'i Pitru na “Dikena.” 18 Kagina ka matenggaw kanu entu a manga kutika na su manga panunugun enggu su manga tameng na miniag silan sa apuy a uling ka midtilalang silan lu ba kanu ubay nin. Na midtindeg bun lu ba si Pitru ka midtilalang bun.
19 Na su mapulu sa langun nu 'bpamangurbang na pinangingidsan nin su Isa al-Masih makapantag kanu 'bpamangunut sa lekanin enggu kanu panduan nin. 20 Nia inisumpat'u Isa al-Masih na “Inipayag ku den langun kanu adapan nu madakel a taw. Katatapan na lu aku 'bpamandu kanu 'gkangalimudan nu langun nu manga Yahudi lu kanu pedsambayangan tanu enggu lu kanu Suti a 'Bpagagaman. Na dala inipamagena ku kanu langun nu inipamandu ku. 21 Ngintu ka saki nengka i 'bpangingidsan? Nia ka pangingidsai na su entain i nakakineg sa kanu panduan ku, ka nia benal na katawan nilan u ngin i inipamandu ku kanilan.” 22 Kanu kinadtalu nu Isa al-Masih sa nia na isa kanu manga tameng a pedtindeg lu kanu ubay nin i tinemebpi sa lekanin sa nia nin pidtalu na “Nginan, mamba i dait a kasawal kanu mapulu sa langun nu 'bpamangurban?” 23 Nia inisumpat'u Isa al-Masih sa lekanin na “Amaika aden pidtalu ku a mawag na idsaksi nengka kanu manga taw su entu a pidtalu ku ugaid'a amaika wagib su pidtalu ku na ngintu ka tinebpi aku nengka?” 24 Na kanu entu ba na naiketan pamun su Isa al-Masih na inipasigkil'i Anas lu kani Kaipas a mapulu sa langun nu 'bpamangurban.
25 Saleta mambu na si Simiun Pitru na pedtindeg bun a pedtilalang lu kanu lama-lama. Na nia nilan pidtalu sa lekanin na “Ngintu, dikena ba isa ka bun a 'bpagunut kanu nan a mama?” Na inikias'in menem sa nia nin pidtalu na “Dikena.” 26 Na isa kanu panunugun nu mapulu sa langun nu 'bpamangurban a pagali nu tinimbas'i Pitru i tangila nin i nia nin pidtalu na “Dikena ba nailay ku seka a kaped'in lu kanu pamumulanan?” 27 Na inikias menem'i Pitru su entu na midsambuta demun i kinakuku nu manuk a kalasan.
Su Kukuman nu Gubilnadul kanu Isa al-Masih
28 Na endaw demun i kinagkapita na iganat kani Kaipas na init menem su Isa al-Masih lu kanu tulugan nu gubilnadul.h Na su manga Yahudi na da silan ludep lu kanu tulugan nu gubilnadul ka enggu di silan maharami asal'a makakan silan kanu Kanduli nu Kalipuas.j 29 Kagina ka maitu na liniuwan silan ni Pilatu a gubilnadul ka nia nin pidtalu na “Ngin i ipedsendit'u kanu mama a nia?” 30 Nia nilan inisawal na “Amaika dala kadupangan nu nia a mama na di nami ipalad sa leka.” 31 Nia pidtalu ni Pilatu kanilan na “Imbalingan nu sekanin lu sa lekanu ka sekanu i kukum lun sia kanu lekanu demun a pangitaban a manga Yahudi.”k Nia inisumpat'u manga Yahudi sa lekanin na “Di 'gkawagib i sekami demun i mangimatay sa apia entain.” 32 Na kanu kinanggula sa nia na natuman su kadtalu nu Isa al-Masih pantag kanu ukit a kapatay nin.l
33 Guna su maitu na linemudep menem si Pilatu lu kanu tulugan ka inipatawag'in su Isa al-Masih ka inidsan nin sa “Ngintu, seka ba su Datu nu manga Yahudi?” 34 Nia inisumpat'u Isa al-Masih na “Ngintu, ganat demun sa leka i nan a idsa atawa ka aden bu nakadtalu sa leka makapantag sa laki?” 35 Nia pidtalu ni Pilatu na “Enduken, Yahudi aku? Inipalad ka bu sia sa laki nu tribu nengka taman den kanu manga mapulu nu 'bpamangurban nu. Ngin besen i pinggula nengka?” 36 Nia inisumpat'u Isa al-Masih na “Su kadatu ku na dikena sia ebpun sa dunia ka amaika sia ebpun sa dunia na su 'bpamaginugut sa laki na mamangatu silan asal'a di aku makapalad lu kanu manga Yahudi. Ugaid'a dikena man sia ebpun su kadatu ku.” 37 Na inidsan ni Pilatu sa “Datu ka besen?” Nia inisumpat'u Isa al-Masih na “Pidtalu nengka den i datu aku. Ka nia man sabapan na kinambata sa laki enggu kinasia ku sa dunia na asal'a makapaamad ku su bantang. Na apia entain i nalusud kanu bantang na 'bpakikinegen nin su suala ku.” 38 Nia pidtalu ni Pilatu sa lekanin na “Ngin besen i bantang?”
Na guna su nadtalu ni Pilatu i nia na liniuwan nin menem su manga Yahudi sa nia nin pidtalu kanilan na “Dala 'gkailay ku a kadupangan nu mama a nia. 39 Ugaid'a mana bun su 'gkalayaman nu a penggalebeken ku sa lekanu a pabpeliu aku sa sakataw a bilanggu sa uman mauma su Kanduli nu Kalipuas. Na ngintu, kiugan nu a paliun ku sa lekanu su Datu nu manga Yahudi?” 40 Na nia nilan inilalis edtalu na “Dikena sekanin i paliun ka si Barabas!” Na si Barabas na isa sekanin a ribildi.