Su Kinaadap kanu Isa al-Masih lu kanu Gubilnadul Pilatu
15
Na endaw demun i kinagkapita na naumpung den su manga mapulu nu 'bpamangurban kaped'ilan su 'gkangaunutan nu manga Yahudi enggu su manga gulu nu pangitaban taman den kanu langun nu 'bpamangukum. Na inipapawik'ilan sia sa lima su Isa al-Masih ka inipalad'ilan lu kani Pilatu.a 2 Na inidsan sekanin ni Pilatu sa “Ngintu, seka ba su Datu nu manga Yahudi?” Na nia inisawal'u Isa al-Masih sa lekanin na “Seka den i midtalu sa nan.” 3 Na madakel i inisendit sa lekanin nu manga mapulu nu 'bpamangurban. 4 Daka inidsan menem sekanin 'bpaluman ni Pilatu sa “Nginan, dala demun makasawal'engka kanu nan? Ilay ka ba, madakel a benal i ipedsendit'ilan sa leka.” 5 Ugaid'a dala den a benal sumpat su Isa al-Masih. Guna su maitu na nagaip si Pilatu.6 Na uman Kanduli nu Kalipuas na pabpeliu sa sakataw a bilanggu si Pilatu. Apia entain i pangenin nu manga taw na entu ba i paliun nin. 7 Na kanu entu a timpu na aden mama a bedtuan sa Barabas a isa kanu manga ribildi a nabilanggu sabap sa minimatay silan kanu kinaatu nilan kanu gubilnu. 8 Na su madakel a taw na sinemupeg kani Pilatu ka pinangeni nilan i inggulalan nin den su katatapan a penggulan nin kanilan uman lagun kanu Kanduli nu Kalipuas. 9 Daka nia inisawal'i Pilatu kanilan na “Kiugan nu a paliun ku sa lekanu su Datu nu manga Yahudi?” 10 Kagina 'gkatawan ni Pilatu i nia bu sabap a kinapalad'ilan sa lekanin kanu manga mapulu nu 'bpamangurban na sabap bu sa kabpangalikud'ilan. 11 Ugaid'a su manga mapulu nu 'bpamangurban na inisundul'ilan su madakel a taw sa nia nilan pangenin a makaliu na si Barabas kumin kanu Isa al-Masih. 12 Daka inidsan menem silan 'bpaluman ni Pilatu sa “Amaika maitu na ngin i kiugan nu a enggulan ku kanu pedtawagen nu a nia a Datu nu manga Yahudi?” 13 Na nia nilan inilalis semumpat na “Itutuk sekanin kanu kayu a pinambalawaga!” 14 Daka inidsa ni Pilatu kanilan i “Enduken, ngin i kadaluakan a pinggula nin?” Ugaid'a makin nilan inilalis sa matanug i “Itutuk sekanin kanu kayu a pinambalawaga!” 15 Kagina ka nia kiug'i Pilatu na masuat'in su madakel a taw na pinaliu nin si Barabas. Na pinalebpadan nin menem mamikal su Isa al-Masih entu pan ka inipalad'in kanu manga sundalu nin asal'a makatutuk kanu kayu a pinambalawaga.
Su Kinatutuk kanu Isa al-Masih kanu Kayu a Pinambalawaga
16 Na init'u manga sundalu su Isa al-Masih lu kanu ludep'u tulugan a bedtuan sa Prituriumb entu pan ka tinawag'ilan su langun nu sakabataliun a sundalu. 17 Na pimbalegkasan nilan sa lambayungc a lambung entu pan ka minumbal silan sa sansangan a sudangen ka inisangan nilan kanu ulu nu Isa al-Masih 18 entu pan menem ka sinaludu nilan sa “Salam sa leka, Datu nu manga Yahudi!” 19 Daka pinametay nilan sa tungked su ulu nin taman sa pinanudan nilan entu pan ka midtinggaleb ka sinemugiud silan sa lekanin.d 20 Na guna nilan mapagumpak su Isa al-Masih na linuwas'ilan menem su lambayung a lambung ka inipambalegkas'ilan lun menem su danden a balegkas'in ka entu pan ka iniliu nilan sekanin ka enggu makatutuk kanu kayu a pinambalawaga.
21 Na aden mama a bedtuan sa Simiun a 'bpagukit lu ebpun kanu 'bpangangawidan, taw sekanin sa Sairin a ama ni Anduk enggu Rupus. Na pineges'u manga sundalu sekanin mapapamusay sa kayu a pinambalawaga a pedtutukan kanu Isa al-Masih. 22 Na pinananggit'ilan su Isa al-Masih lu kanu dalepa a bedtuan sa Gulguta a nia nin maena na dalepa nu takulab a ulu. 23 Na inenggan nilan sekanin sa ig'a ubas a makalangut a sinimbulan sa mirae ugaid'a dala nin talima su entu. 24 Daka initutuk'ilan den sekanin kanu kayu a pinambalawaga. Na pimbad-bad'ilan su manga balegkas'in sa ukit a kinambunuta asal'a katawan nilan u ngin i dait a makua nu uman i isa.f
25 Na kanu kinatutuk'ilan kanu Isa al-Masih lu kanu kayu a pinambalawaga na ikasiyaw sa mapita. 26 Na inibetad'ilan su karatula lu kanu pulu nu ulu nin a nia lun nakasulat na su ipedsendit'ilan sa lekanin a “Su Datu nu manga Yahudi.” 27-28 Na dua kataw a tulisan i initutuk kanu ped a kayu a pinambalawaga, su sakataw na sia tampal kanu kawanan nin, su sakataw menem na sia tampal kanu biwang'in.g 29 Na su 'bpamangukit na 'bpangiling-kiling a 'bpagumpaken nilan sekanin sa nia nilan lun pedtalun na “Ababa! Dikena ba penggeban nengka su Suti a 'Bpagagaman enggu patindegen nengka menem kanu dalem'u telu gay? 30 Na saguna na ilipuas'engka su ginawa nengka, embaba ka san kanu kayu a nan a pinambalawaga.” 31 Na maitu bun ba i pinggula nu manga mapulu nu 'bpamangurban enggu su manga gulu nu pangitaban na pinagumpak'ilan bun su Isa al-Masih sa nia nilan 'bpamedtalun na “Ibpelipuas'in kun su ped a taw ugaid'a su ginawa nin na di nin magaga lemipuas. 32 Na u sekanin su Masih a Datu nu manga taw a Israil na ibaba nin i ginawa nin kanu kayu a nan a pinambalawaga ka enggu tanu mailay taman sa makapaginugut tanu lun.” Na apia su dua kataw a entu a dupang na 'bpagumpaken nilan bun su Isa al-Masih.
Su Kinapatay nu Isa al-Masih
33 Na kanu maudtu na nakatekaw demun migkalibuteng kanu lusud'u inged taman sa ikatelu a uras sa malulem. 34 Na kanu entu bun ba a kutika na inilalis'u Isa al-Masih sa matanug i “Il-uy,h Il-uy, lama sabaktani?”i Nia nin maena na “Hu Kadenan ku, Kadenan ku, ngin i nia ka pinadtaday aku nengka?” 35 Na ped kanu manga taw lu ba i nakakineg kanu entu na nia nilan pidtalu na “Pakikineg'u ba, pedtawagen nin su Nabi Ilias.”j 36 Na aden sakataw a midtalaguy ka inisumbuk'in kanu madsem a makalangut su ibpangamek ka inibetad'in kanu tangkayan ka enggu nin pakapasusup kanu Isa al-Masih sa nia nin pidtalu na “Da kanu pan, ilayn tanu kun na u makauma su Nabi Ilias ka ibaba nin san sekanin.” 37 Daka nakalalis sa matanug su Isa al-Masih entu pan ka napandus su napas'in. 38 Na saleta mambu na su kurtinak nu Suti a 'Bpagagaman na nakisi sa luk iganat sa pulu taman sa baba. 39 Na guna mailay nu kapitan na sundalu a pedtindeg lu kanu kasangulan nu Isa al-Masih su ukit a kinapandus'u napas'in na nia nin nadtalu na “Saben-sabenal a Tunggal'u Kadenan i mama a nia.”
40 Na aden bun manga babay lu sa mawatan a pedsandeng. Na ped kanilan si Mariam a taw sa Magdala enggu si Salumi. Na kaped'ilan bun si Mariam a ina ni Yusi enggu Yakub a manguda. 41 Na su manga babay a nia na naginugut kanu Isa al-Masih enggu tinemuganul sa lekanin kanu lu pan sekanin sa Galili. Na madakel bun kanu manga babay a minunut sa lekanin lu sa Awrusalim i lu bun ba kanu kinatutuk kanu Isa al-Masih.
Su Kinakubul kanu Isa al-Masih
42 Na entu bun ba mambu su Gay nu Kabpagadil,l su gay a unan nu Gay nu Kabpangintelenen. Na guna su pedsukilep den 43 na isa kanu 'bpamangukum a bedtuan sa Yusup a taw sa Arimatia i pinagkawalaw nin su manggiginawa nin ka pinangeni nin kani Pilatu su bangkay nu Isa al-Masih. 'Bpagadatan bun si Yusup enggu isa bun sekanin a 'bpagangat kanu kandatu nu Kadenan.m 44 Na nagaip si Pilatu sa kinakineg'in sa minatay den su Isa al-Masih. Daka inipatawag'in su kapitan na sundalu ka inidsa nin u benal a minatay den su Isa al-Masih. 45 Na guna kasabuti ni Pilatu kanu kapitan na sundalu i minatay den su Isa al-Masih na sinugutan nin a makua den ni Yusup su bangkay nin. 46 Daka namasa si Yusup sa mapia a ginis. Na guna su nakababa den su bangkay nu Isa al-Masih na pinutus'in kanu ginis a entu ka inikubul'in lu kanu liningkaban a masela a watu a mana takub entu pan ka linilidan nin sa masela a watu su bengawan nu kubul ka enggu 'gkadapengan. 47 Na saleta mambu na si Mariam a taw sa Magdala enggu si Mariam a ina ni Yusi na pidsipatan nilan u endaw inikubul su Isa al-Masih.