Su Kinaadap kanu Isa al-Masih
27
Na kanu kinagkapita na naumpung den su langun nu manga mapulu nu 'bpamangurban taman den kanu 'gkangaunutan nu manga Yahudi ka enggu nilan kapaimatayan su Isa al-Masih. 2 Daka inipapawik'ilan su Isa al-Masih sia sa lima ka inipalad'ilan lu kanu Gubilnadul Pilatu.Su Kinabpatay ni Yahuda Iskalia
3 Na guna katawi ni Yahuda Iskalia a tinemipu kanu Isa al-Masih i winagiban nilan su Isa al-Masih sa kapatay na nakadsendit sekanin kanu pinggula nin lun. Daka inimbalingan nin su telupulu timan a pilak lu kanu manga mapulu nu 'bpamangurban enggu kanu 'gkangaunutan 4 sa nia nin nadtalu kanilan na “Mimbaladusa aku ka natipu ku su dala kadusan nin a taw.” Ugaid'a nia nilan inisumpat lun na “Ngin sa lekami su nan? Lidu na ginawa nengka den i nan.” 5 Na inidtug'u Yahuda Iskalia su manga pilak lu kanu Suti a 'Bpagagaman entu pan ka minawa ka binitin nin i ginawa nin ka mibpatay.
6 Na pinundut mambu nu manga mapulu nu 'bpamangurban su manga pilak sa nia nilan pidtalu na “Di a benal 'gkaalus a isimbul i nia kanu 'bpanaguan sa kuleta nu Suti a 'Bpagagaman kagina su nia na bayad sa kinapatuga sa lugu nu taw.” 7 Daka nia nilan napamagayunan na ipamasa nilan su entu kanu lupa nu 'bpangumbal sa binangga ka enggu kapamelebengan kanu manga lapu a taw. 8 Nia ba i sabap'in a sampay saguna na bedtuan bun su entu sa “Lupa a Naigisan na Lugu.” 9 Daka natuman sia ba su kadtalu sia kanu kitab a sia nakanggulalan kanu Nabi Yaramias sa nia kadtalu na “Kinua nilan su telupulu timan a pilak a alaga nu taw a entu a napagayunan nu manga taw sa Israil a ibayad sa lekanin. 10 Na inipamasa nilan su entu sa lupa nu 'bpangumbal sa binangga a mana bun su inisugu sa laki nu Mapulu.”a
Su Kinapangingidsa nu Gubilnadul Pilatu kanu Isa al-Masih
11 Na guna den makapalad su Isa al-Masih kanu gubilnadul na inidsan sekanin nu gubilnadul sa “Ngintu, seka ba su Datu nu manga Yahudi?” Na nia nin inisumpat na “Seka den i midtalu sa nan.” 12 Ugaid'a dala nin den a benal sawala su ipedsendit sa lekanin nu manga mapulu nu 'bpamangurban enggu su 'gkangaunutan nu manga Yahudi. 13 Daka nia pidtalu sa lekanin nu Pilatu na “'Gkakineg'engka bun i kadakel a ipedsendit'ilan a nan sa leka?” 14 Na apia sataga na dala nin a benal sekanin sumpati, na sangat a nagaip su gubilnadul.
Su Kinasugat sa Kawagib kanu Isa al-Masih sa Kapatay
15 Na uman mauma su Kanduli nu Kalipuas na nia adat-betad'u gubilnadul na pabpeliu sa sakataw a bilanggu. Na nia nin pabpeliun na u entain i 'gkalinian nu madakel a taw. 16 Saleta mambu na kanu entu a timpu na aden bilanggu a kilala a benal sa kadupang a bedtuan sa Isa Barabas. 17 Na kanu kapendidilimudan nilan na inidsan silan ni Pilatu sa “Entain i kalinian nu a paliun ku? Su bedtuan sa Isa Barabas atawa ka si Isa a bedtuan sa Masih?” 18 Na inidsa ni Pilatu su entu kagina 'gkatawan nin bun i nia bu sabap a kinapalad'ilan lun na sabap bu sa kabpangalikud'ilan.
19 Na gagalu na kabpagagayan nu Pilatu lu kanu 'bpagagayanan sa kabpangukum na napapait sa katigan su kaluma nin sa nia nin kadtalu na “Da ka 'bpagigiamung sa taw a nan a ikelas, ka saguna na 'gkalingasa aku a benal sa taginepen ku pantag sa lekanin.”
20 Saleta mambu na su manga mapulu nu 'bpamangurban enggu su 'gkangaunutan na pedsekaten nilan su madakel a taw sa nia nilan pangenin a makaliu na si Barabas enggu su Isa al-Masih menem na paimatayan. 21 Daka inidsan menem'u Pilatu su madakel a taw sa “Entain kanilan dua i kalinian nu a paliun ku?” Na nia nilan inisumpat na “Si Barabas!” 22 Na nia pidtalu nu Pilatu kanilan na “Amaika maitu na ngin i pakaidan ku kanu Isa a bedtuan sa Masih?” Nia nilan menem inisumpat na “Itutuk sekanin kanu kayu a pinambalawaga.” 23 Na nia nin nadtalu kanilan na “Enduken, ngin i kadaluakan a pinggula nin?” Ugaid'a makin nilan inilalis sa matanug i “Itutuk sekanin kanu kayu a pinambalawaga!” 24 Na guna kasipati nu Pilatu i da bun manggula nin sa entu ka nia pan mula na 'bpeludsu den pengguligaw su manga taw, na kinemua sekanin sa ig ka pinamuanawan nin su lima nin sia kanu kaadapan nu madakel a taw sa nia nin pidtalu na “Dala akal-pandapat ku kanu kaigis'a lugu nu nia a mama. Sekanu i kikiug sa nia.” 25 Na nia pidtalu nu madakel a taw na “Uway, sia sa lekami makadtempu taman kanu manga muliataw nami su kaigis'u lugu nu nia a mama.” 26 Daka pinaliu nin kanilan si Barabas enggu pinalebpadan nin mamikal su Isa al-Masih taman sa inipalad'in kanu manga sundalu ka enggu makatutuk kanu kayu a pinambalawaga.
Su Kinapametay nu manga Sundalu kanu Isa al-Masih
27 Daka init'u manga sundalu nu gubilnadul su Isa al-Masih lu kanu tulugan a bedtuan sa Priturium.b Na mindidilimudan lu su sakabataliun a sundalu. 28 Na linuwasan nilan ka pimbalegkasan nilan sa lambayungc a lambung. 29 Entu pan ka minumbal silan sa sansangan a sudangen ka inisangan nilan kanu ulu nin. Na inipakapet'ilan lun kanu kawanan a lima nin su tungked entu pan ka midtinggaleb silan kanu kaadapan nin ka pinagumpak'ilan sa nia nilan pidtalu na “Salam sa leka, Datu nu manga Yahudi!” 30 Na dinudan nilan enggu kinua nilan su tungked ka inipametay nilan kanu ulu nin. 31 Na guna nilan mapagumpak su Isa al-Masih na linuwas'ilan menem su lambayung a lambung a entu ka inipambalegkas'ilan lun menem su danden a balegkas'in ka entu pan ka iniliu nilan sekanin ka enggu makatutuk kanu kayu a pinambalawaga.
Su Kinatutuk kanu Isa al-Masih kanu Kayu a Pinambalawaga
32 Na sia kanu kabpelakaw nilan na nadsumbak'ilan su mama a taw sa Sairin a bedtuan sa Simiun. Na pineges'ilan mapapamusay sa lekanin su kayu a pinambalawaga a pedtutukan kanu Isa al-Masih. 33 Na kanu kinauma nilan kanu dalepa a bedtuan sa Gulguta a nia nin maena na dalepa nu takulab a ulu 34 na pebpaginemen nilan sa ig'a ubas a makalangut a sinimbulan sa pedud ugaid'a guna nin kananami na da nin i entu inema.
35 Na guna su nakatutuk'u manga sundalu den su Isa al-Masih kanu kayu a pinambalawaga na pimbad-bad'ilan su manga balegkas'in sa ukit a kinambunutae 36 na 'bpagagayan demun silan lu ba ka pedtamengan nilan su Isa al-Masih. 37 Na inibetad'ilan lu tampal kanu pulu nu ulu nin su karatula a nia lun nakasulat na su ipedsendit'ilan lun a “Si Isa i nia, su Datu nu manga Yahudi.” 38 Na aden bun dua kataw a tulisan a initutuk kanu ped a kayu a pinambalawaga, su sakataw na sia tampal kanu kawanan nin, su sakataw menem na sia tampal kanu biwang'in.
39 Na su 'bpamangukit na 'bpangiling-kiling a 'bpagumpaken nilan sekanin 40 sa nia nilan lun pedtalun na “Dikena ba penggeban nengka su Suti a 'Bpagagaman enggu patindegen nengka menem kanu dalem'u telu gay? Na amaika seka su Tunggal'u Kadenan na ilipuas'engka su ginawa nengka. Embaba ka san kanu kayu a nan a pinambalawaga.” 41 Na maitu bun ba i pinggula nu manga mapulu nu 'bpamangurban enggu su manga gulu nu pangitaban apeg'u 'gkangaunutan nu manga Yahudi na pinagumpak'ilan bun su Isa al-Masih sa nia nilan 'bpamedtalun na 42 “Ibpelipuas'in kun su ped a taw ugaid'a su ginawa nin na di nin magaga lemipuas. Na u sekanin su Datu nu manga taw sa Israil na ibaba nin su ginawa nin kanu kayu a nan a pinambalawaga ka enggu tanu makapaginugut sa lekanin. 43 Pedsalig kun sekanin kanu Kadenan taman sa pedtalun nin pan i ‘Saki su Tunggal'u Kadenan.’ Na ilayn tanu kun na u ilipuas sekanin nu Kadenan.” 44 Apia su dua kataw a entu a tulisan a kaped'in bun initutuk kanu kayu a pinambalawaga na 'bpagumpaken nilan bun sekanin.
Su Kinapatay nu Isa al-Masih
45 Na kanu maudtu na nakatekaw demun migkalibuteng kanu lusud'u inged taman sa ikatelu a uras sa malulem. 46 Na kanu entu bun ba a uras a manga ikatelu sa malulem na inilalis'u Isa al-Masih sa matanug i “Ili, Ili, lama sabaktani?” Nia nin maena na “Hu Kadenan ku, Kadenan ku, ngin i nia ka pinadtaday aku nengka?” 47 Na su ped a 'bpamedtindeg lu a nakakineg lun na nia nilan pidtalu na “Pedtawagen nin su Nabi Ilias.”f 48 Na su sakataw kanilan na namagayas edtalaguy kemua sa ibpangamek ka inisumbuk'in kanu madsem a makalangut ka inibetad'in kanu tangkayan ka inipasusup'in kanu Isa al-Masih. 49 Ugaid'a su ped na nia nilan pedtalun na “Padtaday nu san sekanin! Ka ilayn tanu kun na u makauma su Nabi Ilias ka ilipuas'in san sekanin.”
50 Daka nakalalis menem sa matanug su Isa al-Masih entu pan ka inipalad'in den su ngiawa nin. 51 Saleta mambu na kanu entu bun ba a kutika na su kurtina nu Suti a 'Bpagagaman na nakisi sa luk iganat sa pulu taman sa baba. Na lineminug taman sa nangaupak su lakungan a manga watu 52 enggu mimbutekad su manga lebeng, na madakel kanu manga ikelas a namamatay i mimbibiag. 53 Entu pan ka linemiu silan kanu lebeng'ilan, na ulian nu kinambibiag'u Isa al-Masih na linemu silan kanu suti a dalepag taman sa madakel i pibpapayagan nilan lu. 54 Na guna mailay nu kapitan na sundalu enggu su manga ped'in a pedtameng kanu Isa al-Masih su nanganggula a entu apeg'u kinalinug na sangat a nangagilekan silan taman sa nia nilan nadtalu na “Saben-sabenal a Tunggal'u Kadenan i mama a nia.”
55 Na madakel a manga babay i pedsandeng kanu Isa al-Masih. Silan su manga babay a minunut sa lekanin ka tinemuganul lun kanu kinandadalakaw nin ebpun sa Galili. 56 Na su ped kanu manga babay a entu na si Mariam a taw sa Magdala, si Mariam a ina ni Yakub enggu Yusup apeg'u ina nu manga wata a mama ni Zabidi.
Su Kinakubul kanu Isa al-Masih
57 Na aden kawasa a mama a taw sa Arimatia a bedtuan sa Yusup, isa bun sekanin a 'bpagunut kanu Isa al-Masih. Na guna su pedsukilep den 58 na linemu kanu Pilatu ka pinangeni nin su bangkay nu Isa al-Masih. Na inisugu ni Pilatu i inggay sa lekanin su entu. 59 Na guna nin makua su bangkay nu Isa al-Masih na pinutus'in sa mapia a limpiu a ginis 60 ka inikubul'in lu kanu da pamun kakubuli a liningkaban nin a masela a watu a mana takub. Inadil'u Yusup i entu kanu ginawa nin. Daka linilidan nin sa masela bun a watu su bengawan nu kubul ka enggu 'gkadapengan, entu pan ka ginemanat. 61 Saleta mambu na si Mariam a taw sa Magdala enggu su sakataw pan a Mariam na 'bpagagayan lu kanu napantag'u kubul'u Isa al-Masih.
Pinatamengan nu Pilatu su Kubul'u Isa al-Masih
62 Na guna maipus su Gay nu Kabpagadil,h na kanu temundug a gay na mindidilimudan lu kanu Pilatu su manga mapulu nu 'bpamangurban enggu su manga taw a lusud kanu lumpukan a Parisiyu 63 ka pidtalu nilan lun i “Mapulu, 'gkagkalendem'ami i su malebut a nan a mama na nia nin pedtalun kanu bibiag pan sekanin na kanu ikatelu gay nu kapatay nin na embibiag kun sekanin 'bpaluman. 64 Amaika maitu na patamengi ka su kubul a entu taman kanu ikatelu nin gay ka tabia bun ka lemu su 'bpamangunut lun ka tegkawn nilan su bangkay nin ka nia nilan edtalun kanu manga taw na mimbibiag sekanin 'bpaluman. Na u manggula i entu na lawan pan i kapagakal kanu manga taw kumin kanu nauna.” 65 Daka nia pidtalu nu Pilatu kanilan na “Uway, patamengi nu den, paunut'u den i manga tameng a nia a manga sundalu ka enggu nilan katamengan sa tidtu.” 66 Na ginemanat den mambu silan ka pinatamengan nilan den su kubul a entu taman sa binetadan nilan sa tanda su pintu a watu.