Su Kinapambibiag 'Bpaluman kanu Isa al-Masih
28
Na kanu kinaipus'u Gay nu Kabpangintelenen kanu mapita-pita demun kanu gay nu Akada na linemu si Mariam a taw sa Magdala enggu su sakataw pan a Mariam kanu kubul'u Isa al-Masih ka kinakap'ilan su entu. 2 Saleta mambu na nakatekaw demun lineminug sa mabagel ka mimbaba i isa kanu manga malaikat'u Kadenan ebpun sa sulega. Na linilid'in su watu a inipintu kanu kubul taman sa minayan lu ba. 3 Na pakaipeng-ipeng i buntal'in ka manabia ka pan i mana kilat enggu su balegkas'in na mana kaputi na gapas. 4 Na kinemegkel'a gilek su manga tameng taman sa mana den silan minatay.5 Na nia pidtalu nu malaikat kanu entu a manga babay na “Da kanu magilek! 'Gkatawan ku i 'bpangilayn nu si Isa a initutuk kanu kayu a pinambalawaga. 6 Na da den man sia sekanin ka pinambibiag den 'bpaluman a mana bun su nadtalu nin. Na sia kanu ba, ka ilay nu i pinaigan lun a nia. 7 Na edtagad-tagad kanu den lemu kanu 'bpamangunut lun ka edtalu nu kanilan su nia a katigan, ‘Pinambibiag den sekanin 'bpaluman. Ilay nu, minuna den sekanin lu sa Galili ka ipagilaya kanu nin lu ba.’ ”
8 Na namagayas mambu silan gemanat lu kanu kubul a 'gkangagilekan enggu sangat a 'gkapia i ginawa nilan ka pinanudtul'ilan kanu 'bpamangunut lun su entu. 9 Ugaid'a gagalu nu sia pan silan kanu lalan na nakatekaw demun napailay su Isa al-Masih kanilan sa nia nin pidtalu kanilan na “Salam.” Na sinupegan nilan ka dinabpan nilan su ay nin ka sinemugiud silan sa lekanin. 10 Daka nia pidtalu nu Isa al-Masih kanilan na “Da kanu magilek! Lu kanu den ka edtalu nu den kanu manga suled ku i lemu silan sa Galili ka mailay aku nilan lu.”
Su Tudtulan nu manga Tameng
11 Saleta mambu na kanu kapengganat'u manga babay lu, na su ped kanu manga tameng na nakauma den lu kanu siudad ka 'bpanudtulen nilan kanu manga mapulu nu 'bpamangurban su langun nu entu a nanggula. 12 Na mindidilimudan su 'gkangaunutan nu manga Yahudi enggu manga mapulu nu 'bpamangurban ka namagumpung silan sa bayadan nilan sa madakel a pilak su manga sundalu a tinemameng 13 ka enggu nia nilan ipadtalu lun na “Edtalu nu kanu manga taw i ‘Tinegkaw nu 'bpamangunut lun su bangkay nin sa magabi a timpu na kapedtulug'ami.’ 14 Na u makineg'u gubilnadul su pantag sa nia na sekami bu i mataw lun edsinantal sa lekanin asal'a dala manggula nu a mawag.” 15 Na tinalima den mambu nu manga tameng su manga pilak taman sa pinggula nilan den su ngin i ipapedtalu kanilan. Na sampay saguna na 'gkadtudtul-tudtul pamun su nia a tudtulan kanu manga Yahudi.
Su Kinabpapayag'u Isa al-Masih kanu 'Bpamangunut lun
16 Na linemu den mambu sa Galili su sapulu enggu isa a 'bpamangunut kanu Isa al-Masih, lu kanu palaw a pidtalu sa kanilan nu Isa al-Masih. 17 Na guna nilan mailay sekanin lu na sinugiudan nilan sekanin ugaid'a su ped na pendua-dua pamun. 18 Daka sinupegan silan nu Isa al-Masih ka pidtalu nin kanilan i “Initapenay den sa laki su langun nu bagel sia sa dunia taman sa sulega. 19 Kagina ka maitu na 'bpawangi nu su langun nu manga bangsa ka baluy nu silan a mamangunut sa laki taman sa salawati nu silan sia kanu ingala nu Ama, Tunggal'in enggu Suti a Ruh. 20 Ipamandu nu bun kanilan i paginugutan nilan su langun nu inisugu ku sa lekanu. Tanudi nu! Di ku sekanu pitasen taman sa kapupusan.”
Wassalam