Su Kinapambibiag kanu Isa al-Masih
24
Na kanu mapita-pita demun kanu gay nu Akada na linemu su manga babay kanu kubul a pinananggit'ilan su manga kamutan a pinagadil'ilan. 2 Na nia nilan nauman na naawa den su watu a masela a inipintu kanu kubul. 3 Daka linemudep silan ugaid'a da nilan den mailay lu su bangkay nu Mapulu a su Isa al-Masih. 4 Na gagalu na kapegkagaip'ilan kanu entu na nakatekaw demun i aden nakatindeg kanu ubay nilan a dua kataw a mama a pedsigay i balegkas'ilan. 5 Na sabap kanu gilek'ilan na nakabpatumeng silan. Na nia pidtalu nu dua kataw a entu a mama na “Enduken ka 'bpangilayn nu i taw a bibiag sia kanu namamatay? 6 Na da den man sia sekanin ka pinambibiag den 'bpaluman. Nia nu tademi na su pidtalu nin sa lekanu kanu lu pan sekanin sa Galili a 7 ‘Su Kaka nu Manusia na makapalad lu kanu manga taw a baladusa taman sa makatutuk sekanin lu kanu kayu a pinambalawaga ugaid'a embibiag sekanin kanu ikatelu nin gay.’ ” 8 Na entu pan ka nagkalendem'u manga babay su entu a kangadtalu nu Isa al-Masih.9 Na minuli silan ka pinanudtul'ilan kanu sapulu enggu isa a pinamili nu Isa al-Masih taman kanu langun nu ped'ilan su entu a nanggula. 10 Na su namanudtul a entu kanilan a manga babay na si Mariam a taw sa Magdala, si Yuhana enggu si Mariam a ina ni Yakub enggu su manga ped pan a manga babay a naped'ilan. 11 Ugaid'a nia nilan lun kataw na dikena benal su entu tembu da nilan paginuguti su manga babay a entu. 12 Ugaid'a si Pitru na nalalaguy lu kanu kubul'u Isa al-Masih. Na dinemukum semiling kanu kubul na nia nin bu nailay lu na su unung a mapia a manga ginis. Na minuli sekanin a sangat a 'gkagaip kanu entu a nanggula.
Su Kinabpapayag'u Isa al-Masih kanu Dua Kataw a 'Bpamangunut lun
13 Kanu entu bun ba a gay na aden dua kataw a 'bpamangunut bun kanu Isa al-Masih i 'bpelu sa dalepa a Imaus, manga sapulu enggu isa kakilumitru i kawatan nin sa Awrusalim. 14 Na sia kanu kabpelakaw nilan na 'gkambitiala nilan su entu ba a nanganggula. 15 Na gagalu na kapembitiala nilan enggu kapebpalawa nilan na minubay kanilan su Isa al-Masih ka minunut kanilan lemakaw. 16 Na 'gkailay nilan bun sekanin ugaid'a di nilan 'gkakilala. 17 Nia pidtalu nu Isa al-Masih kanilan na “Ngin i pembitialan nu a nan?” Na mibpalen silan a 'gkangalidu i ginawa nilan. 18 Si Kliupas a isa kanu dua kataw a entu i midtalu kanu Isa al-Masih sa “Mana seka bu i mindadalakaw sa Awrusalim a da makataw kanu nanggula a nia kanu namakapila gay pamun a nia?” 19 Inidsa nu Isa al-Masih i “Ngin i entu ba a nanggula?” Na nia nilan lun inisumpat na “Su nanggula nu Isa a taw sa Nasarit, nabi sekanin enggu su kangadtalu nin enggu su manga penggalebeken nin na barakat sia kanu adapan nu Kadenan taman den kanu manga taw. 20 Na inipalad sekanin nu manga mapulu nu 'bpamangurban enggu su 'gkangaunutan asal'a masugat sekanin na kawagib sa matay taman sa inipatutuk'ilan man sekanin kanu kayu a pinambalawaga. 21 Sekanin pan menem i inam'ami sa kapambaya-baya kanu Israil. Na nakatelu gay den saguna su entu a nanggula. 22 Nagaip kami kanu manga ped'ami a manga babay a linemu kanu kubul'in kagina mapita 23 ka nia nilan pedtalun na dala nilan den mailay lu su bangkay nin. Pidtalu nilan pan sa kinauli nilan i pibpayagan silan nu manga malaikat a midtalu sa bibiag su Isa. 24 Na linemu bun kanu kubul su ped kanu manga tagapeda, na maitu bun ba kanu manga babay a entu i nadtalu nilan, da bun nailay nilan a bangkay.”
25 Daka nia pidtalu nu Isa al-Masih kanilan na “Ngin den a kada na akal i lekanu a nan, nginan ka malegen kanu a benal papaginuguten kanu langun nu kadtalu nu manga nabi? 26 Dikena ba su Masih na nasisita a mukit kanu entu a manga kamalasayan bagu sekanin badtugen nu Kadenan?” 27 Na pinatuntayan nu Isa al-Masih kanilan u ngin i nakadalem kanu langun nu manga kitab pantag sa lekanin iganat kanu Kitab a Inisulat'u Nabi Musa taman den kanu ped a nakasulat'u manga nabi.
28 Guna su pakasiken den silan kanu dalepa a pebpawangan nilan na matatig na pedtalus 'bpelakaw su Isa al-Masih. 29 Ugaid'a pinabpalen nilan ka pinangeni nilan sa lekanin i “Sia ka, ka unut ka sa lekami ka pedsukilep den enggu pegkagabi den.” Na minunut mambu sekanin kanilan.
30 Na guna su 'bpamegkan den silan kanu lamisan na kinemua sekanin sa pan ka midsukul-sukul enggu pinugi nin su Kadenan entu pan ka pidtebi-tebi nin ka inipangenggay nin kanilan. 31 Daka entu pan ba ka nakilala nilan sekanin. Ugaid'a natekaw demun sekanin nalangiap. 32 Na nia nadtalu nu uman i isa kanilan na “Apidtun pan besen ka mapia gaid i 'gkanggiginawa ta sa kanu kapembitiala nin sa lekita lu sa lalan enggu su kapapedtuntay nin kanu nakadalem kanu kitab.”
33 Na guna su maitu na midtagad-tagad silan embalingan sa Awrusalim. Na nauman nilan su sapulu enggu isa a 'bpamangunut kanu Isa al-Masih enggu su langun nu manga ped'ilan a mindidilimudan lu 34 a pembibitialan nilan i “Benal a mimbibiag 'bpaluman su Mapulu, napailay sekanin kani Simiun Pitru.” 35 Na pinanudtul bun mambu nu dua kataw a entu su nanggula nilan lu sa lalan enggu panun i kinakilala nilan kanu Isa al-Masih kanu kinadtebi-tebi nin sa pan.
Su Kinabpapayag'u Isa al-Masih kanu 'Bpamangunut lun
36 Na gagalu nu kapembibitiala nilan kanu entu na nakatekaw demun edtindeg su Isa al-Masih lu kanu pageletan nilan sa nia nin pidtalu kanilan na “San sa lekanu su kalilintad.” 37 Na nakeduan silan enggu sangat a nangagilekan ka nia nilan lun kataw na pimbuatan silan na manginggilek. 38 Daka nia pidtalu nu Isa al-Masih kanilan na “Nginan ka nakeduan kanu? Nginan ka di kanu gaid pakapaginugut sa mimbibiag aku? 39 Ilay nu ba i lima ku a nia enggu ay ku, benal man a saki i nia. Ami aku nu ba enggu edsusuliman aku nu ka su manga aluak na dala sapu nin enggu dala tulan nin ugaid'a saki na aden sapu nin enggu tulan nin.”
40 Na guna nin madtalu su entu na inipailay nin kanilan su lima nin enggu su ay nin. 41 Na gagalu nu kapegkapia na ginawa nilan enggu kapegkagaip'ilan a di pamun gaid silan pakapaginugut sa entu na minidsa su Isa al-Masih sa “Aden san makan?” 42 Na inenggan nilan mambu sa pinagiaw a seda. 43 Na kinua nin ka lu nin bun ba kinan kanu kasangulan nilan.
44 Daka pidtalu nin kanilan i “Nia den ba su pidtalu ku sa lekanu kanu nangaipus a gay a kapedtatagapeda tanu a su langun-langun na nakadalem kanu Kitab a Inisulat'u Nabi Musa pantag sa laki maitu bun su inisulat'u ped pan a manga nabi taman den kanu Kitab Zabur na natatalanged man a matuman su entu.” 45 Daka inenggan nin silan sa katuntay kanu ngin i nakadalem kanu kitab 46 enggu pidtalu nin kanilan i “Nakadalem kanu kitab i dait a mukit sa kamalasayan su Masih taman sa matay sekanin ugaid'a embibiag sekanin 'bpaluman kanu ikatelu nin gay 47 enggu sia makanggulalan kanu ingala nin na dait a ibpangusiat su kadtaubat enggu su kaampun kanu kabaladusan iganat sa Awrusalim taman den kanu langun nu bangsa. 48 Na sekanu i edsaksi kanu langun nu nia ba. 49 Palangkapen ku sa lekanu su Suti a Ruh a inibpasad'u Ama ku. Ugaid'a taman sa di pan ipalangkap sa lekanu su entu a kabarakat'u Kadenan na da kanu babaya gemanat sia sa Awrusalim.”
Su Kinabpapulu nu Isa al-Masih lu sa Sulega
50 Na ulian nu entu na pinangunanan nin silan lemu sa dalepa a Bitani. Na inikayang'in su lima nin ka pinalihalan nin silan. 51 Na gay nin pebpalihala kanilan na pakakayang-pakakayang bun sekanin ka papebpapulun den sekanin sa sulega. 52 Na sinimba nilan sekanin entu pan ka mimbalingan silan sa Awrusalim a sangat a 'gkangapia i ginawa nilan. 53 Na lalayun silan lu kanu Suti a 'Bpagagaman a pebpugi kanu Kadenan.
Wassalam