Su Kinapambibiag 'Bpaluman kanu Isa al-Masih
16
Na kanu kinaipus'u Gay nu Kabpangintelenen na si Mariam a taw sa Magdala enggu si Mariam a ina ni Yakub taman den kani Salumi na namasa silan sa manga mamut a lana ka enggu nilan makasapu kanu bangkay nu Isa al-Masih. 2 Na kanu mapita-pita demun kanu gay nu Akada na linemu silan kanu kubul. Na guna su mangagan den silan pakauma lu na pedsebang den su senang. 3 Na nia nilan pamakapamagidsaya sia sa lalan na “Entain basi i makatabang sa lekitanu lemilid mawa kanu watu lu kanu bengawan nu kubul?” 4 Ugaid'a guna nilan pedsusulimana su kubul na nadsuliman nilan i naawa den su watu a entu a sangat i kasela nin. 5 Na guna silan 'bpeludep lu kanu kubul na natekawan i ginawa nilan ka nia nilan nailay na manguda a mamab a linemambung sa maputi a 'bpagagayan lu tampal sa kawanan. 6 Ugaid'a nia nin pidtalu kanilan na “Da kanu magilek. Katawan ku i 'bpangilayn nu su taw sa Nasarit a su Isa a initutuk kanu kayu a pinambalawaga. Pinambibiag den sekanin 'bpaluman! Ilay nu i pinaigan lun a nan ka dala den san sekanin. 7 Na ganat kanu den ka edtalu nu kanu 'bpamangunut sa lekanin labi lawan den kani Pitru i muna sa lekanu lu sa Galili su Isa. Na mailay nu sekanin lu a mana bun su pidtalu nin sa lekanu.” 8 Daka linemiu silan kanu kubul ka midtatalaguy silan mawa a pegkegkel'a gilek enggu 'gkangagaip. Na apia entain na dala pidtaluan nilan kanu entuc sabap sa 'gkagilekan silan.dSu Kinabpapayag'u Isa al-Masih ulian nu Kinapambibiag sa lekanin 'Bpaluman
9 Na kanu kinapambibiag 'bpaluman kanu Isa al-Masih kanu mapita-pita demun kanu Akad a na si Mariam a taw sa Magdala i pagan-paganay demun a pibpayagan nin enggu sekanin su babay a binugawan nin sa pitu timan a saitan. 10 Na linemu si Mariam kanu manga nadtagapedae nu Isa al-Masih a 'gkangalidu i ginawa nin enggu 'bpamanguliang kanu entu ba a timpu ka pinanudtul'in kanilan su entu. 11 Ugaid'a guna nilan makineg su tudtulan a entu ni Mariam a mimbibiag 'bpaluman su Isa al-Masih taman sa nailay nin sekanin na dala silan palitiala.
12 Na kanu kinaipus'u entu na mibpapayag bun su Isa al-Masih kanu dua kataw kanilan gagalu nu kabpelakaw nilan 'bpawang lu sa 'bpangangawidan ugaid'a sakalebu i pimbuntal'in. 13 Daka mimbalingan silan ka pinanudtul'ilan i entu kanu manga ped pan a 'bpamangunut lun ugaid'a dala bun silan palitiala.
Su Kinasugu nu Isa al-Masih kanu 'Bpamangunut lun ulian nu Kinapambibiag sa lekanin 'Bpaluman
14 Na kanu kinaipus'u entu na mibpapayag su Isa al-Masih kanu sapulu enggu isa a nasama a pinamili nin kanu kabpamegkan nilan. Na dinaway nin silan kanu kadala na salig'ilan enggu kanu kategas'u pamusungan nilan kagina dala nilan palitiali su manga nakailay sa lekanin ulian nu kinapambibiag sa lekanin 'bpaluman. 15 Daka nia nin pidtalu kanilan na “Lu kanu kanu langun nu dalepa sia sa dunia ka ipangusiat'u kanu langun nu manusia su Mapia a Tutuma pantag sa laki. 16 Na apia entain i semalig sa laki taman sa mapasalawatf na malipuas sekanin ugaid'a apia entain menem i di semalig na masiksa. 17 Na su manga semalig na maaden kanilan su manga kabarakatan a tanda: Na sia makanggulalan kanu ingala ku na mamugaw silan sa manga saitan enggu makadtalu silan sa embias-bias a manga basa. 18 Na apia nia nilan pan usalen kanu kapangua nilan sa manga nipay na lima nilan enggu minem pan silan sa makapatay a duti na di silan kagkaidan. Na 'gkapia su pendalu a dapenetan nilan kanu manga lima nilan.”
Su Kinapabpapulu kanu Isa al-Masih lu sa Sulega
19 Na guna mapasad embitiala nu Mapulu a su Isa al-Masih su sapulu enggu isa a nasama a napamili nin na pinabpapulu den sekanin lu sa sulega. Na lu sekanin nagagayan kanu tampal sa kawanan nu Kadenan. 20 Daka ginemanat den mambu su manga napamili nin ka inipangusiat'ilan den su kadtalu nu Kadenan kanu apia endaw a dalepa, saleta mambu na pedtapiden silan nu Mapulu. Na ipebpagamad'in sa benal su ibpangusiat'ilan sa ukit'u manga tanda a unut kanu entu a kadtalu.
Wassalam