Su Kinambibiag'u Isa al-Masih
20
Na malilibuteng pan kanu mapita-pita demun kanu Akada na linemu den kanu kubulb si Mariam a taw sa Magdala. Na nailay nin i naawa su watu a inipintu kanu kubul. 2 Daka nalalaguy sekanin lemu kani Simiun Pitru enggu kanu sakataw pan a 'bpagunut a ipegkalimu nu Isa al-Masih ka pidtalu nin kanilan i “Aden kinemua kanu bangkay nu Mapulu lu kanu kubul! Di nami katawan u endaw nilan tampal inibetad.” 3 Na entu demun ba na ginemanat si Pitru enggu su sakataw pan a 'bpagunut ka pibpawangan nilan su kubul. 4 Na isa bu i kinapalalaguy nilan dua ugaid'a nauna nakauma su sakataw a 'bpagunut lu kanu kubul ka malengkas i kinapalalaguy nin kumin kani Pitru. 5 Ugaid'a da sekanin ludep ka dinemukum bu semiling taman sa nailay nin bun lu su unung a mapia a manga ginis. 6 Na nakatundug bun makauma si Simiun Pitru. Daka naninggalus sekanin lemudep lu kanu kubul a nailay nin pamun su manga mapia a ginis 7 enggu su mapia a saput a inusal kanu ulu nu Isa al-Masih. Ugaid'a su mapia a saput na da makabetad lu kanu manga mapia a ginis ka nakasenggay a nalulun. 8 Daka linemudep mambu su sakataw a 'bpagunut a nauna makauma lu kanu kubul. Na nailay nin su entu taman sa nalitiala sekanin 9 apia da nilan pan katuntayi su nakadalem kanu kitab a natatalanged i embibiag 'bpaluman su Isa al-Masih. 10 Guna su maitu na mimbalingan den su dua kataw a 'bpamangunut lu kanu pegkakalebenan nilan.Su Kinabpapayag'u Isa al-Masih kani Mariam a Taw sa Magdala
11 Na ulian nu entu na si Mariam a lu pedtindeg kanu liu nu kubul a 'bpaguguliang na dinemukum sekanin ka sinemiling lu kanu kubul. 12 Na nailay nin i dua kataw a malaikat a mimbanggala sa maputi a 'bpagagayan lu kanu nabetadan nu bangkay nu Isa al-Masih. Na su sakataw a malaikat na sia tampal kanu naunanan nin, su sakataw menem na sia tampal kanu natuadan nin. 13 Na inidsan nilan si Mariam sa “Bai, nginan ka 'bpaguguliang ka?” Na nia nin inisumpat kanilan na “Aden kinemua kanu bangkay nu Mapulu ku. Na di ku katawan u endaw nilan tampal inibetad.”
14 Na endaw i kinadtalu nin sa nia na tinemaligkud sekanin, na nailay nin su Isa al-Masih a pedtindeg, ugaid'a da nin makilala i entu besen ba su Isa al-Masih. 15 Na inidsan nu Isa al-Masih si Mariam sa “Bai, nginan ka 'bpaguguliang ka? Entain i 'bpanuntulen nengka?” Na nia kataw lun ni Mariam na su pedtiakap kanu pamumulanen. Na nia nin lun inisumpat na “Kaka, amaika seka i kinemua kanu bangkay na edtalu ka sa laki u endaw nengka tampal inibetad ka enggu ku makua.” 16 Na nia tig'u Isa al-Masih sa lekanin na “Mariam.” Daka nakalengi sekanin sa nia nin nadtalu na “Rabbuni!” Nia nin maena na gulu su entu a kadtalu a Hibru. 17 Nia menem pidtalu nu Isa al-Masih sa lekanin na “Di aku nengka pan pegkapeti ka da aku pamun makabpapulu lu kanu Ama. Ugaid'a makin ka lu kanu manga suledc ku ka edtalu ka kanilan i pebpapulu aku den lu kanu Ama ku a Ama nu bun, su Kadenan ku a Kadenan nu bun.”
18 Guna su maitu na linemu si Mariam a taw sa Magdala kanu 'bpamangunut kanu Isa al-Masih ka pinasabutan nin kanilan sa nia nin pidtalu na “Nailay ku su Mapulu!” Na pinanudtul'in bun kanilan su ngin i pidtalu sa lekanin nu Isa al-Masih.
Su Kinabpapayag'u Isa al-Masih kanu 'Bpamangunut sa lekanin
19 Na kanu kinadsukilep demun kanu entu bun ba a gay a muna-muna a gay nu padian na su 'bpamangunut na nangalid silan lu kanu 'gkangalimudan nilan a walay kagina 'gkagilekan silan kanu 'gkangaunutan nu manga Yahudi. Na nakatekaw demun edtindeg su Isa al-Masih lu kanu pageletan nilan sa nia nin pidtalu kanilan na “San sa lekanu su kalilintad.” 20 Na endaw i kinadtalu nin sa entu na inipailay nin kanilan su lima nin enggu su takilidan nin. Na sangat a nangagalaw su 'bpamangunut kanu kinailay nilan kanu Mapulu. 21 Daka pidsalumanan nin edtalu kanilan i “San sa lekanu su kalilintad. Na u ngin i kinasugu nu Ama sa laki na maitu bun ba mambu i kapedsugu ku sa lekanu.” 22 Endaw i kinadtalu nin sa entu na iniyupan nin su 'bpamangunut sa nia nin pidtalu na “Talima nu den su Suti a Ruh. 23 Na apia entain i taw a ampunen nu i dusa nin na inampun sekanin. Na apia entain menem a taw i di nu ampunen i dusa nin na da sekanin maampun.”
24 Na kanu kinabpapayag'u Isa al-Masih kanilan na dala matabu lu si Tumas a bedtuan bun sa Leping a isa bun kanu sapulu enggu dua a 'bpamangunut lun. 25 Kagina ka maitu na pinanudtul sa lekanin nu ped'in a 'bpamangunut i “Nailay nami su Mapulu!” Ugaid'a nia nin pidtalu sa kanilan na “Di aku a benal malitiala nia tabia na mailay ku pan su tanda nu tutuk lu kanu lima nin enggu matiduk ku demun kanu kemel ku taman sa maami nu lima ku demun su takilidan nin.”
26 Na kanu ulian nu nakapitu gay na su 'bpamangunut na lu menem silan kanu 'gkangalimudan nilan a walay. Na nangalid silan enggu kaped'ilan den si Tumas. Na nakatekaw menem edtindeg su Isa al-Masih lu kanu pageletan nilan sa nia nin pidtalu na “San sa lekanu su kalilintad.” 27 Daka pidtalu nin kani Tumas i “Itiduk'engka den su kemel'engka sia kanu lima ku enggu ilay ka sa mapia taman sa iami nengka den su lima nengka sia kanu takilidan ku. Da ka den man pendua-dua ka palitiala ka den.” 28 Nia nadtalu ni Tumas sa lekanin na “Mapulu ku enggu Kadenan ku!” 29 Na nia pidtalu nu Isa al-Masih sa lekanin na “Nalitiala ka den saguna kagina nailay aku nengka den. Mapia den a benal kanu manga taw u 'bpalitiala apia dala aku nilan mailay.”
30 Na madakel pan a manga tanda a pinggula nu Isa al-Masih sia kanu kaadapan nu 'bpamangunut sa lekanin i da den makasulat kanu nia a kitab. 31 Ugaid'a su namakasulat menem sia na inisulat asal'a makapalitiala kanu sa su Isa na sekanin su Masih a Tunggal'u Kadenan enggu asal'a sia makanggulalan kanu kasalig'u na makatalima kanu sa bagu a uyag-uyag sia kanu ingala nin.