21
Kanu ulian nu entu na mibpapayag 'bpaluman su Isa al-Masih kanu 'bpamangunut sa lekanin lu kanu lanaw nu Tibirias.a Na maya ba i nanggula. 2 Kanu entu ba na nangatimu si Simiun Pitru, si Tumas a bedtuan sa Leping enggu si Nataniel a taw sa Kana a sakup'a Galili apeg'u manga wata ni Zabidi enggu su dua kataw pan a 'bpamangunut kanu Isa al-Masih. 3 Na nia pidtalu ni Simiun Pitru kanilan na “Manginseda aku pan.” Nia nilan pidtalu na “Munut kami sa leka.” Na nageda silan sa awang ka ginemanat silan ugaid'a kanu nalalamagan na da a benal nakua nilan a seda.4 Na kanu kinagkapita na midtindeg su Isa al-Masih lu kanu adteban ugaid'a da sekanin makilala nu 'bpamangunut sa lekanin. 5 Na nia nin pidtalu kanilan na “Manga dua na suled, aden nakua nu a seda?” Nia nilan inisumpat na “Da.” 6 Nia pidtalu nu Isa al-Masih kanilan na “Iulug'u i ambit'u a nan san tampal sa kawanan na awang'u ka makakua kanu.” Na iniulug'ilan mambu su ambit'ilan na da ka pan ba ka di nilan den 'gkagaga penggandel su ambit'ilan sabap kanu kadakel'u seda.
7 Guna su maitu na su 'bpagunut a ipegkalimu nu Isa al-Masih na pidtalu nin kani Pitru i “Su Mapulu i entu.” Na kanu entu ba na da makambanggala si Simiun Pitru. Na endaw i kinakineg'in sa su Mapulu i entu na mimbanggala ka tinemibpu lu kanu ig ka pebpawangan nin. 8 Na su ped mambu a 'bpamangunut na linemu bun silan a inipatundan nilan bu kanu awang'ilan su ambit'ilan a napenu na seda kagina dikena bun gaid mawatan su adteban ka siyawpulu kamitru bu i kawatan nin.
9 Guna silan makatepad na nailay nilan i pembaga den su uling a nabetadan den na seda enggu aden bun pan. 10 Nia pidtalu nu Isa al-Masih kanilan na “It'u sia i kaped kanu nakua nu a seda.” 11 Daka sinemampaw si Simiun Pitru lu kanu awang ka ginandel'in su ambit a napenu na mangasela a seda ka initepad'in. Na nia kadakel'u manga seda a entu na magatus enggu limapulu enggu telu. Na apia maitu su kadakel'u manga seda a entu na da bun makisi su ambit. 12 Na nia pidtalu nu Isa al-Masih kanilan na “Sia kanu ka edtilagad kanu.” Na katawan nilan i sekanin su Mapulu na 'gkalilinian nilan sekanin mangingidsa u saben-sabenal a entain ba sekanin ugaid'a dala isa bu a nakatika lun midsa. 13 Na sinemupeg su Isa al-Masih ka kinua nin su pan enggu su seda ka inenggay nin kanilan. 14 Na iganat kanu kinapambibiag lun 'bpaluman na nia den ba i ikatelu a kinabpapayag'u Isa al-Masih kanu 'bpamangunut sa lekanin.
15 Guna su nakapasad den silan edtilagad na inidsan nu Isa al-Masih si Simiun Pitru sa “Simiun a wata ni Yuhan, su kapegkalimu nengka sa laki na lawan pan kanu kapegkalimu nilan?” Nia inisumpat'i Pitru sa lekanin na “Uway, Mapulu. Katawan nengka i ipegkalimu ku seka.” Nia pidtalu nu Isa al-Masih sa lekanin na “Pakan ka su manga bili-bili ku a pipis.” 16 Na inidsan menem sekanin 'bpaluman nu Isa al-Masih sa “Simiun a wata ni Yuhan, benal a ipegkalimu aku nengka?” Nia inisumpat'i Pitru sa lekanin na “Uway mambu, Mapulu. Katawan nengka i ipegkalimu ku seka.” Nia menem pidtalu nu Isa al-Masih sa lekanin na “Tuganul ka su manga bili-bili ku.” 17 Na inidsan nin menem sekanin sa “Simiun a wata ni Yuhan, saben-sabenal a ipegkalimu aku nengka?” Na nia den ba i ikatelu a kinaidsa nin lun. Na sinemegad su manggiginawa ni Pitru sabap sa nakatelu den idsai nu Isa al-Masih sa “Ipegkalimu aku nengka?” Na nia nakasumpat'i Pitru na “Mapulu, 'gkatawan nengka bun su langun. Katawan nengka i ipegkalimu ku seka.” Nia pidtalu nu Isa al-Masih sa lekanin na “Pakan ka su manga bili-bili ku. 18 Na kanu manguda ka pan na seka i pembalud kanu pakut'engka enggu 'bpelalakaw ka sa apia endaw i kiug'engka. Ugaid'a saben-sabenal a pedtalun ku sa leka i sa kagkatua nengka na betelen nengka su lima nengka enggu salakaw den a taw i malud sa leka taman sa iten ka nin sa dalepa a di nengka 'gkalilinian.” 19 Pidtalu nu Isa al-Masih i entu ka pinakatawan nin i maitu ba i ukit a kaimatay kani Simiun Pitru a makapayag'in su sigay nu Kadenan. Na kanu kinadtalu nin sa entu na pidtalu nin kani Pitru i “Unut ka sa laki.”
20 Na kanu kinalengi ni Pitru na nailay nin i pedtundug su 'bpagunut a ipegkalimu nu Isa al-Masih. Na sekanin su 'bpagunut a sinemandang masupeg kanu laleb'u Isa al-Masih kanu kapenggabi nilan ka minidsa lun sa “Mapulu, entain i temipu sa leka?” 21 Na endaw i kinailay ni Pitru kanu entu a 'bpagunut na nia pidtalu ni Pitru kanu Isa al-Masih na “Mapulu, sekanin, na ngin menem i manggula nin?” 22 Nia pidtalu nu Isa al-Masih sa lekanin na “Amaika kiugan ku a bibiag pamun sekanin taman sa kambalingan ku, na liu ka den sa entu. Unut ka bu sa laki.” 23 Na guna su maitu na nakalapat su bitiala kanu manga suled sa paginugut sa di matay su entu a 'bpagunut ugaid'a dikena nia pidtalu nu Isa al-Masih i di sekanin matay ka nia nin man pidtalu na “Amaika kiugan ku a bibiag pamun sekanin taman sa kambalingan ku, na liu ka den sa entu.”
24 Na entu ba su 'bpagunut a sinemulat kanu nia a kitab enggu pedsaksi lun. Na katawan nami i benal su inidsaksi nin.
25 Na madakel pan i kaped a pinggula nu Isa al-Masih. Na amaika inisulat bu langun su entu na su kalangan ku lun na di malengan sia sa dunia su manga libelu a sinulatan lun.
Wassalam