19
Guna su maitu na inipakua ni Pilatu su Isa al-Masih ka pinalebpadan nin. 2 Na su manga sundalu na minumbal silan sa sansangan a sudangen ka inisangan nilan lu kanu ulu nu Isa al-Masih enggu pimbalegkasan nilan sa lambayung a lambung. 3 Entu pan ka namangubay silan sa lekanin sa nia nilan 'bpamedtalun na “Salam sa leka, Datu nu manga Yahudi” taman sa pinanebpi nilan sekanin.4 Na linemiu menem 'bpaluman si Pilatu ka nia nin pidtalu kanilan na “Tanudi nu! Iadap ku sekanin sia sa lekanu asal'a katawan nu i dala a benal nailay ku a kadupangan nin.” 5 Na guna su maitu na iniadap'in su Isa al-Masih a nakadsansangan sa sudangen enggu nakalambung sa lambayung. Na nia pidtalu ni Pilatu kanilan na “Ilay nu den i taw a nia.” 6 Na endaw i kinailay sa lekanin nu manga mapulu nu 'bpamangurban enggu su manga tameng'u Suti a 'Bpagagaman na inilalis'ilan edtalu i “Itutuk sekanin! Itutuk sekanin kanu kayu a pinambalawaga!” Na nia pidtalu ni Pilatu kanilan na “Kua nu demun sekanin ka sekanu den i tutuk lun ka sia sa laki na dala nailay ku a kadupangan nin.” 7 Nia inisumpat'u manga Yahudi na “Aden kasuguana a nakadalem sia kanu kitab'ami a manga Yahudi na nakabpaliugat sa lekanin i matay sabap sa nia nin tinimbangan sa ginawa nin na Tunggal'u Kadenan.”
8 Endaw demun i kinakineg'i Pilatu kanu nia a kadtalu na naisegan i gilek'in. 9 Daka linemudep menem sekanin lu kanu tulugan ka inidsan nin su Isa al-Masih sa “Endaw ka besen nakabpun?” Ugaid'a da sawal su Isa al-Masih. 10 Nia pidtalu ni Pilatu sa lekanin na “Nginan ka di aku nengka pedsawalen? Di nengka 'gkatawan i aden bagel ku a makapambaya-baya ku seka udi na makapatutuk ku seka kanu kayu a pinambalawaga?” 11 Nia pidtalu nu Isa al-Masih sa lekanin na “U dikena bu su bagel a inenggay sa leka a ebpun sa sulega na dala bagel'engka sa kagkiug-kiug'engka sa laki. Sabap sa entu na su minalad sa laki sia sa leka na labi lawan pan i kadusan nin.”
12 Na iganat sa entu ba na 'bpagapasen den ni Pilatu i kapambaya-baya nin kanu Isa al-Masih ugaid'a su manga Yahudi na nia nilan ibpelalis pedtalu na “Amaika pambaya-bayan nengka i mama a nan na dikena ka pakat'u Sultan sa Ruma, ka apia entain i pandatun nin i ginawa nin na pedsungkang kanu Sultan.”b 13 Endaw i kinakineg'i Pilatu sa kadtalu nilan a entu na init'in lu sa liu su Isa al-Masih enggu nagagayan lu kanu 'bpagagayanan nu 'bpangukum a lu nakabetad kanu bedtuan sa Watu a Lama-lamac a sia sa basa a Hibru na Gabata. 14 Na su entu ba a gay na su Gay nu Kabpagadild kanu sakapadian a Kanduli nu Kalipuas sa uras a manga ikanem sa mapita.e Na nia pidtalu ni Pilatu kanu 'gkangaunutan nu manga Yahudi na “Ilay nu! Su Datu nu.” 15 Daka inilalis'ilan edtalu i “Iawa nengka den sia! Iawa nengka den sekanin ka itutuk'engka den!” Nia pidtalu ni Pilatu na “Ipapedtutuk'u sa laki su Datu nu?” Na nia inisawal'u manga mapulu nu 'bpamangurban na “Dala datu nami nia tabia na su Sultan sa Ruma.” 16 Guna su maitu na inipalad'i Pilatu kanilan su Isa al-Masih ka enggu makapatutuk.
Su Kinatutuk kanu Isa al-Masih lu kanu Kayu a Pinambalawaga
Na kinua nu manga sundalu su Isa al-Masih 17 enggu inipapusan nilan sa lekanin su pinambalawaga a kayu ka inisigkil'ilan kanu dalepa a bedtuan sa Dalepa na Takulab a Ulu, sa basa a Hibru na Gulguta. 18 Na lu nilan ba initutuk su Isa al-Masih kanu kayu a pinambalawaga. Na aden bun dua kataw a initutuk bun kanu ped a kayu a pinambalawaga, su sakataw na sia tampal kanu kawanan nu Isa al-Masih, su sakataw menem na sia tampal kanu biwang'in.
19 Na si Pilatu na minumbal sa karatula a nia nin lun inisulat na “Si Isa a taw sa Nasarit, su Datu nu manga Yahudi” ka inipabetad'in lu kanu kayu a pinambalawaga. 20 Su nia a karatula na madakel i nakabatia lun a manga Yahudi kagina masupeg kanu siudad su tinutukan kanu Isa al-Masih enggu su karatula a entu na nia kinasulat lun na basa a Hibru, Latin enggu Grik. 21 Kagina ka maitu na su manga mapulu nu 'bpamangurban nu manga Yahudi na nia nilan 'bpamedtalun kani Pilatu na “Dikena man ‘Datu nu manga Yahudi’ i dait a isulat'engka san ka nia man dait a isulat'engka san na ‘Nia nin pedtalun na saki su Datu nu manga Yahudi.’ ” 22 Nia inisumpat'i Pilatu na “U ngin i nakasulat ku san na entu den ba.”
23 Guna su nakatutuk den nu manga sundalu su Isa al-Masih na linuwasan nilan sa balegkas ka pimbad-bad'ilan sa pat bad, uman i sakataw a sundalu na sabad. Na kinua nilan bun su lambung'u Isa al-Masih a dala panay nin ka inaul iganat sa baba taman sa pulu. 24 Daka nia pidtalu nu uman i isa kanilan na “Di tanu i nia mambad ugaid'a embunuta tanu ka enggu tanu katawan u entain i makakua lun.” Su nia a pinggula nu manga sundalu na natuman su nakadalem kanu kitab a
“Pembad-baden nilan su balegkas ku
enggu pembunutan nilan su lambung ku.”f
25 Na kanu entu ba mambu na pedtindeg su ina nu Isa al-Masih lu masupeg kanu tinutukan sa lekanin. Lu bun ba su suled'u ina nin a babay enggu si Mariam a kaluma ni Kulupas apeg'i Mariam a taw sa Magdala. 26 Guna mailay nu Isa al-Masih su ina nin enggu su ipegkalimu nin a 'bpagunut sa lekanin a pedtindeg bun lu ba na nia nin pidtalu kanu ina nin na “Ina, ilay ka! Sekanin den su wata nengka.” 27 Na nia nin menem pidtalu kanu 'bpagunut sa lekanin na “Sekanin den su ina nengka.” Na iganat kanu entu ba a kutika na su 'bpagunut na lu nin den pinagkaleben kanu walay nin su ina nu Isa al-Masih.
28 Guna su maitu na 'gkatawan den nu Isa al-Masih i natalutup den su langun. Na pidtalu nin i “Pakainem aku.” Na kanu kinadtalu nin sa nia na natuman su nakadalem kanu kitab.g 29 Saleta mambu na aden taguan a napenu na madsem a makalangut na inisumek'ilan lu su ibpangamek a pidtangkayanan sa kayuh ka inipasusup'ilan kanu Isa al-Masih. 30 Na endaw demun i kinasusup'u Isa al-Masih kanu madsem a makalangut na nia nin pidtalu na “Natalutup den.” Na mibpatumeng sekanin ka inipalad'in den su ngiawa nin.
31 Na kagina ka Gay den nu Kabpagadild na su 'gkangaunutan nu manga Yahudi na pinangeni nilan lu kani Pilatu i gesan den su ay nu manga initutuk'ilani a entu asal'a mangagan matay ka enggu nilan den maawa su manga bangkay. Pinangeni nilan i entu asal'a di matangen su bangkayj nu nakatutuk lu kanu kayu a pinambalawaga kanu Gay nu Kabpangintelenen kagina dikena kadsalilidan i entu a Gay nu Kabpangintelenen.k 32 Guna su maitu na linemu den su manga sundalu ka ginesa nilan den su ay nu sakataw apeg'u kaped'in pan a initutuk. 33 Ugaid'a guna su ipedtundug'ilan den su Isa al-Masih na nailay nilan i minatay den sekanin tembu dala nilan den magesa su ay nin. 34 Ugaid'a sinagkal'u sakataw kanu manga sundalu sa dilek su takilidan nu Isa al-Masih. Na midsambuta demun i kinaigis'u lugu enggu su ig.
35 Na su sakataw a nakailay kanu entu na inidsaksi nin su entu asal'a makapalitiala kanu bun. Benal su inidsaksi nin enggu katawan nin man i benal su pedtalun nin. 36 Ka nanggula man su nia asal'a matuman su nakadalem kanu kitab a
“Apia satiman kanu tulan nin na di magesa.”
37 Nadtalu bun kanu ped a manga ayat i
“Edsulimanen nilan su taw a entu a sinagkal'ilan.”l
Su Kinakubul kanu Isa al-Masih
38 Na kanu ulian nu entu na si Yusup a taw sa Arimatia na pinangeni nin kani Pilatu i makua nin su bangkay nu Isa al-Masih. Na si Yusup a nia na isa bun a 'bpagunut kanu Isa al-Masih ugaid'a ibpagena nin bu ka 'gkagilekan kanu 'gkangaunutan nu manga Yahudi. Na sinugutan mambu sekanin ni Pilatu sa kakua nin lun. Guna su maitu na pibpawangan nin ka kinua nin su bangkay nu Isa al-Masih. 39 Na minunut sa lekanin si Nikudimu a nananggit sa manga telupulu kakilu a pinadsimbul a kamutan a bedtuan sa mira enggu alu.m Na sekanin ba a nia su taw a linemu kanu Isa al-Masih kanu nangaipus a manga timpu sa kutika na magabi.n 40 Guna su maitu na kinua nilan den su bangkay nu Isa al-Masih ka pinutus'ilan sa mapia a manga giniso enggu binetadan nilan den kanu manga kamutan a entu a mana bun sia kanu adat-betad'u manga Yahudi sa kapegkubul. 41 Na lu kanu dalepa a tinutukan kanu Isa al-Masih na aden lu pamumulanan. Na lu kanu pamumulanan a entu na aden lu dala pamun mausal a pegkubulan. 42 Na kagina ka Gay den nu Kabpagadil'u manga Yahudi na lu nilan den ba inikubul su Isa al-Masih kagina masupeg bu lu ba.