Su Kinaadap kanu Isa al-Masih kanu Gubilnadul Pilatu
23
Daka midtindeg su langun nu mindidilimudan lu ka pinananggit'ilan su Isa al-Masih lu kanu Pilatu. 2 Na sinenditan nilan sekanin sa nia nilan pidtalu na “Nasigkem'ami su nia ba a mama a papedsibayn nin su manga taw. Pedsapalan kami nin sa kabayad sa buwis lu kanu Sultan sa Ruma enggu 'bpamagigiling sekanin sa Masih enggu datu.”3 Na inidsan sekanin nu Pilatu sa “Seka ba su Datu nu manga Yahudi?” Na nia nin inisawal na “Seka den i midtalu sa nan.” 4 Daka nia pidtalu ni Pilatu kanu manga mapulu nu 'bpamangurban enggu su madakel a taw na “Dala katawan ku a kadupangan nu mama a nia.” 5 Ugaid'a makin nilan bun ipedtegel sa nia nilan pedtalun na “Sia kanu kabpamandu nin na pakasundul'in su manga taw sa kabpangaden sa kasamukan sa lusud'u Yudia, iganat sa Galili taman den sia.”
Su Kinaadap kanu Isa al-Masih kanu Datu Hirud
6 Na guna makineg'u Pilatu su entu na inidsa nin i “Ngintu, taw sa Galili i mama a nia?” 7 Guna nin katawi i su Isa al-Masih na ebpun kanu dalepa a pegkamalan ni Datu Hirud na inipasigkil'in su Isa al-Masih lu kani Hirud, saleta na kanu entu ba a kutika na lu bun si Hirud sa Awrusalim.
8 Na sangat a nagalaw si Hirud guna nin mailay su Isa al-Masih kagina nauget'in den 'gkapaginagkay i kailay nin lun sabap sa madakel den i 'gkakineg'in pantag sa lekanin. 'Gkapaginagkay nin i makailay sekanin sa kagaipan a enggalebeken nu Isa al-Masih. 9 Na pinangingidsan sekanin nu Datu Hirud ugaid'a apia sataga na da sekanin sumpat. 10 Na su manga mapulu nu 'bpamangurban enggu su manga gulu nu pangitaban na makin nilan ipedtegel ibpelalis su kapedsendit'ilan kanu Isa al-Masih. 11 Na su Datu Hirud apeg'u manga sundalu nin na pinagumpak'ilan su Isa al-Masih. Na pinambalegkas'ilan sa matinang entu pan ka inimbalingan nilan lu kani Pilatu. 12 Na kanu entu demun ba a gay na nakabpakat su Datu Hirud enggu su Pilatu a andang a dili 'bpagayun.
Su Kinasugat sa Kawagib kanu Isa al-Masih sa Kapatay
13 Na inipatawag'u Pilatu su langun nu manga mapulu nu 'bpamangurban enggu su 'gkangaunutan nu manga Yahudi taman kanu manga taw 14 sa nia nin pidtalu kanilan na “Pinananggit'u sa laki su nia a mama ka pedtalun nu i papedsibayn nin su manga taw. Na pinangingidsan ku sekanin san kanu adapan nu, na dala 'gkailay ku lun a kawagiban sekanin kanu manga ipedsendit'u lun. 15 Na maitu bun si Datu Hirud, da bun nailay nin lun a makawagib sa lekanin. Tembu pinambalingan nin sia sa lekitanu. Nia ba i ilay nu na da nanggalebek'u mama a nia a sabapan a kaimatay lun. 16-17 Na makin palebpadan ku bu sekanin ka paulin ku den.” 18 Ugaid'a nia ibpelalis'u manga taw na “Itutuk'engka i mama a nan! Nia ka paliu na si Barabas!” 19 Na si Barabas a nia na nabilanggu sabap kanu kabpagatu nin kanu gubilnu kanu siudad enggu nakapatay sekanin.
20 Na kagina ka nia 'gkalinian nu Pilatu na butawanan su Isa al-Masih na inimbitiala nin 'bpaluman su manga taw. 21 Ugaid'a nia nilan bun ibpelalis na “Itutuk'engka! Itutuk'engka!”
22 Na pidtalu menem 'bpaluman ni Pilatu sa kanu ikatelu den i “Enduken, ngin i kadaluakan a pinggula nin? Dala katawan ku lun a imatay sa lekanin! Na palebpadan ku bu ka butawanan ku den.” 23 Ugaid'a makin ibpelalis sa matanug'u madakel a taw i “Dait a itutuk'engka sekanin!” Na su kabpelalis'ilan bu i 'gkakineg. 24 Tembu sinugutan den ni Pilatu su kiug'ilan. 25 Na pinaliu nin su mama a entu a minatu sa gubilnu enggu nakapatay ugaid'a su Isa al-Masih menem na inipalad'in kanu manga taw a entu sa endaw den i kiug'ilan lun.
Su Kinatutuk kanu Isa al-Masih
26 Guna su 'bpagiten den su Isa al-Masih kanu pedtutukan lun na nadsumbak'ilan su mama a taw sa Sairin a bedtuan sa Simiun a 'bpagukit lu ebpun kanu 'bpangangawidan. Na sinigkem sekanin nu manga sundalu ka inipapamusay nilan lun su kayu a pinambalawaga a ipedtundug'in bun kanu Isa al-Masih. 27 Na madakel i taw a midtatanggunut lun. Na su manga babay na 'bpamanguliang enggu penggagawan silan kanu Isa al-Masih. 28 Ugaid'a linengian silan nu Isa al-Masih sa nia nin pidtalu na “Sekanu a manga babay sa Awrusalim, na di aku nu 'bpaguliangi ugaid'a nia nu uliangi na su ginawa nu enggu su manga wata nu 29 ka pakauma den su gay a edtalun nu manga taw i ‘Sangat den i kapia nin kanu manga babay a bayas atawa ka dala pan embabata enggu dala pan makapasusu.’ 30 Ka nan den ba su kutika a
‘Edtalun nu taw kanu manga palaw i “Tambaki kami nu den”
enggu edtalun nilan kanu bakulud i “Ipagena kami nu den.” ’a
31 Kagina amaika penggulan nilan i nia kanu kayu a bibiag pamun na labi lawan den kanu kayu amaika 'gkagangu den.”b
32 Na aden bun dua kataw a mama a dupang i pidtapik'ilan bun lu ka enggu nilan kaimatayan kaped'u Isa al-Masih. 33 Na guna silan makauma kanu dalepa a bedtuan sa Takulab a Ulu na initutuk'ilan kanu kayu a pinambalawaga su Isa al-Masih kaped'u dua kataw a entu a dupang. Na su sakataw na tampal kanu kawanan nu Isa al-Masih enggu su sakataw menem na tampal kanu biwang'in. 34 Na nia pidtalu nu Isa al-Masih na “Ama ku, ampun ka su manga taw a nia ka natalatantu i di nilan 'gkatawan u ngin i penggulan nilan a nia.” Na pimbad-bad'ilan su manga balegkas'in sa ukit a kinambunuta.
35 Na su manga taw lu a 'bpamedtindeg na 'bpamedtulik bu. Saleta na su 'gkangaunutan nu manga Yahudi na 'bpagumpaken nilan su Isa al-Masih sa nia nilan 'bpamedtalun na “Ibpelipuas'in kun su ped a taw. Na amaika sekanin su Masih a pinamili nu Kadenan na ilipuas'in su ginawa nin.” 36 Na 'bpagumpaken bun sekanin nu manga sundalu enggu 'bpagenggan nilan sa madsem a makalangut 37 sa nia nilan pedtalun na “Amaika seka su Datu nu manga Yahudi na ilipuas'engka su ginawa nengka.” 38 Na aden inibetad'ilan a karatula lu kanu pulu nu ulu nin a nia lun nakasulat na “Nia ba su Datu nu manga Yahudi.”
39 Na isa kanu manga mama a entu a dupang a initutuk i pinagumpak'in su Isa al-Masih sa nia nin pidtalu na “Dikena ba seka su Masih? Ilipuas'engka su ginawa nengka apeg'ami.” 40 Ugaid'a dinaway sekanin nu kaped'in sa nia nin pidtalu na “Nginan, di nengka ipegkagilek su Kadenan? Pagidsan ta bun sekanin a pedsiksan. 41 Na sabap kanu manga kadupangan a pinggula ta na wagib bun sa lekita su nia a kasiksan ugaid'a su mama a nia na dala pinggula nin a mawag.”
42 Daka nia nin pidtalu kanu Isa al-Masih na “Isa, 'gkalendem aku bu amaika endatu ka den.” 43 Na nia inisumpat'u Isa al-Masih sa lekanin na “Saben-sabenal a edtalun ku sa leka i saguna bun ba a nia na maped aku nengka lu sa sulega.”
Su Kinapatay nu Isa al-Masih
44 Na guna su mangagan den maudtu na nakatekaw demun migkalibuteng kanu lusud'u inged taman sa ikatelu a uras sa malulem 45 ka migkalibuteng su senang. Na su kurtinac nu Suti a 'Bpagagaman na naupak sa luk. 46 Saleta mambu na nakalalis su Isa al-Masih sa matanug sa “Ama ku, ipalad ku den sa leka su ngiawa ku.” Na entu pan ka napandus su napas'u Isa al-Masih.
47 Guna mailay nu kapitan nu sundalu su entu a nanggula na napugi nin su Kadenan sa nia nin nadtalu na “Saben-sabenal a ikelas i mama a nia.” 48 Na guna mailay nu manga taw a nangalimud lu a 'bpagilay kanu entu ba a 'gkanggula na namanguli silan a 'gkapanampak'ilan su laleb'ilan sa kapegkalidu na ginawa nilan. 49 Na su langun nu nakakilala kanu Isa al-Masih enggu su manga babay a minunut lun ganat sa Galili na pedsandeng sa lekanin. Na nailay nilan su langun nu entu.
Su Kinakubul kanu Isa al-Masih
50-51 Na aden Yahudi a mama a taw sa Arimatia a bedtuan sa Yusup. Matidtu sekanin enggu ikelas. Isa bun sekanin a 'bpagangat kanu kandatu nu Kadenan. Na apia isa sekanin kanu 'bpamangukum lu na dala sekanin makaayun kanu kinaimatay kanu Isa al-Masih. 52 Na linemu kani Pilatu ka pinangeni nin su bangkay nu Isa al-Masih. 53 Daka inibaba nin su bangkay nu Isa al-Masih ka pinutus'in sa mapia a ginis ka inikubul'in lu kanu da pamun kakubuli a liningkaban a watu a mana takub. 54 Na su entu a gay na Gay na Kabpagadil'u manga Yahudi ka 'gkauma den su Gay nu Kabpangintelenen nilan.
55 Su manga babay a entu a minunut kanu Isa al-Masih ebpun sa Galili na midtatanggunut silan kanu Yusup ka inilay nilan u endaw ipegkubul su Isa al-Masih enggu panun i kapegkubul kanu bangkay nin lu. 56 Entu pan ka minuli silan ka nagadil silan sa embalang-balang a mamut a lana a ipedsapu kanu bangkay. Na guna mauma su Gay nu Kabpangintelenen na nangintelenen pan silan sia luyud kanu inisugu sia kanu kitab.