Su Katipu kanu Isa al-Masih
22
Kanu entu a kutika na pedsiken den su Kanduli nu Pan a Dala Pakembang'ina a bedtuan bun sa Kanduli nu Kalipuas. 2 Na su manga mapulu nu 'bpamangurban enggu su manga gulu nu pangitaban na 'bpangilay sa ukit sa kaimatay nilan kanu Isa al-Masih sa di katawan nu manga taw ka 'gkagilekan silan kanilan.3 Saleta mambu na si Yahuda a bedtuan sa Iskalia na inasukan nu Datu na Giadsal, isa bun sekanin kanu sapulu enggu dua a pinamili nu Isa al-Masih. 4 Na linemu sekanin kanu manga mapulu nu 'bpamangurban enggu lu kanu manga mapulu nu pedtameng kanu Suti a 'Bpagagaman ka pinagitung'ilan u panun i katipu nin kanu Isa al-Masih lu kanilan. 5 Na napia a benal i ginawa nilan sa entu taman sa pibpasadan nilan si Yahuda sa enggan nilan sa kuleta. 6 Na minayun mambu si Yahuda sa kanu entu taman sa linemudsu den mambu sekanin mangilay sa mapia a kutika a katipu nin kanu Isa al-Masih sa da gaid makailay lun.
7 Na kanu gay a kapegkan kanu pan a dala pakembang'in enggu su gay a dait a kapegkurban sa manguda a bili-bili a Kanduli nu Kalipuas 8 na sinugu nu Isa al-Masih si Pitru enggu si Yuhan sa nia nin pidtalu kanilan na “Ganat kanu den ka pagadil kanu sa pegken tanu kanu nia a Kanduli nu Kalipuas.” 9 Na inidsa nilan kanu Isa al-Masih i “Endaw nengka kiugan a makapagadil kami sa entu a Kanduli?”
10 Na nia nin pidtalu na “Nia nu enggula, na kanu kauma nu lu kanu siudad na aden lu mama a madsumbak'u a aden 'bpananggiten nin a binangga a aden ig'in. Na unut kanu sa lekanin ka endaw i ludepan nin a walay 11 na edtalu nu kanu kigkuan kanu walay i ‘Ibpagidsa nu Gulu u endaw kun i bilik a kakanan nin kanu Kanduli nu Kalipuas kaped'u 'bpamangunut sa lekanin.’ 12 Na ipailay nin sa lekanu su maulad a bilik lu sa pulu a aden den langun-taman nin. Na lu nu den ba adil su pegken tanu.”
13 Na linemu den mambu silan taman sa natun nilan su langun nu entu a mana bun su pidtalu nu Isa al-Masih. Daka inadil'ilan den lu ba su pegken nilan kanu Kanduli nu Kalipuas.
Su Kapegkan kanu Kanduli nu Kalipuas
14 Guna su nauma den su kutika nu kakan nilan na nagagayan den su Isa al-Masih enggu su pinamili nin a 'bpamangunut lun. 15 Na nia nin pidtalu kanilan na “Sangat a napanganganay ku i makapamagatuang tanu keman kanu nia a Kanduli sa unan na di aku pan malasay. 16 Na nia ku madtalu sa lekanu na di aku den keman sa maya ba a kanduli taman sa di matuman su maena nu nia lu kanu kapendatu nu Kadenan.”
17 Na kinemua su Isa al-Masih sa tagayan a aden ig'a ubas'in ka midsukul-sukul sekanin enggu nia nin pidtalu kanu 'bpamangunut lun na “Kua nu i nia ka pamaginemai nu. 18 Na edtalun ku sa lekanu i iganat saguna na di aku den minem 'bpaluman sa ig'a ubas taman sa di mauma su kutika na kapendatu nu Kadenan.”
19 Na kinemua bun sa pan enggu midsukul-sukul sekanin entu pan ka pidtebi-tebi nin ka inenggay nin kanu 'bpamangunut lun sa nia nin pidtalu na “Nia ba su badan ku a ipenggihad ku sabap sa lekanu. Na enggula nu su nia ba a ukit a tademan sa laki.”
20 Na maitu bun ba i pinggula nin kanu tagayan a aden ig'a ubas'in kanu kinapasad'ilan gemabi ka pidtalu nin i “Su tagayan a nia na nia ba su lugu ku a minalut kanu bagu a kapasadan nu Kadenan a ipatuga sabap sa lekanu. 21 Ugaid'a ilay nu ka su temipu sa laki na ibpamagatuang tanu bun kanu nia ba a pegkanan. 22 Na su Kadenan i migkahanda sa dait a matay su Kaka nu Manusia ugaid'a duan-duan nin den su taw a temipu sa lekanin.” 23 Na nakapamagidsaya silan u entain i makatika sa kanilan enggula sa entu.
Su Badtug sa Langun sia kanu Kapendatu nu Kadenan
24 Guna su maitu na mibpapalawa su 'bpamangunut lun u entain kanilan i badtug sa langun. 25 Na nia pan pidtalu nu Isa al-Masih kanilan na “Su manga datu nu manga bangsa na sangat a pendatuan nilan su manga taw nilan. U aden bagel'u 'gkaunutan na nia nilan kalilinian na kagelalan silan sa 'bpananabangan. 26 Ugaid'a dikena kanu maitu, nia pan mula na su entain i badtug sa lekanu na dait a ibaba nin i ginawa nin enggu su mapulu menem na dait a mabaluy a panunugun. 27 Entain ba man i badtug, su 'bpagagayan kanu lamisan atawa ka su 'bpanalagad? Dikena ba su 'bpagagayan? Ugaid'a saki na kaped aku nu a 'bpanalagad. 28 Sekanu na dala aku nu pitasa apia kanu timpu nu kamalasayan ku. 29 Kagina ka maitu na ibpagenggay ku sa lekanu su kakamal a mana bun su kinaenggay sa laki lun nu Ama ku 30 ka enggu sekanu i maped ku keman enggu minem kanu kandatu ku taman sa magagayan kanu bun kanu manga kulesi ka enggu nu makukum su sapulu enggu dua a tupu nu Israil.
Su Kinadtalu nu Isa al-Masih pantag kanu Kakias'i Simiun Pitru sa lekanin
31 “Seka Simiun, pakikineg ka! Pinangeni nu Datu na Giadsal i batalun kanu nin a mana bun su kapapembayug kanu bantad a pakadsenggaya su matimegas enggu su ukap. 32 Ugaid'a seka Simiun na inipangeni-ngeni ku seka sa di maawa su salig'engka. Na su kasangul'engka 'bpaluman sa laki na seka i mapagkabagel kanu salig'u manga suled'engka sa paginugut.” 33 Na nia inisumpat'i Simiun na “Mapulu, adil aku sa kaunut ku sa leka lu sa bilangguan apia nia nin kaaden i matay aku a kaped'engka.” 34 Na nia pidtalu sa lekanin nu Isa al-Masih na “Nia ku madtalu sa leka Pitru na bagu kemuku su manuk a kalasan sa kanu nia bun ba a magabi na makatelu aku nengka makakias sa di aku nengka katawan.”
Su Kapagadil'u 'Bpamangunut kanu Isa al-Masih
35 Na nia pan pidtalu nu Isa al-Masih na “Su timpu a kinasugu ku sa lekanu a dala nadtatanggit'u a 'bpanaguan sa kuleta atawa ka apia ngin a taguan, maitu bun i ampis'a ay, na ngintu, migkulang kanu kanu manga nasisita nu?” Na nia nilan nakasumpat na “Dala.” 36 Na nia menem pidtalu nu Isa al-Masih kanilan na “Ugaid'a saguna na apia entain i aden 'bpanaguan nin sa kuleta atawa ka apia ngin a taguan na pananggiten nin enggu apia entain i dala kiping'in na 'bpasan nin su lambung'in ka mamasa sa satiman. 37 Ka matuman den sa laki su nakadalem kanu kitab a ‘Iluyud sekanin kanu manga taw a dupang,’b ka u ngin man i nakasulat pantag sa laki na matuman su entu.” 38 Na nia inisumpat'u 'bpamangunut lun na “Mapulu, ilay ka! Aden den a nia dua timan a kiping!” Na nia menem inisumpat'u Isa al-Masih kanilan na “Telenan tanu pan i nan a bitiala!”
Su Kinapangeni-ngeni nu Isa al-Masih lu sa Palaw nu Ulibus
39 Na linemiu menem su Isa al-Masih kanu Awrusalim ka linemu kanu Palaw nu Ulibus a mana bun su katatapan a penggulan nin. Na minunut bun sa lekanin su 'bpamangunut lun. 40 Guna su nakauma den silan lu na nia nin pidtalu kanu 'bpamangunut lun na “Pangeni-ngeni kanu ka enggu di kanu masasat.” 41 Na tinemangka sekanin kanilan sa paidu ka sinemugiud ka nangeni-ngeni 42 sa nia nin pidtalu na “Ama ku, amaika mapakay bu sa leka na iawa nengka pan sa laki su kamalasayanc a nia a pakatingguma sa laki. Ugaid'a apia ka maitu na dikena su kiug'u ginawa ku i kaunutan ka su kahanda nengka i matuman.” 43 Daka mibpapayag sa lekanin su malaikat a ganat sa sulega ka pinagkabagel'in su manggiginawa nin. 44 Na sabap kanu sangat a kapegkalidu na ginawa nin na nangeni-ngeni sekanin sa tidtu-tidtu taman sa minigis su ating'in a mana lugu a pedtagatak kanu lupa.
45 Na guna sekanin makapasad mangeni-ngeni na mimbalingan lu kanu 'bpamangunut lun. Na nauman nin silan a 'bpamedtulug sabap sa 'gkalidu a benal i ginawa nilan. 46 Na nia nin pidtalu kanilan na “Nginan ka 'bpamedtulug kanu? Gedam kanu ka pangeni-ngeni kanu ka enggu di kanu masasat.”
Su Kinasigkem kanu Isa al-Masih
47 Na pedtalu pamun su Isa al-Masih na nakauma su madakel a taw a nia nilan naunutan na si Yahuda a isa kanu sapulu enggu dua a pinamili nin. Na inubay ni Yahuda su Isa al-Masih ka sinium'in.d 48 Daka nia pidtalu nu Isa al-Masih sa lekanin na “Ngintu, su kinasium'engka kanu Kaka nu Manusia na namba i ukit a kapedtipu nengka lun?”
49 Na guna madsusuliman nu 'bpamangunut lun su 'gkanggula na nia nilan pidtalu kanu Isa al-Masih na “Mapulu, matu tanu?” 50 Na isa kanu 'bpamangunut i tinimbas'in su ulipen nu mapulu sa langun nu 'bpamangurban. Na nia nasugat na su kawanan a tangila nin taman sa nakabpitas su entu. 51 Na pidtalu nu Isa al-Masih kanilan i “Telen kanu san!” Na inipu nin su tangila nu mama na midsambuta demun i kinaulit'u tangila nu mama a entu.
52 Daka nia pidtalu nu Isa al-Masih kanu manga mapulu nu 'bpamangurban enggu su manga mapulu nu pedtameng sa Suti a 'Bpagagaman taman kanu 'gkangaunutan nu manga Yahudi a pedsigkem lun na “Nginan, ribildi aku ka sinemia kanu a minit pan sa manga sundang enggu manga ibpametay sa kasigkem'u sa laki? 53 Uman gay na kaped aku nu bun lu kanu Suti a 'Bpagagaman na di aku nu bun pedsigkemen. Ugaid'a lekanu i nia a kutika a nia pendatu na su kalibutengan.”
Su Kinakias'i Simiun Pitru kanu Isa al-Masih
54 Daka sinigkem'ilan su Isa al-Masih ka pinananggit'ilan lu kanu tulugan nu mapulu sa langun nu 'bpamangurban. Saleta mambu na pedtatanggunut bun si Pitru ugaid'a lu bu sa mawatan. 55 Daka aden manga taw a minumbal sa tumeg lu kanu luk'u lama-lama nu tulugan nu mapulu sa langun nu 'bpamangurban ka lu ba silan namagagayan kanu ligid'in, na minamung mambu si Pitru magagayan lu ba. 56 Guna sekanin madsusuliman nu isa kanu panunugun a babay na nia nin pidtalu na “Su mama a nia na kaped bun nu taw a nan a nasigkem.” 57 Ugaid'a inikias'i Pitru sa nia nin pidtalu na “Bai, di ku sekanin katawan!”
58 Na da matana-tana na aden menem mama a nakadsima sa lekanin sa nia nin pidtalu na “Isa ka bun kanilan!” Ugaid'a nia pidtalu ni Pitru na “Saben-sabenal a dikena aku nilan kaped.”
59 Na manga sakauras i naipus na aden menem mama a ipedtegel'in i “Natalatantu i su nia a mama na isa bun kanilan kagina taw bun sa Galili.” 60 Nia pidtalu ni Pitru na “Di ku katawan i pedtalun nengka a nan!” Na pedtalu pamun si Pitru na kinemuku su manuk a kalasan. 61 Na linengian sekanin nu Mapulu a su Isa al-Masih. Na nagkalendem'in su pidtalu nin sa lekanin a “Bagu makakuku su manuk a kalasan na makatelu aku nengka den makakias.” 62 Na linemiu si Pitru ka sangat a nakapaguguliang sa kinalidu na ginawa nin.
Su Kinapagumpak kanu Isa al-Masih enggu su Kinapametay lun
63 Na su manga mama a pedtameng kanu Isa al-Masih na pinagumpak'ilan sekanin enggu pinametay nilan. 64 Dinapengan nilan su mata nin ka inidsan nilan sa “Amaika seka su Masih na edtalu ka sa lekami u entain i 'bpametay sa leka?” 65 Na madakel pan i pidtalu nilan sa ukit a kapapegkaya nilan lun.
Su Kinadsaksi nu Isa al-Masih
66 Guna su mapita den na su 'bpamangukum a lusud den lu ba su manga mapulu nu 'bpamangurban enggu su manga gulu nu pangitaban na mindidilimudan silan ka pinaadap'ilan su Isa al-Masih lu kanilan. 67 Ka inidsan nilan sa “Edtalu ka sa lekami, seka ba su Masih?” Nia nin inisumpat na “Amaika edtalun ku sa lekanu na di kanu bun maginugut 68 enggu amaika aden idsa ku sa lekanu na di kanu bun semumpat. 69 Ugaid'a iganat saguna na su Kaka nu Manusia na magagayan kanu tampal sa kawanan nu Kadenan a Barakat sa Langun.” 70 Na langun nilan na midtalu sa “Amaika maitu na seka ba su Tunggal'u Kadenan?” Na nia nin inisumpat kanilan na “Benal su pedtalun nu a nan.” 71 Nia nilan menem pidtalu na “Di tanu den nasisita i ped pan a amadan ka nakineg tanu demun kanu ngali nin.”