11
Saki i ilingi nu a mana su kabpagiling ku kanu Isa al-Masih.Su Kapedtendung
2 Na 'gkapamedta ku sekanu kagina tatap aku nu 'gkagkalendem enggu ipenggulalan nu su manga panduan a inipamandu ku sa lekanu. 3 Ugaid'a dait a katuntayan nu i nia ulu nu mama na su Isa al-Masih enggu su mama menem na ulu nu babay. Na su Kadenan menem i ulu nu Isa al-Masih. 4 Na apia entain a mama i mangeni-ngeni atawa ka mayag kanu kadtalu nu Kadenan a aden tanggub'a beneng'ina na pakapagkaya nin su ulu nin a su Isa al-Masih. 5 Ugaid'a apia entain menem a babay i mangeni-ngeni atawa ka mayag kanu kadtalu nu Kadenan a dala makadtendung na pakapagkaya nin su ulu nin a su mama. Na mana bun sekanin midtabungaw. 6 Kagina amaika su babay ka di edtendung na nia tinemu i mapatabungaw den. Ugaid'a kayayan kanu babay u mapatebped atawa ka mapatabungaw sa buk tembu ba nia dait na edtendung su babay. 7 Ugaid'a su mama na di dait a edtanggub sa benenga kagina sekanin su alung-alung'u Kadenan enggu sigay nin. Na su babay menem i sigay nu mama. 8 Na dikena ebpun kanu babay i kinapangaden kanu mama ka su babay i pinangaden ebpun kanu mama 9 enggu dikena bun sabap kanu babay i kinapangaden kanu mama ka su babay i pinangaden sabap kanu mama. 10 Na entu ba i sabap'in i dait a edtendung su babay ka enggu mailay nu manga malaikat i napasakup sekanin.
11 Ugaid'a babay-mama a lusud sia kanu Isa al-Masih na nasisita nilan i uman i isa kanilan. 12 Ka amaika su babay ka ebpun kanu mama na su mama menem na pimbata nu babay.b Ugaid'a su langun-langun na ebpun kanu Kadenan. 13 Sekanu den i mataw lun edtimbang-timbang u ngintu, mapia a 'bpagilayn su babay a 'bpangeni-ngeni kanu Kadenan a da makadtendung? 14 Na 'gkatawan tanu bun i sia kanu kinapangaden na nakadanden kanu mama i di dait a mapagkalendu sa buk ka kayayan i entu sa lekanin. 15 Ugaid'a su babay na amaika malendu i buk'in na badtugan i entu sa lekanin kagina inenggay sa lekanin su buk a makatanggub kanu ulu nin. 16 Na amaika aden pegkiug 'bpamalaw sa entu na da den madtalu ku ka sia sa lekami taman den kanu langun nu umpungan nu 'bpamaginugut kanu Kadenan sa kanu apia endaw a dalepa na maya ba i ukit'ami.
Su Dait a Atulan kanu Kapegkalendem kanu Kinanggihad'u Isa al-Masih kanu Umul'in
17 Na makapantag menem sa temundug a nia a pembitialan ku sa lekanu na di ku sekanu mapamedta kagina su kapendidilimudan nu sa kapedsimba kanu Kadenan na dikena den nakagkapia ka makin nakagkawag sa lekanu. 18 Kagina napanudtul sa laki i uman kanu pendidilimudan sa kapedsimba kanu Kadenan na pedsesenggaya kanu. Na sia sa laki na mana aden kabenal'in su entu. 19 Na aden a entu, na nasisita a manggula su entu ka enggu 'gkatawan u entain ba sa lekanu i tidtu a 'bpaginugut. 20 Na uman kanu pendidilimudan na dikena nia nu pakanggulalan su kapegkan sa kapegkalendem kanu kinanggihad'u Isa al-Masih kanu umul'inc 21 kagina u 'gkauma su kutika nu kapegkan sa entu na dikena kanu pedsasalengan. Tembu ba su ped na 'gkangalangut den sa kabpaginum'ilan ugaid'a su ped menem na 'gkangagutem a benal. 22 Na ngintu, dala manga walay nu a kakanan nu enggu kaineman nu? Su penggulan nu a nan na 'gkaawan nu sa alaga su umpungan nu 'bpamaginugut kanu Kadenan enggu pakapagkaya nu su manga taw a dala 'gkagaga nin. Na dait ba a pamedtan ku sekanu kanu namba a penggulan nu? Di ku sekanu mapamedta sa nan.
23 Nia ba su panduan a natalima ku kanu Mapulu a inipamandu ku sa lekanu. Na kanu magabi a tipun su Mapulu a su Isa al-Masih na kinemua sa pan. 24 Na endaw i kinadsukul-sukul'in lun kanu Kadenan na pidtebi-tebi nin su entu ka nia nin pidtalu na “Nia ba su badan ku a ipenggihad ku sabap sa lekanu. Na enggula nu su nia ba a tademan nu sa laki.” 25 Na kanu kinapasad'ilan gemabi na maitu bun ba i pinggula nin, kinemua sa tagayan ka nia nin pidtalu na “Su tagayan a nia na sia ba su lugu ku a minalut kanu bagu a kapasadan nu Kadenan. Na uman kanu minem sa maya ba, na enggula nu su entu a tademan nu sa laki.” 26 Ka uman kanu keman enggu minem sa entu ba na pakapayag'u su kinapatay nu Mapulu taman sa kanu kambalingan nin.
27 Na kagina ka maitu na apia entain i keman kanu pegken nu Mapulu enggu minem kanu 'bpaginemen nin sa dikena dait a keman enggu minem sa entu na pakandusa sabap sa di nin 'gkapagadatan su badan enggu su lugu nu Mapulu. 28 Tembu ba dait a ilayn muna nu taw su ginawa nin bagu keman enggu minem sa entu. 29 Kagina apia entain i keman enggu minem sa entu sa di nin 'gkaenggan sa kapantag su badan nu Mapulud na kasiksan i makatingguma sa lekanin 30 tembu ba su ped sa lekanu na mangalubay, pendadalu enggu 'bpamebpatay. 31 Ugaid'a amaika ilayn muna nu uman i isa su ginawa nin na di nin matala su entu. 32 Ugaid'a amaika papedtalan tanu nu Kadenan sa bataluan na nia nin maena na papedtidtun tanu nin ka enggu di tanu den makalalagit masiksa kanu manga taw a dikena 'bpaginugut sia sa dunia.
33 Kagina ka maitu manga lusud ku sa tian, na amaika endidilimudan kanu sa kapegkan kanu pegken a tademan kanu kinanggihad'u Isa al-Masih kanu umul'in na pamagangataya kanu. 34 Na apia entain i 'gkangagutem sa lekanu na keman muna lu kanu manga walay nin ka enggu sia kanu kandidilimudan nu na dikena nia nin kabpawangan i kasiksan sa lekanu. Na makapantag menem kanu ped pan a dait a pengguguden san sa lekanu na guguden ku bu amaika makasan aku.