Ikadua a Sulat kanu Manga Taw sa Kurintu
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na bedtuan sa Ikadua a Sulat'i Bulus kanu Manga Taw sa Kurintu. Lu i nia pakatumpa kanu lumpukan nu 'bpamaginugut a nakapatindeg'i Bulus kanu nangaipus a timpu.
Su kinasulat'i Bulus sa nia na lu natabu kanu prubinsia a Masidunia sia kanu pageletan nu manga lagun a 55 enggu 56 ulian nu kinambata kanu Isa al-Masih. Na kanu nia a manga timpu na aden manga kamutuan kani Bulus pantag kanu kinasugu lun nu Isa al-Masih ka nia kataw nu manga taw sa Kurintu na sabap kanu kapedtala nin sa kamalasayan sa kanu kapenggulalan nin kanu galebekan nin na pendua-dua silan u saben-sabenal a sinugu sekanin nu Isa al-Masih. Ugaid'a pinatuntayan nin kanilan i mana bun su Isa al-Masih a tinemala sa kamalasayan sa kapianan nu manga taw na maitu bun ba sekanin. Na sia kanu kapedtigkel'in kanu manga kamalasayan a 'gkatala nin na pakapailay nin su tidtu-tidtu a kabarakat'u Kadenan taman sa pakaunga sa kapianan kanilan. Nalabit'in bun sia u endaw taman i kapegkalimu nin kanu manga taw sa Kurintu enggu su sangat a kinagalaw nin kanu ngin i inipailay nilan a ula-ula kani Titus a suled sa paginugut a sinugu nin lu kanilan enggu su kabpangingalap'ilan sa kailay nilan kani Bulus.
Nakadalem bun kanu nia a sulat'in su kapedsekat'in kanu 'bpamaginugut lu sa kapangalimuan nilan atawa ka kadtabang'ilan kanu manga pakanasisita, labi lawan den kanu suled'ilan sa paginugut a 'gkangapasangan kanu prubinsia a Yudia.
Na nakadalem bun kanu nia a sulat'in su kabpaninindeg'in kanu galebekan nin enggu su kinapatuntay nin sa saben-sabenal a sinugu sekanin nu Kadenan sa apia nia nin kaaden i sia kanu kapegkailay nu ped na mababa bu sekanin a taw kumin kanu manga ped a 'bpamamandu sa dikena luyud sia kanu bantang. Sinekat'in bun su 'bpamaginugut lu sa di dait a unutan nilan su apia ngin a panduan a salakaw kanu inipamandu nin kanilan pantag kanu Isa al-Masih. Na pinangeni nin bun kanilan i paginapasen nilan i kapaguyag-uyag'ilan sa aden kalilintad'in enggu dala makatila kanilan taman sa inggulalan nilan su langun nu papata nin. Ka amaika maitu na tapiden silan nu Kadenan.