Ikadua a Sulat kanu Manga Taw sa Kurintu
Su Salam'i Bulus enggu su Kinadsukul-sukul'in
1
Salam sa lekanu. Saki si Bulus a sinugu nu Isa al-Masih sia luyud kanu kahanda nu Kadenan. Kaped ku si Timuti a lusud tanu sa tian sa paginugut. Su nia a sulat na san pakatumpa sa lekanu a lumpukan nu 'bpamaginugut kanu Kadenan sa dalepa a Kurintu taman den kanu langun na nasuti sabap kanu Isa al-Masih san sa prubinsia a Akaya. 2 San sa lekanu su da idsan nin a limu enggu su kalilintad a ebpun kanu Ama tanu a su Kadenana enggu kanu Mapulu tanu a su Isa al-Masih.3 Su Kadenan a Ama nu Mapulu tanu a su Isa al-Masih a Kadenan nin bun na sangat a pebpugin. Sekanin su Ama a sangat a malimu a lalayun papegkabagel kanu manggiginawa tanu. 4 Sekanin i papegkabagel sa lekitanu kanu langun na kamalasayan a 'gkatala tanu ka enggu tanu makapagkabagel su apia entain a pedtala sa kamalasayan a mana bun su kapapegkabagel'u Kadenan sa lekitanu. 5 Ka u ngin i kabpangiseg'u manga kamalasayan tanu sabap sa nalusud tanu kanu Isa al-Masih na maitu bun ba i kabpangiseg'u kapapegkabagel kanu manggiginawa tanu sia makanggulalan kanu Isa al-Masih. 6 Na su kapedtala nami sa kamalasayan na pakaunga sa kagkabagel'u manggiginawa nu enggu kalipuasan nu. Na maitu bun su kapapegkabagel'u Kadenan kanu manggiginawa nami na pakaunga bun sa kabagel'a manggiginawa nu ka enggu nu katigkelan su kamalasayan a 'gkangatala nu a mana bun su manga kamalasayan a 'gkangatala nami. 7 Na masela i salig'ami sa lekanu sa makatigkel kanu kagina u ngin i kapegkatala nu sa kamalasayan a mana bun su kamalasayan nami na maitu bun ba su kapapegkabagel kanu manggiginawa nu a mana bun su kapapegkabagel kanu manggiginawa nami.
8 Manga lusud ku sa tian, na di nami 'gkalinian a di nu kasabutan su manga kamalasayan a natala nami sa prubinsia a Asia.b Ka sangat man a mapasang i natala nami ka di kami den pedtika sa kapasang taman sa da den inam'ami sa mauyag kami pan. 9 Ka nia nami man kataw kanu entu na natatalanged a matay kami den. Ugaid'a nanggula su entu ka enggu di kami makasalig kanu ginawa nami ka lu kami makasalig kanu Kadenan a papembibiag kanu namamatay. 10 Sekanin i linemipuas sa lekami kanu natatalanged a entu a kapatay enggu papanalusen nin su kabpamelipuas'in sa lekami. Na pedsalig kami sa papanalusen nin i entu 11 sia kanu kadtabang'u sa lekami sia makanggulalan kanu pangeni-ngeni nu sa lekami. Na amaika maitu na madakel i makadsukul-sukul kanu Kadenan sabap kanu palihala nin sa lekami a unga nu pangeni-ngeni nu madakel a taw.
Su Kinambagu na Kahanda ni Bulus
12 Na nia nami makamamasela na 'gkatatalanged'ami sa ginawa nami i pibpia-pianan nami i ukit'ami kanu manga taw, labi lawan den sa lekanu. Na senep man sa atay nami su ukit'ami sa aden katidtu nin ebpun kanu Kadenan enggu sia luyud kanu da idsan nin a limu nu Kadenan dikena sia luyud kanu kaduduniay a ilemu. 13-14 Ka da man inisulat'ami sa lekanu a di nu 'gkabatia sa mapia enggu di nu 'gkatuntayan. Apia di kami nu pamun gaid 'gkatuntayan sa saguna a timpu ugaid'a masela i salig'ami sa lekanu sa mauma bun i gay a katuntayan kami nu sa tidtu-tidtu taman sa makamamasela kami nu a mana bun su kamamasela nami sa lekanu sia kanu kauma nu Mapulu tanu a su Isa al-Masih.
15 Na sabap sa masela i salig ku sa lekanu sa entu, na nia ku napagitung paganay na seman aku muna sa lekanu ka enggu matakep su palihala a matalima nu. 16 Kagina nia ku ba a entu kahanda na maut aku san sa lekanu sa kanu kalu ku sa Masidunia enggu su kambalingan ku menem ebpun sa Masidunia na maut aku bun san sa lekanu ka enggu aku nu kadtabangan sa kalu ku sa Yudia. 17 Na kagina ka dala makatalus su entu a kahanda ku na basi nia nu mapagitung na malemu embagu i itungan ku atawa ka pigkahanda ku su entu sia luyud kanu kamamanusiay a kapagitung ku bu a matag aku bu pedtalu sa “uway,” atawa ka “dili” inunta na dikena i entu benal. 18 Na dikena aku maitu, ka u ngin i katidtu nu Kadenan na maitu bun ba i katidtu nami sa kadtalu nami sa “uway,” atawa ka “dili.” 19 Kagina su Tunggal'u Kadenan a su Isa al-Masih a inipangusiat'ami san sa lekanu a kaped ku si Silbanuc enggu Timuti na di edtalu sa “uway” atawa ka “dili” amaika dili matuman. Ka sia man sa lekanin na “uway” man langun 20 ka apia ngin man i kadakel'a pasad'u Kadenan na matuman sia kanu Isa al-Masih. Tembu sia makanggulalan kanu Isa al-Masih na pakadtalu tanu sa “Amin” sa kapugi kanu Kadenan. 21 Na su Kadenan i papegkabagel kanu salig'ami taman kanu salig'u sia kanu Isa al-Masih. Na pinamili tanu nin 22 taman sa tiniapan tanu nin sa tanda a nalusud tanu sa lekanin ka pinalangkap'in sa lekitanu su Suti a Ruh nin a nabaluy a pamagel tanu sa tumanen nin su langun nu inibpasad'in sa lekitanu.