Ika-isa a Sulat kanu Manga Taw sa Kurintu
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na inisulat'i Bulus a pinamili nu Isa al-Masih a masugu nin asal'a makapayag su Mapia a Tutuma kanu manga taw. Na su kinapamili nu Isa al-Masih lun na sa ukit a kinabpapayag'in lun sia kanu lalan 'bpawang sa dalepa a Damaskus a mailay su entu sia kanu Manga Pinggalebek 9 ayat 1 taman sa 22 sia kanu Kitab Injil. Su nia a sulat na bedtuan sa Ika-isa a Sulat kanu Manga Taw sa Kurintu. Lu i nia pakatumpa kanu lumpukan nu 'bpamaginugut sa dalepa a Kurintu a pinangusiatan nin kanu Mapia a Tutuma. Su kinasulat'i Bulus sa nia na sia kanu pageletan nu manga lagun a 54 enggu 55 ulian nu kinambata kanu Isa al-Masih. Na lu natabu si Bulus sa kinasulat'in sa nia kanu dalepa a Ipisu a sakup'u Turkey sa saguna a timpu.
Su Kurintu kanu entu a timpu na isa kanu manga masela a siudad sa prubinsia a Akaya a sakup'u Greece sa saguna a timpu. Su nia a siudad na badtug sa kapia na manga dagangan enggu mapia i kapendagang-dagang lu tembu madakel a taw a ebpun kanu embala-bala a dalepa i 'bpagabpet 'bpelu sa Kurintu. Ugaid'a su nia a dalepa na kilala bun su manga taw nin sa kapenggalebek sa kamustakilan enggu madakel i pegkakadenanen a pedsimban nilan.
Nia kahanda ni Bulus sa kinasulat'in sa nia na asal'a mambitiala nin kanu lumpukan nu 'bpamaginugut lu su makapantag kanu manga lidu na ginawa nilan enggu su manga idsa na ginawa nilan taman sa mapamandu nin silan sa ukit a kapaguyag-uyag sia luyud kanu Isa al-Masih. Nia masela a naliduan na ginawa ni Bulus na su kinambad-bad'u lumpukan nu 'bpamaginugut lu ka nia balapantag kanilan na u entain i 'gkaunutan nilan a mangulu kanilan. 'Gkaliduan na ginawa nin bun su manga kamustakilan a penggalebeken nu ped'ilan bun kanu lumpukan. Maitu bun su lidu na ginawa makapantag kanu kabpangaluma enggu su tiwalayan nu babay-mama taman kanu manga pegken a ibpagapal kanu pegkakadenanen. Ibpamandu bun ni Bulus kanu lumpukan nu 'bpamaginugut lu su dait a ukit a kasimba kanu Kadenan, su makapantag kanu ibpagenggay nu Ruh nu Kadenan enggu su kambibiag 'bpaluman nu namamatay.
Na nia muntus'u sulat'i Bulus a nia na ipebpayag'in su da idsan nin a kapegkalimu nu Kadenan a inenggay nin kanu manga taw nin. Kagina apia mabagel paman i salig'u taw enggu pakagaga penggula sa kagaipan na da bun katagan nin amaika dala sa lekanin su kakalimu. Ka sia man kanu adapan nu Kadenan na nia balapantag sa langun na su kagkakalimua nu uman i isa.