Ika-isa a Sulat kanu Manga Taw sa Kurintu 1

Ika-isa a Sulat kanu Manga Taw sa Kurintu

Su Salam

Salam sa lekanu. Saki si Bulus a napamili a masugu nu Isa al-Masih sia luyud kanu kahanda nu Kadenan. Kaped ku bun si Sustinas a lusud tanu sa tian sa paginugut. 2 Su nia a sulat na san pakatumpa sa lekanu a lumpukan nu 'bpamaginugut kanu Kadenan sa dalepa a Kurintu. Na nabaluy kanu a manga taw nu Kadenan a nasuti sabap kanu kinaisa nu kanu Isa al-Masih apeg den nu langun nu taw kanu embala-bala a dalepa a pedsimba sia makanggulalan kanu ingala nu Isa al-Masih a Mapulu tanu. 3 San sa lekanu su da idsan nin a limu enggu kalilintad a ebpun kanu Ama tanu a su Kadenan enggu kanu Mapulu tanu a su Isa al-Masih.

4 Na tatap ku sekanu ipedsukul-sukul kanu Kadenan sabap kanu inenggay nin sa lekanu sia kanu kinaisa nu kanu Isa al-Masih sia luyud kanu da idsan nin a limu nin. 5 Ka madakel i natalima nu a kapianan sia kanu Isa al-Masih, lusud den lu ba su kadtalu enggu katuntay kanu bantang. 6 Sabap sa entu na 'gkailay sa lekanu i su inipamandu nami pantag kanu Isa al-Masih na benal. 7 Tembu ba di kanu 'gkulang kanu langun na nasisita nu a kapegkagaga a ebpun kanu Suti a Ruh nu Kadenan gagalu na kabpangingapa nu kanu kambalingan nu Mapulu tanu a su Isa al-Masih sia sa dunia. 8 Na pagkabagelen nin bun su salig'u taman sa kapupusan asal'a di kanu katilan kanu gay a kambalingan nu Mapulu tanu a su Isa al-Masih. 9 Na su Kadenan na matidtu, sekanin i namili sa lekanu ka enggu kanu maisa kanu Tunggal'in a su Isa al-Masih a Mapulu tanu.

Su Dait a Kapamagisa-isa nu 'Bpamaginugut

10 Manga lusud ku sa tian, sia kanu ingala nu Mapulu tanu a su Isa al-Masih na 'bpangenin ku sa lekanu i pamagisa-isa kanu sia sa lekanin, da kanu 'bpipitas ka makin kanu pamagisa-isa sa itungan enggu kahanda. 11 Na pedtalun ku i nia sa lekanu sabap sa napanudtul sa laki nu manga kaped'i Klui i di kanu 'bpamagayun. 12 Su ped kun sa lekanu, na nia nin kadtalu na “Sia aku kani Bulus.” Su ped menem na “Sia aku kani Apulus.” Aden bun kun pedtalu sa “Sia aku kani Kipas” enggu aden bun kun pedtalu sa “Sia aku kanu Masih.” 13 Ngintu, su Isa al-Masih na nabad-bad besen? Ngintu, saki ba i initutuk kanu kayu a pinambalawaga sabap sa lekanu? Atawa ka kanu ingala ku i kinasalawat sa lekanu?

14 Pedsukul-sukul aku kanu Kadenan ka dala nasalawatan ku sa lekanu nia tabia na si Krispu enggu si Gayus. 15 Tembu ba dala makadtalu sa lekanu sa sinalawatan kanu sia kanu ingala ku. 16 (Nasalawatan ku bun besen si Istipanas enggu su sakambinabatan nin ugaid'a liu sa entu na da den katanudan ku a nasalawatan ku.) 17 Ka dikena man nia sinuguan nu Isa al-Masih sa laki i kapanalawat ka nia nin sinuguan sa laki na su kapangusiat kanu Mapia a Tutuma. Na penggalebeken ku su entu sa dikena sa ukit a kategel sa kadtalu ka enggu di kaawan na katagan su kabpangusiat ku pantag kanu kinapatay nu Isa al-Masih kanu kayu a pinambalawaga.

Su Isa al-Masih su Ilemu enggu su Kabarakat'u Kadenan

18 Na su guna-guna man nu kinapatay nu Isa al-Masih kanu kayu a pinambalawaga na kababalan kanu manga taw a makaidtug sa naraka ugaid'a sa lekitanu a malipuas na kabarakatan nu Kadenan su entu. 19 Ka nia man nakadalem kanu kitab na

“Binasan ku su ilemu nu balaitungan

enggu awan ku sa katagan su kasabut'u mangategel.”

20 Na endaw den basi su manga balaitungan, su 'bpamamandu sa kasuguan apeg den nu mangategel endalawana sia kanu dunia? Dikena ba inipailay den nu Kadenan i su kabalaitungan sa dunia na kababalan? 21 Ka sia man luyud kanu ilemu nu Kadenan na da nin suguti a makilala sekanin nu manusia sia makanggulalan kanu ilemu nu dunia. Tembu ba makin nia nin pigkahanda na ilipuas'in su apia entain a taw sia makanggulalan kanu kapaginugut'ilan kanu inipangusiat kanilan sa apia nia nin kaaden i sia kanu kapegkailay nu ped a manga taw na kababalan su entu. 22 Ka su manga taw a Yahudi na di maginugut u dala mailay nilan a tanda a kagaipan enggu su manga taw menem a Grik na nia nilan 'gkapapangilay na ilemu. 23 Ugaid'a su ibpangusiat'ami na su Masih a initutuk kanu kayu a pinambalawaga a sia kanu manga taw a Yahudi na pakasungkang kanu ginawa nilan su entu enggu sia menem kanu manga taw a dikena-Yahudi na kababalan su entu. 24 Ugaid'a sia kanu manga taw a pinamili nu Kadenan a makapaginugut sa lekanin magidsan pan i Yahudi atawa ka dikena-Yahudi na ilemu nu Kadenan su entu enggu kabarakatan nin. 25 Kagina sia kanu itungan nu manga taw a entu a kababalan kun a kahanda nu Kadenan na labi lawan pan kanu ilemu nu manusia enggu su kataw nilan lun a kalubayan nu Kadenan na mabagel pan kumin kanu bagel'u manusia.

26 Manga lusud ku sa tian, nia nu 'gkakalendem na su kambebetad'u kanu timpu a kinaenggat'u Kadenan sa lekanu sa kapaginugut, na paidu bu sa lekanu i madtalu a balaitungan sa kanu mata nu taw. Paidu bu sa lekanu i madtalu a pakagaga enggu nakabpun kanu balabansa a manga taw. 27 Ugaid'a pinamili man nu Kadenan su manga taw a madtalu a dala itungan nin ka enggu nin pakapagkaya su manga taw a balaitungan sa dunia. Pinamili nin su madtalu a manga malubay ka enggu nin pakapagkaya su manga taw a mabagel sa dunia. 28 Pinamili nu Kadenan su manga taw a papegkabulugan ka enggu nin 'gkaawan sa katagan su manga taw a pegkilalan sa dunia. 29 Ka amaika maitu na dala taw a makamamasela kanu adapan nu Kadenan. 30 Na su Kadenan man i sabapan a kinaisa tanu kanu Isa al-Masih a nabaluy a ilemu nin sia sa lekitanu a mana su kinatimbang'in sa lekitanu sa ikelas, kinasuti nin sa lekitanu enggu kinapalipuas'in sa lekitanu kanu kabaladusan. 31 Tembu ba mana bun su nakadalem kanu kitab a “Apia entain i miug emamasela na nia nin imamasela na su ngin i pinggula nu Mapulu.”