Su Kinapayag'i Bulus kanu Kinatutuk kanu Isa al-Masih kanu Kayu a Pinambalawaga
2
Manga lusud ku sa tian, na mana bun su kinasan ku sa lekanu na dikena ku inipangusiat sa lekanu su nakapagena a kahanda nu Kadenana sa ukit a kategel sa kadtalu atawa ka ilemu. 2 Kagina tinantu ku den kanu ginawa ku i dala ped a ipamandu ku sa lekanu nia tabia na u ngin bu i pantag kanu Isa al-Masih enggu su kinatutuk lun kanu kayu a pinambalawaga. 3 Na sineman aku sa lekanu sa aden kalubayan ku enggu pegkegkel'a gilek. 4 Na su kangadtalu ku enggu su kabpangusiat ku sa lekanu na dikena sa ukit a kategel sa kadtalu a ebpun kanu ilemu nu manusia ka su Suti a Ruh mismu i napaamad kanu ibpangusiat ku sia nakanggulalan kanu kabarakat'in 5 asal'a su kasalig'u na dikena sabap kanu kategel'u manusia ka sabap kanu kabarakat'u Kadenan.Su Ilemu nu Kadenan
6 Na apia ka maitu na 'bpamandu kami bun sa manga ilemu kanu manga taw a tidtu a pedsalig ugaid'a dikena ilemu a ebpun sa dunia atawa ka kanu 'bpamegkamal lun a natatalanged a 'gkapupus i bagel'in 7 ka nia nami ibpamandu na su ilemu nu Kadenan a su nakapagena a kahanda nin sa nauget den a timpu. Na inadil'in su entu a ilemu unan pan nu kinapangaden ka enggu tanu makaampit kanu sigay nin. 8 Na su nia a ilemu na dala isa bu a nakatuntay lun kanu 'bpamegkamal sa dunia ka u mana bu man ka natuntayan nilan na di nilan itutuk kanu kayu a pinambalawaga su Mapulu a lekanin su langun na sigay. 9 Na mana bun su nakadalem kanu kitab a dala man nakailay atawa ka nakakineg atawa ka nakapagitung kanu manga inadil'u Kadenan kanu manga taw a pegkalimu lun.b
10 Ugaid'a inipayag'u Kadenan su entu sa lekitanu sia nakanggulalan kanu Suti a Ruh nu Kadenan. Ka dala man di 'gkatawan nu Suti a Ruh nin apia su madalem a kahanda nu Kadenan. 11 Ka mana bun su taw, na dala makataw kanu 'gkagkahanda nin u dikena su ginawa nin demun. Na maitu bun ba su Kadenan, da bun makataw kanu 'gkagkahanda nin u dikena su Suti a Ruh nin. 12 Na nia ba i natalima tanu na su Suti a Ruh nu Kadenan dikena kanu ngin i sia kanu dunia ka enggu tanu 'gkatuntayan su inenggay nu Kadenan sa lekitanu. 13 Na ibpamandu nami su entu sa dikena sia kanu ilemu nu manusia ka sia kanu tutulu nu Suti a Ruh. Ka u ngin man i ebpun kanu Suti a Ruh na papedtuntayan nami kanu manga taw a aden kanilan su Suti a Ruh.c
14 Na su manga taw menem a dala kanilan su Suti a Ruh na di nilan pedtaliman su ngin i ebpun kanu Suti a Ruh kagina sia sa kanilan na kababalan bu su entu enggu di nilan 'gkatuntayan su entu kagina nia bu ukit a katuntay sa entu na sia makanggulalan kanu tabang'u Suti a Ruh. 15 Ugaid'a su taw a aden sa lekanin su Suti a Ruh na katawan nin i kabalapantag'u langun nu ebpun kanu Kadenan. Ugaid'a di menem sekanin katuntayan nu manga taw a dala sa kanilan su Suti a Ruh. 16 Na mana bun su nakadalem kanu kitab a “Entain ba man i makatuntay kanu kapagitung'u Mapulu? Entain ba man i makapamandu sa lekanin?”d Ugaid'a sekitanu a 'bpamaginugut na natalima tanu su kapagitung a sia luyud kanu kapagitung'u Isa al-Masih.