Su Kinambad-bad'u 'Bpamaginugut sa Kurintu
3
Manga lusud ku sa tian, na kanu san aku pan sa lekanu na di ku pamun sekanu 'gkapamandu sa mana kanu manga taw a aden kanilan su Suti a Ruh ka nia ku pamun kabpamandu sa lekanu na mana su manga taw a sia pamun luyud kanu kamamanusiay ka malubay pamun i paginugut'u kanu Isa al-Masih. 2 Na iling-iling'u pegken na dikena pamun kana matua i inenggay ku sa lekanu a pegken ka gatas pamun kagina dikena kanu pamun adil sa entu enggu taman sa saguna na maitu kanu pamun ba 3 kagina sia kanu pamun naluyud kanu kamamanusiay a ukit. Ka taman man sa edsisigia kanu pamun sa dikena mapia enggu mamagukag kanu na sia kanu pamun luyud sa kaduduniay enggu su kabpaguyag-uyag'u na sia pamun luyud kanu kamamanusiay. 4 Ka amaika madtalu nu pamun i “Sia aku kani Bulus,” atawa ka “Sia aku kani Apulus” na nia nin maena na sia kanu pamun luyud kanu kamamanusiay.5 Enduken, entain besen si Apulus enggu entain aku besen a si Bulus? Manga panunugun kami bu nu Kadenan a inusal'in a nakaenggat sa lekanu sa kapaginugut'u sa lekanin. Ipenggulalan nami bu su ngin i sinuguan nu Mapulu kanu uman i isa sa lekami. 6 Na mana bun su pamumulan, na saki i namula enggu si Apulus menem i namubu lun ugaid'a su Kadenan i napagkasela lun. 7 Na dikena man nia balapantag su 'bpamula atawa ka su 'bpamubu ka su papegkasela lun a su Kadenan. 8 Na su kahanda nu 'bpamula enggu su 'bpamubu na isa bu enggu uman i isa kanilan na makatalima sa balas sia luyud kanu ngin i pinggalebek'ilan. 9 Ka sekami na panunugun kami bu nu Kadenan a pedtabanga sa galebekan sia sa lekanin enggu sekanu menem na mana su 'bpangangawidan nu Kadenan atawa ka su papedtindegen nin a walay.
10 Na sia luyud kanu kapegkagaga a inenggay nu Kadenan sa laki a sinugu nin, na mana bun su mategel a panday na walay na saki i minetad sa udsadan enggu su ped menem i napatalus lun. Ugaid'a apia entain i mapatalus lun mapatindeg su entu na dait a 'bpia-pianan nin i kapatindeg'in lun. 11 Ka dala den man ped a makabetad a udsadan na walay nia tabia na su udsadan a nakabetad den a su Isa al-Masih. 12 Na aden mapatalus sa entu mapatindeg a nia nin usalen na bulawan, pilak enggu muntia a watu. Aden bun mapatalus lun mapatindeg sa nia nilan usalen na kayu, utan atawa ka lagami. 13 Na sia kanu gay a kagkukum na mailay su katigkel'u kinapatindeg'ilan lun ka tepengen su entu sia makanggulalan sa apuy. 14 Na su di matutung na makatalima sa balas su mimbalay lun. 15 Na su matutung menem na masela a kalugian kanu mimbalay lun ugaid'a apia ka maitu na malipuas bun su mimbalay a mana bun su taw a nalipuas sia kanu kapegkatutung.
16 Ngintu, di nu katawan i sekanu den su Suti a 'Bpagagaman nu Kadenan ka san den sa lekanu su Suti a Ruh nin? 17 Na apia entain man i minasa kanu pegkalebenan nu Kadenan na binasan nin bun. Ka suti man su pegkalebenan nu Kadenan enggu sekanu su entu.
18 Na di nu pedsalimbut i ginawa nu ka amaika nia nu kapegkailay sa ginawa nu i balaitungan kanu sia kanu mata nu taw na dait a teleni nu su entu ka nia tinemu i dikena kanu balaitungan kanu mata nu taw ka enggu kanu mabaluy a balaitungan sia kanu Kadenan. 19 Kagina su ilemu sia kanu dunia na da katagan nin sia kanu Kadenan. Ka mana bun su nakadalem kanu kitab a
“Sia nin bun dinulatan su balaitungan kanu kabalaitungan nilan,”a
20 enggu
“'Gkatawan nu Mapulu i su itungan nu balaitungan
na dala katagan nin.”b
21 Tembu ba di dait a imamasela su apia entain a 'gkangaunutan kagina sa lekanu su langun-langun. 22 Na apia saki a si Bulus atawa ka si Apulus enggu si Kipas atawa ka su dunia, su uyag-uyag, su kapatay, su sagugunay enggu su mangauma pan a manga timpu na lekanu langun su entu. 23 Na sekanu na sia kanu nalusud kanu Isa al-Masih enggu su Isa al-Masih menem na sia nalusud kanu Kadenan.