Su manga Sinugu nu Isa al-Masih
4
Kagina ka maitu na nia dait a katimbang'u taw sa lekami na panunugun nu Isa al-Masih enggu sinaligan nu Kadenan sa kapangusiat kanu nakapagena a kahanda nin. 2 Na entu pan ka nadtalu a sinaligan ka na nia dait na kasaligan ka sa tidtu. 3 Na dikena den man balapantag sa laki u ngin i 'gkapagitung'u sa laki atawa ka 'gkapagitung'u ped a taw sa laki. Ka apia saki na dala kawagib ku sa kadtalu ku sa mapia atawa ka mawag su ngin i 'gkangguniat ku pantag kanu galebekan ku. 4 Ka da man katawan ku a makasendit ku kanu ginawa ku. Ugaid'a dikena nia nin maena i da den kalimbanan ku ka su Mapulu bu i labi a pakataw kanu entu. 5 Tembu ba da kanu muna semugat sa kawagib kanu ped'u taman sa di pan mauma su gay a kambalingan nu Mapulu sia sa dunia. Na sekanin i temayaw sa kanu ngin i manga nakapagena sia kanu malibuteng enggu ipayag'in su manga kahanda nu manga taw a sia kanu atay nilan. Na kanu entu ba a timpu na matalima nu uman i isa su pugi a ebpun kanu Kadenan a makadait sia kanu ngin i pinggula nilan.6 Manga lusud ku sa tian, na sia kanu kapianan nu na nia ku inusal a upaman na sekami kani Apulus ka enggu nu katuntayan su maena nu kadtalu a nia a “Di nu 'bpelawani su ngin i nakadalem kanu kitab.” Ka amaika maitu na di nu makamamasela su apia entain a 'gkangaunutan sa labi a mapia kumin kanu ped. 7 Ngin besen i kambidayan nu kanu ped? Ngin ba i aden sa lekanu a dikena inenggay bu sa lekanu? Na amaika inenggay bu sa lekanu su entu na ngintu ka makamamasela kanu sa mana dikena nu i entu natalima bu?
8 Nia nu kapegkailay kanu ginawa nu na langun na nasisita nu na san den sa lekanu! Nia nu kataw ka kawasa kanu den enggu pendatu kanu den sa dikena kami nu kaped! Na ngin den i kapia nin u pendatu kanu den ka enggu kami bun makandatu a kaped'u. 9 Ka su kapegkailay ku lun na sekami a sinugu na ipebpagilay nu Kadenan i sekami i mababa den sa langun a mana su manga taw a sinugat sa kawagib sa kapatay a ipegkuyug sia kanu lusud'u dunia sa kanu adapan nu manga taw enggu kanu manga malaikat. 10 Na sabap sa kabpangusiat'ami pantag kanu Isa al-Masih na nia kapegkailay sa lekami na 'gkangababal. Ugaid'a sekanu menem na nia nu kataw na balaitungan kanu sabap kanu Isa al-Masih. Mangabagel kanu enggu sekami menem na mangalubay. 'Bpagadatan kanu ugaid'a sekami na dikena 'bpagadatan. 11 Na sampay saguna na da gaid pegken nami enggu da gaid 'gkainem'ami, di kami gaid pakambalegkas, papegkapasangan kami enggu dala talanged a 'gkagkalebenan nami 12 taman sa 'bpamantiali kami sa kauyag'ami. Na amaika papegkayan kami nu taw na ibpangeni-ngeni nami i palihalan silan. Amaika 'bpamungkaidanan kami na pedtigkelan nami su entu. 13 Amaika pedtaluan kami sa dikena mapia na mapia i ipedsumpat'ami. Na sampay saguna na ipedtimbang kami sa mana manga puput'u dunia a da katagan nin.
14 Na dikena nia ku kinasulat sa nia sa lekanu i papegkayan ku sekanu ka papata i nia sa lekanu a mana manga wata ku a papedtayan. 15 Ka apia nia nin kaaden i madakel i pedtiakap sa lekanu pantag kanu kabpaguyag-uyag'u sia kanu Isa al-Masih na sakataw bu i madtalu a ama nu. Na saki man i nabaluy a ama nu sabap sa naginugut kanu kanu Isa al-Masih sia nakanggulalan kanu Mapia a Tutuma a inipangusiat ku sa lekanu. 16 Tembu ba 'bpangenin ku sa lekanu i ilingi aku nu. 17 Na sabap sa entu na sinugu ku san sa lekanu si Timuti a papedtayan ku a wata ku sa paginugut enggu 'gkasaligan sia kanu Mapulu a su Isa al-Masih. Na sekanin i mapatadem sa lekanu kanu ukit a kabpaguyag-uyag ku sia kanu Isa al-Masih a mana bun su ibpamamandu ku kanu langun na lumpukan nu 'bpamaginugut sa kanu apia endaw a dalepa a 'gkabpawangan ku.
18 Ugaid'a su ped sa lekanu na 'bpemamasela den gaid ka nia nilan kataw ka di aku den makasan 'bpaluman. 19 Ugaid'a amaika menggay su Kadenan na magan sa magan na seman aku. Na lu ku ba mailay u ngin ba i nanggalebek'ilan sia kanu Kadenan atawa ka pinalay bu silan sa kadtalu. 20 Kagina su kapendatu nu Kadenan na dikena sia 'bpagilayn kanu kangadtalu nu taw ka sia 'bpagilayn kanu galebekan sia makanggulalan kanu kabarakat'u Kadenan. 21 Na ngin i tinemu nu? Seman aku a aden it'in a ibpametaya atawa ka seman aku sa aden kananaw nin enggu kakalimu nin?