Ika-isa a Sulat kanu Manga Taw sa Kurintu 5

Su Kasugat sa Kawagib kanu Taw a Penggula sa Kamustakilan

Na nia nin kabantang na aden nakapanudtul sa laki sa aden pedsina san sa lekanu a ipedtitiwalay nin su kaluma nu ama nin. Na apia su manga taw a dikena 'bpamaginugut kanu Kadenan na dikena nilan pedsugutan su manga maitu ba. 2 Na sekanu na 'bpamamasela kanu pan apia maitu i 'gkanggula nu san! Dikena ba nia dait sa entu na 'gkalidu i ginawa nu enggu nia dait na pinamugaw nu den su entu a taw? 3-4 Na apia dala aku man san sa lekanu na kaped aku nu bun sia makanggulalan kanu Suti a Ruh. Na kagina ka mana kaped aku nu bun na sia kanu ingala nu Mapulu a su Isa al-Masih na pedsugaten ku sa kawagib su taw a entu a penggula sa maitu ba. Na itagu nu sa ginawa i uman kanu pendidilimudan na kaped aku nu. Na sia kanu kapegkagaga a inenggay nu Mapulu tanu a su Isa al-Masih 5 na ipalad'u den kanu bagel'u Saitan su entu ba a taw ka enggu mabinasa su badan nin ka aden a entu na malipuas bun sekanin sia kanu kambalingan nu Mapulu a su Isa al-Masih.

6 Na dikena mapia i kabpemamasela nu a nan. Ngintu, di nu 'gkatawan i su paidu bu a pakembang a makasimbul kanu inadum na makapakembang'in su langun nu inadum? 7 Tembu ba iawa nu su entu a pakembang ka enggu kanu pakailing sa kanu bagu a inadum a da pakembang'in ka nabagu kanu den man sia kanu kinanggihad'u Isa al-Masih kanu umul'in a kurban kanu Kadenan a mana bun su bili-bili a inigkurban kanu timpu nu Kanduli nu Kalipuas. 8 Kagina ka maitu na idsela-sela tanu su entu sa dala den su manga pakembang a entu a mana su kamustakilan a galebek enggu su ped pan a manga kabaladusan ka nia den aden kanu entu a kanduli na su pan a dala pakembang'in a mana su senep sa atay a kapaginugut enggu katidtu.

9 Na nalabit ku bun man kanu paganay a sulat ku sa lekanu i da kanu semimbul kanu manga taw a pedsisina. 10 Ugaid'a dikena nia ku pedtalun sa lekanu a di nu simbulan na su langun den nu taw sa dunia a pedsisina atawa ka su di mangasukul enggu su manga tanegkawn atawa ka su manga pedsimba sa balahala ka nia bu ukit a kaabung sa langun nu entu na amaika awan nu i dunia. 11 Ugaid'a nia ku ba a entu pedtalun sa lekanu a di nu simbulan na su manga taw a pedtalu sa manga suled sa paginugut inunta na pedsisina, di mangasukul, pedsimba sa balahala, masudi, palalangut enggu tanegkawn. Na su maitu ba a manga taw na di nu a benal semimbuli apia sia kanu kapegkan nilan.

12-13 Da man kawagib tanu sa kasugat sa kawagib kanu manga taw a dikena 'bpamaginugut ka su Kadenan bu i mataw semugat kanilan sa kawagib. Nia bu aden kawagib tanu lun sa kasugat sa kawagib na su manga taw bu a 'bpamaginugut. Na nia nakadalem kanu kitab na “Paawan su manga taw a penggalebek sa mawag.”