Su Kagkukum kanu Suled sa Paginugut
6
Na amaika aden sa lekanu i aden di nin ibpagayun kanu ped'in, na ngintu ka matika nu a benal mananggit lu kanu 'bpamimitialan a dikena 'bpamaginugut kanu Kadenan? Dikena nu pan lu 'bpananggiten kanu pagidsan nu a 'bpamaginugut. 2 Ngintu, di nu 'gkatawan i sia kanu Mauli a Gay na su 'bpamaginugut i kemukum kanu dunia? Na amaika maitu na ngintu ka di nu magaga kemukum su manga maya bu a di 'bpagayunan? 3 Di nu 'gkatawan i apia su manga malaikat na sekitanu bun a 'bpamaginugut i kemukum kanilan? Na nia nu pan a entu di 'gkagaga pegkukum i kadsalilidan bu a di 'bpagayunan? 4 Na amaika aden manga maya ba a di nu 'bpagayunan kanu kaped'u na ngintu ka lu nu pan 'bpananggiten su entu kanu manga taw a dala malusud kanu umpungan nu 'bpamaginugut? 5 Na pedtalun ku i nia sa lekanu ka enggu nu 'gkatun i kaya nu ka basaula den menem i apia sakataw sa lekanu a 'bpamaginugut na dala demun makagaga kemukum kanu di 'bpagayunan nu uman i isa kanu ped'in. 6 Ka nia nu man penggulan na ipegkukum'u su suled'u sa paginugut enggu lu nu silan ipegkukum kanu 'bpamangukum a dikena 'bpamaginugut.7 Na su kapegkukum'u kanu suled'u bun sa paginugut na dala ped a pedtabanan ka sekanu bun. Ngintu ka dikena nu pan nia penggulan i pedtigkelan nu su manga taw a penggula sa lekanu sa mawag enggu pedsalimbut sa lekanu? 8 Ka nia pan mula na sekanu bun mismu i pedsalimbut enggu penggula sa mawag. Apia kanu manga suled'u sa paginugut na penggulan nu i entu kanilan. 9 Ngintu, di nu 'gkatawan i su penggula sa mawag na di makalusud kanu kapendatu nu Kadenan? Da kanu man mapapagakal, ka di man a benal makalusud kanu kapendatu nu Kadenan su manga taw a pedsisina, su manga taw a pedsimba sa balahala, su manga pegkikiuga atawa ka su malilini sa pagidsan nin bun a mama. 10 Maitu bun su manga taw a tanegkawn enggu su di mangasukul apeg den nu manga taw a palalangut enggu su mangasudi taman den kanu manga taw a salimbuten. 11 Na su maitu ba a manga galebek na penggulan bun nu manga ped sa lekanu kanu paganay ugaid'a saguna na ginagasan den su dusa nu, sinuti kanu den enggu initimbang kanu den sa ikelas sia nakanggulalan kanu ingala nu Mapulu a su Isa al-Masih enggu kanu Suti a Ruh nu Kadenan tanu.
Su Badan nu 'Bpamaginugut
12 Su ped sa lekanu na nia nin pedtalun na “'Gkaalus sa laki i enggulan ku su langun.” Ugaid'a nia ku madtalu sa entu na dikena langun nu entu na makagkapia. Na saki na apia mapakay pan a enggulan ku i apia ngin na di ku pedsugutan sa maulipen aku nu entu. 13 Na aden bun pedtalu sa lekanu sa “Su pegken na inumbal asal'a makadalem kanu tian enggu su tian na pendaleman sa pegken.” Na nia ku menem madtalu sa maitu ba na magidsan su tian enggu su pegken na pembinasan bun i entu nu Kadenan. Ugaid'a dikena man pinangaden su badan asal'a mausal sa kadsina ka pinangaden su entu asal'a mausal sia kanu Mapulu enggu su Mapulu menem i pegkakataw kanu badan. 14 Na su badan tanu na pambibiagen nu Kadenan a mana bun su kinapambibiag'in kanu Mapulu sia nakanggulalan kanu kabarakat'in. 15 Ngintu, di nu 'gkatawan i su badan tanu na nalusud sia kanu Isa al-Masih? Tembu ba di a benal mapakay a usalen tanu su badan tanu kanu manga sundal. 16 Ngintu, di nu 'gkatawan i su taw a usalen nin i badan nin kanu manga sundal na timbang a naisa sekanin kanilan? Ka mana bun su nakadalem kanu kitab a “Idtampung'in su kaluma nin sa mana sakabadan bu silan.”a 17 Na amaika naisa tanu den kanu Mapulu tanu a su Isa al-Masih na naisa bun su pamusunganb tanu sa lekanin. 18 Tembu ba tangkai nu su kadsina ka su ped a kabaladusan na dala lakit lambay nin kanu badan ugaid'a su taw a pedsina na pembaladusa kanu badan nin. 19 Na dait a katawan nu i su badan nu na pegkalebenan nu Suti a Ruh nu Kadenan a natalima nu ebpun sa lekanin. Na dikena den lekanu su badan nu ka kanu Kadenan den 20 ka tinebus kanu nin sa maselac tembu ba usal'u su entu sa ukit a mapugi su Kadenan.