Su Makapantag kanu 'Gkalumaya
7
Makapantag menem kanu inisulat'u a “Labi a mapia kanu mama i di embalagiuma.” 2 Ugaid'a sabap kanu sasat a kapedsina na nia dait kanu uman i mama na aden kaluma nin. Na maitu bun ba su uman i babay. 3 Na su mama na dait a inggulalan nin kanu kaluma nin su ngin i nakaalus kanu 'gkalumaya, na maitu bun ba su babay kanu kaluma nin. 4 Ka su babay na dikena den sekanin i pegkakataw kanu badan nin ka su kaluma nin den. Maitu bun ba su mama na dikena den sekanin i pegkakataw kanu badan nin ka su kaluma nin den. 5 Na di dait a idsingit'u uman i isa su kambalagiuma nin kanu kaluma nin nia tabia na napagayunan nilan i di nilan pan enggulan su entu ka 'bpangadap pan silan kanu Kadenan. Ugaid'a u maipus den su entu, na mapakay a imbalagiuma nin menem su kaluma nin ka tabia bun ka di makakumpen sa ginawa na masasat'u Saitan.a 6 Na dikena ku ipedsugu i di pan a entu kambalagiuma ka laki bu i entu a itungan. 7 Na u mana bu man ka mapakay na nia ku pan tinemu i su langun nu taw na makapagidsan sa maya ba sa laki a nia, ugaid'a uman i isa na embibidaya i inenggay lun nu Kadenan a kapegkagaga.8 Na nia ku menem madtalu sa lekanu a dala kaluma nin atawa ka su manga balu na nia mapia i da kanu den 'gkaluma a maya ba sa laki a nia. 9 Ugaid'a amaika di nu 'gkagaga pegkumpen su ginawa nu na dait a 'gkaluma kanu ka nia tinemu i 'gkaluma kanu kumin sa makandusa kanu sabap kanu di 'gkagaga a kiug'a ginawa nu.
10 Sekanu menem a aden kaluma nin, na nia ku ipedsugu sa lekanu enggu nia bun ba i kasuguan nu Mapulu na su babay na di dait a imbelag'in su kaluma nin. 11 Ugaid'a amaika embelag bun sekanin na di dait a 'gkaluma sekanin 'bpaluman ugaid'a mapakay a embalinganan nin su kaluma nin. Na maitu bun ba su mama, di bun dait a imbelag'in su kaluma nin.
12 Na nia ku menem madtalu kanu apia entain a mama a aden kaluma nin a di 'bpaginugut ugaid'a di pegkiug pebpitas su kaluma nin a entu sa lekanin na di dait a imbelag'in su entu. Na laki bu i nia a itungan, dikena ebpun kanu Mapulu. 13 Na maitu bun ba su babay, di nin bun dait a imbelag su kaluma nin a di 'bpaginugut amaika di pegkiug pebpitas sa lekanin. 14 Kagina su mama a di 'bpaginugut na pedtaliman nu Kadenan sabap kanu kaluma nin a 'bpaginugut, na maitu bun ba su babay na pedtaliman bun sabap kanu kaluma nin a 'bpaginugut. Ka amaika dikena maitu na di matalima su manga wata nilan. Ugaid'a sabap sa aden kanu manga lukes'ilan i 'bpaginugut na matalima bun silan.b 15 Ugaid'a amaika su di 'bpaginugut a kaluma ka sekanin den i miug embelag na padtadayn den kanu entu a kiug'in. Na amaika maitu, na su 'bpaginugut a kaluma nin na mapukas sekanin kanu kaluma nin a entu. Na su Kadenan na nia nin kalilinian na makapaguyag-uyag tanu sa aden kalilintad'in. 16 Ka aden a entu na sia kanu kapedtiwalay nilan na su mama na maumbal a ukit sa kapaginugut'u kaluma nin, na maitu bun ba su babay kanu kaluma nin.
17 Na uman i isa sa lekanu a 'bpamaginugut na u ngin i kambebetad a inenggay sa lekanu nu Mapulu sa kanu timpu a kinaenggat'u Kadenan sa lekanu sa kapaginugut na entu den ba i papanalus'u. Na nia bun ba i inisugu ku kanu langun na lumpukan nu 'bpamaginugut. 18 Na upama ka su taw a napaletakc den kanu timpu a kinaenggat'u Kadenan lun sa kapaginugut na di den dait a bagun nin pan su entu. Na amaika menem ka da pan sekanin mapaletak na di den dait a mapapaletak pan sekanin. 19 Kagina dikena den man balapantag u napaletak ka atawa ka dala, ka nia den balapantag na su kanggulalan kanu manga kasuguan nu Kadenan. 20 Tembu uman i isa sa lekanu na u ngin i kambebetad'u sa kanu timpu a kinaenggat'u Kadenan sa lekanu sa kapaginugut na entu den ba i papanalus'u. 21 Na amaika su timpu a kinaenggat'u Kadenan sa leka sa kinapaginugut ka nia nin natabuan na ulipen ka na di ka den 'bpagitunga su entu ugaid'a amaika menem ka aden ukit sa makambaya-baya ka kanu kaulipen nengka na enggula ka su entu. 22 Kagina su taw a ulipen kanu timpu a kinaenggat lun sa kinapaginugut kanu Mapulu na nakambaya-baya den sia kanu Mapulu. Na maitu bun ba su taw a dikena ulipen kanu timpu na kinaenggat lun sa kapaginugut na nabaluy a ulipen nu Isa al-Masih. 23 Tembu da kanu mapaulipen kanu apia entain ka tinebus kanu man sa masela. 24 Manga lusud ku sa tian, na u ngin kanu kanu kinaenggat'u Kadenan sa lekanu na entu den ba i papanalus'u sia kanu adapan nu Kadenan.
Su manga Taw a Dala Kaluma nin
25-26 Na pantag menem kanu manga laga na nia ku madtalu sa lekanu ugaid'a dikena i nia inisugu nu Mapulu ka laki bu a itungan: Na sabap kanu kapasang'u 'gkatamanan na nia mapia na da kanu den pegkaluma. Ugaid'a apia laki bu i entu a itungan na sabap kanu dala idsan nin a kapegkalimu nu Mapulu na nabaluy aku a 'gkasaligan. 27 Na su manga mama menem a aden kaluma nin na di nu ipembelag su kaluma nu. Na su dala menem na di nu den 'bpangilay i kagkaluma nu. 28 Ugaid'a amaika pegkaluma kanu menem na di kanu bun pakandusa. Na maitu bun ba su manga laga na di bun silan pakandusa u 'gkaluma. Ugaid'a entu bu ba, ka su aden kaluma nin na madakel i lidu na ginawa nin. Na nia ku kalinian na malepas kanu kanu entu ba a lidu na ginawa.
29 Manga lusud ku sa tian, na nia maena nu pedtalun ku a nia na sabap sa paidu bu i kutika na di nu den gaid 'bpagibped i kutika nu sa kapagitung'u pantag kanu kaluma nu, 30 na su 'bpamanguliang na di den gaid maguguliang, su 'gkangagalaw na di den gaid enggalaw-galaw enggu su 'bpamamasan na di nin den gaid pagitungen su kaaden nin. 31 Na apia ngin i penggulan sia sa dunia na di den gaid ayadan ka langun nu nia na pedsagad bu.
32 Nia ku 'gkalinian na malepas kanu kanu lidu na ginawa. Upama su mama a dala kaluma nin na nia nin 'gkadtulan na su manga galebekan kanu Mapulu enggu panun i kasuat'in kanu Mapulu. 33 Ugaid'a su mama a aden kaluma nin na nia nin 'gkadtulan na su makapantag kanu ngin i sia kanu dunia enggu panun i kasuat'in kanu kaluma nin, 34 na sabap sa entu na 'gkabad su itungan. Na su babay a dala kaluma nin na nia nin 'gkadtulan na su manga galebekan kanu Mapulu ka enggu magidsan pan i badan nin enggu itungan nin na sia bu kanu Kadenan. Ugaid'a su babay a aden kaluma nin na nia nin 'gkadtulan na su makapantag kanu ngin i sia sa dunia enggu panun i kasuat'in kanu kaluma nin. 35 Na nia ku kapedtalu sa nia na lekanu bun a kapianan, dikena nia nin maena i pegkumpenen ku sekanu sa kagkaluma nu ka nia ku bu kalinian na makapaguyag-uyag kanu sa ngin i dait enggu di maangga su kapenggalebek'u kanu galebekan kanu Mapulu.
36 Na amaika su mama ka di nin den 'gkakumpen i ginawa nin kanu balay nin enggu nia nin kapegkailay lun na dait a pakawingan nin den na italus'in su entu ka dikena bun i entu kabaladusan enggu dait bun su entu. 37 Ugaid'a amaika menem ka nia kapagitungan nu mama i di den sekanin 'gkaluma ka 'gkagaga nin bun pegkumpen su ginawa nin enggu entu ba i 'gkatelangan na ginawa nin na mapia bun su entu a napagitung'in. 38 Na mapia bun i 'gkaluma sekanin ugaid'a labi a mapia u di den sekanin 'gkaluma.
39 Na su babay na nakaiket sekanin kanu kaluma nin taman a bibiag pan su kaluma nin. Ugaid'a amaika matay den su kaluma nin na makapukas den sekanin kanu kaluma nin. Na mapakay den sekanin a 'gkaluma 'bpaluman sa mama bu a 'bpaginugut kanu Mapulu a su Isa al-Masih. 40 Ugaid'a sia bu sa laki, na labi i kapia nin sa lekanin amaika di den sekanin 'gkaluma 'bpaluman. Na su kapegkailay ku lun na nia bun ba i ibpamandu nu Suti a Ruh sa laki.