Su manga Pegken a Ibpagapal kanu manga Pegkakadenanen
8
Na su makapantag sa pegken a iniapal sa manga pegkakadenanen: Na katawan tanu i aden sa lekitanu langun su kasabut sa entu. Na su kasabut na aden a entu na pakapasundul kanu taw sa kamamasela nin. Ugaid'a su kakalimu na makapagkabagel kanu taw. 2 Na apia entain a taw i nia nin kapegkailay kanu ginawa nin na sekanin i aden sabut'in na nia nin kabantang na su entu a taw na da pamun sabut'in kanu ngin i dait a sabutan nin. 3 Ugaid'a apia entain i pegkalimu kanu Kadenan na pegkilalan sekanin nu Kadenan.4 Na su kapegkan a entu kanu iniapal kanu pegkakadenanen na 'gkatawan tanu bun man i su manga pegkakadenanen na dikena i nan tidtu, ka kaisa-isa nin bu su Kadenan. 5 Na apia paman aden madtalu a manga kadenan sa langit atawa ka sa lupa enggu madakel i pedtawagen a pegkakadenanen atawa ka manga mapulu, 6 na sia sa lekitanu na su Kadenan na kaisa-isa nin bu a su Ama a nangaden kanu langun-langun enggu 'bpaguyag-uyag tanu sa makasuat lun. Na maitu bun ba su Mapulu tanu a su Isa al-Masih na kaisa-isa nin bu. Sia nakanggulalan sa lekanin su kinapangaden kanu langun-langun enggu sia bun nakanggulalan sa lekanin su kinatalima tanu kanu uyag-uyag.
7 Ugaid'a dikena langun na pakatuntay sa entu. Ka aden pamun manga taw a sabap sa layam silan sa entu a galebek na amaika pegkan silan kanu iniapal sa pegkakadenanen na nia nilan 'gkanggiginawa na lusud pamun silan sa kapedsimba sa pegkakadenanen. Na sabap sa kabpangandam'a ginawa nilan a entu na 'gkadtalu na ginawa nilan i mawag i penggulan nilan. 8 Na su pegken man na dikena i nia 'gkabaluy a pakapasupeg sa lekitanu kanu Kadenan, magidsan pan i kanen tanu atawa ka dili na dikena i nia 'gkabaluy a pakagkawag sa lekitanu enggu dikena bun pakapagkapia sa lekitanu sia kanu Kadenan.
9 Ugaid'a pangingati nu i su kapembaya-baya nu sa kakan sa apia ngin na kadsabapan na kambaladusa nu malubay pamun i salig'in. 10 Ka upama ka seka a aden sabut'in ka nailay ka nu da pamun sabut'in a pegkan kanu iniapal lu kanu ludep'u pedsimban kanu manga pegkakadenanen na timbang a pinangenggat'engka silan sa kakan nilan sa entu. 11 Na sabap kanu kasabut'engka a entu na pakasundul'engka sa kabinasan nin su malubay i salig'in a isa bun sekanin a sabapan a kinanggihad'u Isa al-Masih kanu umul'in. 12 Na pakandusa ka kanu Isa al-Masih sabap sa nakandusa ka kanu suled'engka sa paginugut sa kinapanggula nengka lun sa sungkang kanu ginawa nin. 13 Na kagina ka maitu, amaika su pegken bu i sabapan na kapendusa nu suled sa kapaginugut na di aku den keman sa manga sapu asal'a di ku sekanin makapandusa.