Su manga Kawagib enggu su Galebekan nu manga Sinugu
9
Na ngintu, dikena ba aden baya-baya ku? Dikena ba isa aku a pinamili a sinugu enggu pibpayagan aku demun nu Mapulu tanu a su Isa al-Masih? Dikena ba nalusud kanu kanu Mapulu sia nakanggulalan sa laki? 2 Na amaika sia kanu ped ka dikena aku nilan pegkilalan a pinamili a sinugu ugaid'a mana i sia sa lekanu na sinugu aku ka su kinapaginugut'u kanu Isa al-Masih i amadan sa entu.3 Na nia ku madtalu kanu manga taw a nan a 'bpangingidsa pantag sa laki na 4 ngintu, dala besen kawagib'ami a makatalima sa makan enggu mainum? 5 Dikena ba aden bun kawagib'ami sa kapaunut sa kaluma a 'bpaginugut bun a mana bun su pinggula ni Kipas enggu su manga suled'u Mapulu taman den kanu ped pan a sinugu? 6 Na ngintu, sekami bu besen kani Barnabas i dala kawagib'in sa katelen sa kapangilay sa kauyag'in? 7 Aden ba sundalu a sekanin pan i penggastu kanu galebekan nin? Aden ba namula sa ubas a di mapakay a keman kanu unga nu pinamula nin a ubas? Enggu aden ba pedtuganul sa bili-bili a di mapakay a minem sa gatas'u pedtuganulen nin a bili-bili?
8 Na su pedtalun ku a nia na dikena bu i nia matag kapagitung'u manusia ka nakadalem bun i nia kanu kitab. 9 Ka nia man nakadalem kanu kasuguan nu Musa na “Di ka pedsukuba su ngali nu sapi gay nin penggunu.”a Na ngintu, su manga sapi i pedtalun nu Kadenan sia? 10 Dikena, ka sekitanu a manga taw su entu. Na sabap man sa lekitanu i kinasulat sa entu kagina apia entain a taw i pendadu atawa ka penggunu na pakapangingalap sa kaumunan silan kanu penggalebeken nilan a entu. 11 Na amaika sekami ka sinemaud san sa lekanu sa palihala a dikena matakapala, na ngintu masela den gaid amaika makapagagani kami san sa lekanu kanu matakapala a manga palihala nu? 12 Na amaika su ped a 'bpamangusiat ka aden bun kawagib'ilan a makatalima sa manga tabang a ebpun sa lekanu, na labi lawan kami den. Ugaid'a apia ka maitu na da nami usala su entu a kawagib'ami ka makin kami tinemigkel kanu apia ngin asal'a da makaungen kanu kapayapat'u Mapia a Tutuma makapantag kanu Isa al-Masih. 13 Na dikena ba su manga taw a gumagalebek kanu Suti a 'Bpagagaman na pakatalima silan sa makan ebpun kanu Suti a 'Bpagagaman enggu su manga gumagalebek kanu pegkurbanan na aden umun nilan kanu inigkurban? 14 Na maitu bun ba su 'bpangusiat kanu Mapia a Tutuma, inisugu nu Mapulu sa dait a makatalima bun silan sa makauyag'ilan ebpun kanu manga 'bpangusiatan nilan. 15 Ugaid'a da ku usala su entu a manga kawagib enggu dikena ku sekanu pidsulatan asal'a kaenggan aku nu. Ka nia ku tinemu i matay aku kumin sa maawa sa laki su entu a makamamasela ku. 16 Na di aku man makamamasela sa kanu kabpangusiat ku kanu Mapia a Tutuma kagina galebekan ku i entu a nakasangan sa laki. Na duan-duan ku den amaika di ku makapangusiat su Mapia a Tutuma. 17 Na amaika laki bu a kiug i kapenggula ku sa nia na dait a aden matalima ku a balas. Ugaid'a penggulan ku i nia ka nia ba i galebekan ku a inisalig sa laki nu Kadenan. 18 Na amaika maitu na ngin basi i balas ku? Nia ku balas na makapangusiat ku su Mapia a Tutuma sa da bayad'in, apia nia nin kaaden i aden kawagib ku sa katalima sa bayad kanu kabpangusiat ku kanu entu.
19 Na apia dikena aku ulipen na napaulipen aku kanu apia entain ka enggu madakel i mapangenggat ku sa kapaginugut. 20 Na sia kanu manga taw a pagidsan ku a Yahudi na naguyag-uyag aku sia kanu ukit'ilan asal'a mapangenggat ku silan. Apia nia nin kaaden i dikena aku den nasakup'u kasuguan nilan na 'bpaguyag-uyag aku sa kanu entu a ukit'ilan ka enggu ku silan mapangenggat sa kapaginugut. 21 Na sia menem kanu manga taw a da masakup'u kasuguan a su manga taw a dikena-Yahudi na naguyag-uyag aku sa mana kanilan a da masakup'u kasuguan asal'a mapangenggat ku silan sa kapaginugut. Ugaid'a dikena nia nin maena i dikena aku nasakup'u kasuguan nu Kadenan ka 'bpaginugutan ku su manga kasuguan nu Isa al-Masih. 22 Na sia menem kanu manga malubay pamun sa paginugut na iniluyud ku i ginawa ku kanilan asal'a makapagkabagel ku silan. Na ibpeluyud ku i ginawa ku kanu apia entain a taw ka aden a entu na makapalipuas ku su ped kanilan sa apia ngin a ukit. 23 Na penggulan ku su langun nu nia ka enggu makapayapat su Mapia a Tutuma ka enggu aku makaampit kanu palihala nu entu.
Su Kabibit kanu Ginawa
24 Ngintu, di nu katawan i sia kanu kapegkuya na langun nu pakukuya na 'bpaginapas sa kapanaban nin ugaid'a sakataw bu kanilan i 'bpanaban? Tembu sekanu na paginapas kanu sa mana su pakukuya ka enggu nu makua su balas'u. 25 Na langun na 'bpagamung sa kapedsigi na pembibiten nilan i ginawa nilan sa kakumpen lun asal'a manaban silan. Na penggulan nilan i entu ka enggu nilan makua su balas'ilan a balas a 'gkabinasa bun. Ugaid'a su lekitanu a makua a balas na di 'gkabinasa taman sa taman. 26 Tembu saki na dikena aku pedtalaguy sa dala 'bpaginapasen na ginawa ku atawa ka mana su pasusuntuk a dikena sambel i 'gkasuntuk'in. 27 Na pembibiten ku i ginawa ku enggu pegkumpenen ku sa tidtu-tidtu ka tabia bun ka sia kanu kaipus ku mangusiat kanu Mapia a Tutuma na saki i kadalan na balas.