Su Nanggula nu manga Kalukesan a Nabaluy a Upaman sa lekitanu
10
Manga lusud ku sa tian, na nia ku kalinian na katawan nu su nanganggula nu manga kaapuan tanu a manga Israil. Na langun nilan na tinapid'u Kadenan sa ukit a kinapamagatag-atag'u gabun kanilan taman sa nakalipag silan langun kanu midsisi a lagat. 2 Na sia nakanggulalan kanu kinapamagatag-atag'u gabun a entu kanilan enggu kanu kinalipag'ilan kanu midsisi a lagat na mana silan nasalawatan sa mabaluy a manga taw nu Musa.a 3 Na langun nilan na nakakan kanu pegken a initulun nu Kadenan.b 4 Nakainem bun silan langun kanu ig a initulun nu Kadenan a pinatuga nin ganat kanu watuc a midtatanggunut kanilan. Na su watu a entu na su Isa al-Masih. 5 Ugaid'a apia ka maitu na kadakelan kanilan i da kasuati nu Kadenan tembu ba namamatay silan kanu tawan-tawan a dalepa.6 Na su langun nu entu a nanggula na pabpagingat sa lekitanu asal'a di tanu den makapaginagkay sa kanggula sa mawag a mana su pinggula nilan. 7 Na da kanu semimba sa manga pegkakadenanen a mana su pinggula nu ped kanilan, ka nia nakadalem kanu kitab na “Su manga taw na namegkan enggu namanginem taman sa midsisigalaw silan sa subela.”d 8 Na di tanu a benal edsisina a mana su pinggula nu ped kanilan tembu duapulu enggu telu ngibu i minatay kanilan sa kanu nakasagay bu.e 9 Na di tanu bun batalun su Isa al-Masih a mana su pinggula nu ped kanilan tembu nabinasa silan sabap sa kinatuka na nipay kanilan.f 10 Na di tanu bun embuku a mana su pinggula nu ped kanilan tembu ba pinangimatayan silang nu malakalemut.h
11 Na nanggula su langun nu entu asal'a maumbal a upaman sa lekitanu enggu inisulat su entu ka enggu mabaluy a tutulu sa lekitanu a manga taw a 'bpaguyag-uyag sa saguna a timpu a mangagan den su kapegkapupus'u langun-langun. 12 Tembu mangingat su apia entain a taw a sia kanu ginawa nin na nakadtindeg sekanin sa mabagel ka aden a entu na basi maudtang. 13 Na su langun nu bataluan sa lekanu na 'gkadsalilidan bun a bataluan kanu manusia. Ugaid'a matidtu man su Kadenan enggu di nin man isugut a mabatalu kanu sa di nu magaga. Na u makauma sa lekanu su batalu, na sekanin bun i mumbal sa ukit asal'a katigkelan nu su entu.
14 Kagina ka maitu manga papedtayan ku, na tangkai nu su kasimba kanu manga pegkakadenanen. 15 Na sabap sa sekanu a manga taw na balaitungan, na pedtalun ku i nia sa lekanu ka sekanu den i mataw lun magitung u ngin i maena nu manga pedtalun ku a nia. 16 Na su kabpaginem tanu kanu tagayani a ipedsukul-sukul tanu na dikena ba tanda i entu sa nakaampit tanu kanu lugu nu Isa al-Masih?j Na su kapegkan tanu kanu pan a pedtebi-tebin tanu na dikena ba i entu tanda sa nakaampit tanu kanu badan nu Isa al-Masih? 17 Na apia madakel tanu na sakabadan tanu bu kagina satiman bu su pan a pidtebi-tebi tanu keman.
18 Na nia nu ilay na su manga taw a Israil. Dikena ba su 'bpamegkan kanu inigkurban na amung silan kanu galebekan sa kapedsimba sia kanu pegkurbanan?
19 Na ngin ba i maena nu pedtalun ku a entu? Su pegkakadenanen taman kanu pegken a iniapal lun na aden ba kabarakat'in? 20 Dala, ugaid'a nia ku pedtalun sa lekanu na su manga pegken a entu na iniapal'ilan kanu manga saitan, dikena kanu Kadenan. Na di ku kalilinian i makaluyud kanu kanu manga saitan. 21 Na di mapakay a minem kanu kanu tagayan nu Mapuluk enggu minem kanu bun kanu tagayan nu manga saitan.l Di bun mapakay a keman kanu kanu pegkanan nu Mapulu enggu keman kanu bun kanu pegkanan nu manga saitan. 22 Ka amaika maitu na pakapapangalikud tanu su Mapulu. Na ngintu, sekitanu pan besen i mabagel kumin sa lekanin?
Su Kanggalebek kanu Ngin i Makapugi kanu Kadenan
23 Nia kadtalu nu ped na “Mapakay a enggulan tanu su apia ngin a pegkiugan tanu,” ugaid'a dikena langun na entu na makagkapia enggu makagkabagel kanu taw. 24 Di tanu pagitungen i endaw bu i makagkapia kanu ginawa tanu ka nia tanu pagitungen na endaw i makagkapia bun kanu ped tanu. 25 Mapakay a kanen nu su apia ngin a sapu a pebpasan lu sa padian. Di nu den 'bpelidui sa ginawa su manga idsa na ginawa nu makapantag sa entu. 26 Kagina nia nakadalem kanu kitab na “Kanu Kadenan a Mapulu su dunia enggu su langun nu nakadalem lun.”m
27 Na apia entain i mangenggat sa lekanu keman a dikena 'bpaginugut enggu pegkiug kanu bun pedtalabuk na kan nu su apia ngin a italagad'ilan sa lekanu sa di nu den 'bpelidui sa ginawa su manga idsa nu ginawa nu sa entu. 28 Ugaid'a amaika aden menem edtalu sa lekanu sa “Su nia a pegken na iniapal kanu pegkakadenanen” na di nu keman su entu sabap kanu taw a entu a midtalu sa lekanu enggu asal'a da den mabulibug sa entu. 29 Na dikena nia ku pedtalun i ginawa nu i 'gkabulibug ka su ginawa nu midtalu sa entu.
Na aden a entu na aden edtalu sa lekanu sa “Enduken ka 'gkapelen su baya-baya ku sabap bu sa kapegkabulibug'a ginawa nu ped? 30 Enduken ka 'gkadaway aku sabap bu kanu kapegkan ku kanu pegken a inidsukul-sukul ku kanu Kadenan?” 31 Kagina ka maitu na nia ku madtalu sa lekanu na enggula nu su langun nu entu magidsan pan i sia kanu kapegkan nu atawa ka kabpaginem'u atawa ka apia ngin a galebek'u sa makapugi kanu Kadenan. 32 Na da kanu enggula sa apia ngin a kadsabapan na kagebpa nu manga taw, magidsan i Yahudi atawa ka dikena-Yahudi taman kanu manga taw a nalusud kanu Kadenan. 33 Na maitu aku bun ba, 'bpaginapasen ku i masuat ku su langun sa kanu apia ngin a penggulan ku. Dikena ku man nia pebpapangilayn i kapianan ku ka su kapianan nu madakel ka basi malipuas bun silan.