Sulat kanu Manga Taw sa Ruma
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na inisulat'u mama a bedtuan sa Bulus a pinamili nu Isa al-Masih sa ukit a kinabpapayag'in lun ka enggu makapayag su Mapia a Tutuma kanu manga taw. Lu i nia pakatumpa kanu lumpukan nu 'bpamaginugut sa dalepa a Ruma. Su kinasulat'i Bulus sa nia na sia kanu pageletan nu manga lagun a 50 taman sa 54 ulian nu kinambata kanu Isa al-Masih.
Na nakadalem kanu nia a sulat su kahanda ni Bulus a makakap'in su 'bpamaginugut sa dalepa a Ruma ka enggu nin silan makapagkabagel enggu makasabpet'in kanilan su ukit a kapaginugut a sia makanggulalan kanu kasalig.
Pegkiugan ni Bulus papegkalendem kanu manga taw sa Ruma i langun na taw na mindusa, dala isa bu a ikelas sia kanu adapan nu Kadenan ka mindusa langun su taw enggu dala isa bu a makagaga magikelas kanu ginawa nin. Langun na taw na pakanasisita sa kalipuasan sia kanu Kadenan.
Nakadalem bun kanu nia a sulat i dala taw a makatimbang sa ikelas sa kanggulalan nin sa kasuguan nu Kadenan ka dala man taw a makatalutup enggulalan kanu langun nu kasuguan. Ugaid'a makatimbang sa ikelas su taw amaika aden salig'in a mana bun su Nabi Ibrahim a initimbang sa ikelas sabap kanu salig'in dikena sabap kanu kinanggulalan nin kanu kasuguan. Na su kasuguan na nia ba i pebpagilay sa baladusa su taw. Na makatimbang sa ikelas su taw amaika aden salig'in kanu Isa al-Masih ka su Isa al-Masih man su nabputusan nu kasuguan kagina sia nakanggulalan sa lekanin su kalipuasan.
Na nakadalem bun sia i su taw a initimbang sa ikelas na dait a maguyag-uyag sa ukit a kapaguyag-uyag a dait kanu taw a initimbang sa ikelas. Na di den wagib a italus'in pan su kabaladusan a galebek ka dikena den sekanin ulipen nu kabaladusan ka ulipen den sekanin nu Kadenan taman sa nia den pendatu sa lekanin na su Suti a Ruh nu Kadenan.
Nakadalem bun sia su pantag kanu kinapamili nu Kadenan kanu manga taw nin a su manga taw a Israil enggu su kinakias'ilan a sabapan na kinasabpet'u kalipuasan kanu manga taw a dikena-Yahudi sia makanggulalan kanu kasalig'ilan kanu Isa al-Masih. Ugaid'a mauma bun i timpu a embalingan bun su manga taw a Israil kanu Kadenan taman sa malipuas bun silan.