Sulat kanu Manga Taw sa Ruma
Su Salam
1
Salam sa lekanu. Saki si Bulus a ulipen nu Isa al-Masih a napamili nin a masugu nin. Na inisenggay aku nu Kadenan a makapangusiat kanu Mapia a Tutumaa a ebpun sa lekanin. 2 Na su Mapia a nia a Tutuma na inibpasad den nu Kadenan kanu nangauna pan a timpu sia nakanggulalan kanu manga nabi sia kanu Suti a Kitab. 3-4 Na makapantag su nia kanu Tunggal'in a su Isa al-Masih a Mapulu tanu. Na nabaluy sekanin a manusia sia nakanggulalan kanu kinambata lun nu tupu nu Nabi Daudb enggu talanged sekanin a Barakat a Tunggal'u Kadenan sia kanu kinambibiag'in 'bpaluman sia nakanggulalan kanu Suti a Ruh. 5 Na sia nakanggulalan sa lekanin na natalima nami su limu sa kinabaluy nin sa lekami a masugu nin. Ka nia nin pigkahanda na kanu langun nu bangsa na aden makapaginugut sa lekanin sia makanggulalan sa kasalig lun ka enggu mapugi su ingala nin. 6 Na isa kanu bun kanu manga taw a napamili a malusud kanu Isa al-Masih.7 Na su langun nu a napamili a san sa Ruma a ipegkalimu nu Kadenan enggu nasuti sabap kanu Isa al-Masih na san sa lekanu su da idsan nin a limu enggu kalilintad a ebpun kanu Ama tanu a su Kadenanc enggu kanu Mapulu tanu a su Isa al-Masih.
Su Kahanda ni Bulus sa Kabpelu nin sa Ruma
8 Nia muna-muna na pedsukul-sukul aku kanu Kadenan sabap sa lekanu sia makanggulalan kanu Isa al-Masih, kagina su salig'u na 'gkakineg den kanu embala-bala sa dunia. 9 Na su Kadenan a penggalebekan ku sa senep sa atay sia pakanggulalan kanu kabpangusiat ku kanu Mapia a Tutuma pantag kanu Tunggal'in na sekanin i saksi sa tatap ku sekanu ibpangeni-ngeni. 10 Na tatap ku bun ibpangeni-ngeni i sugutan den nu Kadenan i makasan aku sa lekanu 11 ka 'gkalilinian ku den a benal i makapagilaya ku sekanu ka enggu ku makasampay sa lekanu su palihala a ebpun kanu Suti a Ruh a makapagkabagel sa lekanu 12 atawa ka makagkabagel sa lekitanu sia makanggulalan kanu salig tanu sa lekanin.
13 Manga lusud ku sa tian, papegkatawan ku sa lekanu i nakapila aku den pegkahanda sa kasan ku sa lekanu ugaid'a di aku pakabaluy sabap sa aden pan pamakaungen sampay saguna. Nia ku kiug na makaunga sa mapia su kasan ku sa lekanu a mana bun su pinggula ku kanu manga ped pan a manga taw a dikena-Yahudi. 14 Na nakabpaliugat man sa laki i kapangusiat ku kanu Mapia a Tutuma kanu manga taw a magidsan pan i nakasabut atawa ka dala makasabut, nakapangagi atawa ka dala makapangagi. 15 Na namba i sabap'in i kapegkiug ku a benal sa kapangusiat ku kanu Mapia a Tutuma san sa lekanu a san sa Ruma.
16 Ka di ku man a benal ikaya su Mapia a Tutuma ka nia ba man su kapegkagaga nu Kadenan a makapalipuas kanu apia entain a semalig sa dikena bu kanu manga taw a Yahudi ka apeg den nu manga taw a dikena-Yahudi. 17 Kagina sia kanu Mapia a Tutuma na nakapayag su ukit'u Kadenan sa katimbang'in sa ikelas kanu taw sia sa lekanin. Na sia bu i entu makanggulalan kanu kasalig a mana bun su nakadalem kanu kitab a “Su taw a initimbang sa ikelas sia nakanggulalan kanu kasalig na maaden lun su uyag-uyag a da taman nin.”d
Su Kabaladusan nu Manusia
18 Na inipayag den man nu Kadenan a lu sa sulega su lipunget'in sabap kanu langun nu kamustakilan enggu kadupangan a galebek'u taw a pakaungen sa katuntay kanu bantang. 19 Kagina u ngin i dait a katuntayan pantag kanu Kadenan na mapayag den a benal kanilan, kagina inipayag den sa mapia nu Kadenan i entu kanu taw. 20 Iganat pan sa kinapangaden na inipayag den nu Kadenan u entain sekanin sa apia nia nin kaaden i di sekanin 'gkailay sa matakapala. Ka sia kanu manga pinangaden nin na mailay nengka su da kapegkapupus'in a kabarakat'in enggu su Kakadenan nin, tembu ba dala man makadawa nu taw kanu Kadenan 21 ka apia katawan nilan bun i makapantag kanu Kadenan na dala nilan enggi sa pugi enggu dala nilan demun edsukul-sukuli ka makin nia nilan pinamagitung na su manga dala katagan nin a galebekan taman sa naawan silan na katuntay kanu ngin i mapia. 22 Na matag'ilan pedtalun i mangategel silan ugaid'a nia nin 'gkaliuwan na dala sabut'ilan. 23 Dala nilan simba su Kadenan a da taman nin enggu da idsan nin i kabarakat'in ka nia nilan sinimba na su pegkakadenanen nilan a pinambuntal'ilan sa manusia atawa ka papanuk, binatang atawa ka manga malanap-lanap a 'gkapupus bun.
24 Tembu ba pinadtaday silan nu Kadenan kanu manga maledsik a kiug'u ginawa nilan taman sa pinggula nu uman i isa kanu ped'in su pakayaya a galebek. 25 Kagina su kabantang'u Kadenan na sinambian nilan sa kabudtud, nia nilan sinimba na su pinangaden kumin kanu nangaden a dait a entu ba i simban enggu pugin taman sa taman, amin!
26 Na sabap sa entu na makin silan pinadtaday nu Kadenan sa kakiug'ilan enggalebek kanu pakayaya a kiug'u ginawa nilan. Su manga babay na tinagak'ilan su nakaalus a ukit a kapegkalilinia ka nia nilan den ipegkalilinia na su pagidsan nilan bun a babay. 27 Maitu bun ba su manga mama, tinagak'ilan su nakaalus a kapegkalilinia sa babay ka nia nilan den 'gkalilinian na su pagidsan nilan bun a mama. Nia den pegkalilinia na mama den sa mama. Na sabap sa entu na natalima nilan su kasiksan a nakawagib kanilan.
28 Na kagina ka dala nilan enggi sa alaga su ngin i makapantag kanu Kadenan na makin mambu silan pinadtaday nu Kadenan sa kanu kapagitung'ilan a di pamakatidtu taman sa di den pakasugat su penggalebeken nilan. 29 Napenu-penu silan nu langun nu embalangan na kamustakilan a galebek a mana su kadaluaka, di kasukul, mawag a kahanda, katangalikud, katalibunu, kapamagukag, kasalimbut, kangguniat sa dikena mapia, kapamagedunga, 30 kapamelibak, kabensi kanu Kadenan, kamamasela, kasandag, kaambug, kapagitung sa mawag a galebek, di kapalitiala sa lukes, 31 kada na sabut kanu ngin i mapia, di kasaligan, di malimu enggu dala lat a nanam'in. 32 Na 'gkatawan nilan bun su atulan nu Kadenan sa kanu manga maitu ba a galebekan sa dait a mataye su apia entain a penggula sa maitu ba. Ugaid'a apia ka maitu na dikena nilan bu penggulan su entu ka 'gkapia pan i ginawa nilan kanu ped a manga taw a penggula sa manga maitu ba a galebekan.