Su Wagib a Kukuman nu Kadenan
2
Tembu ba da den makadawa na apia entain a pedsugat sa kawagib kanu ped'in. Ka u ngin man i ipedsugat'engka sa kawagib kanu ped'engka na ipedsugat'engka bun kanu ginawa nengka kagina penggulan nengka bun su ngin i penggulan nilan. 2 Na katawan tanu man i su kukuman nu Kadenan na wagib kanu manga taw a penggula kanu manga maitu ba a galebekan. 3 Na seka a pedsugat sa kawagib kanu maitu ba a manga taw ugaid'a penggulan nengka bun su penggulan nilan na nia nengka kataw ka mapukas ka kanu kukuman nu Kadenan? 4 Ngintu, di nengka pakatagu sa ginawa su sangat a kakalimu nu Kadenan, su kasabal'in enggu su katigkel'in? Na di nengka demun 'gkapagitung i su kakalimu nu Kadenan na entu ba i 'bpagagak sa leka sa kadtaubat'engka. 5 Ugaid'a sabap kanu kategas'u ulu nengka enggu di nengka kadtaubat na makin nengka pakapapangiseg su siksa nu Kadenan sa leka u mauma den su gay a kapagedam'in kanu lipunget'in sia kanu timpu a ipayag den su wagib a kukuman nin. 6 Na balasan nin man su apia entain sia luyud kanu ngin i pinggalebek'in. 7 Na makatalima sa uyag-uyag a da taman nin su taw a 'bpaginapas penggula sa mapia enggu nia nin 'gkapaginagkay na mapugi enggu badtugen sekanin nu Kadenan enggu maaden lun su uyag-uyag a da taman nin. 8 Ugaid'a su taw menem a nia nin bu 'gkapagitung na su ginawa nin enggu dikena nia nin 'bpagunutan su bantang ka nia nin 'bpagunutan na su dikena mapia, na nia nin matalima na su tidtu-tidtu a lipunget'u Kadenan. 9 Ka apia entain i penggalebek sa kadaluakan na temala sa tidtu-tidtu a kamalasayan enggu kapasang sa dikena bu kanu manga taw a Yahudi ka apeg den nu manga taw a dikena-Yahudi. 10 Ugaid'a apia entain menem i penggalebek sa mapia na pugin enggu badtugen sekanin nu Kadenan taman sa lu sa lekanin su kalilintad sa dikena bu kanu manga taw a Yahudi ka apeg den nu manga taw a dikena-Yahudi. 11 Kagina su Kadenan na di man mapambidaya. 12 Ka su taw a pembaladusa a da masakup'u kasuguan nu Musaa na masugat'a kawagib sa masiksa sa dikena sia luyud kanu kasuguan. Na su taw menem a pembaladusa a nasakup'u kasuguan na masugat'a kawagib sia luyud kanu kasuguan. 13 Ka nia man ipedtimbang'u Kadenan sa ikelas na su taw a penggulalan kanu kasuguan dikena su taw a matag bu 'bpamakikineg kanu kasuguan. 14 Na amaika su taw a dikena-Yahudi a dala sa lekanin su kasuguan ugaid'a pakanggulalan nin su kasuguan sia kanu manga galebek'in na mana bun aden sa lekanin su kasuguan. 15 Na pakapailay nin i su kasuguan nu Kadenan na sia kanu pamusungan nin. Su ginawa nin bun mismu i pakapaamad sa entu enggu pedtalu sa mapia atawa ka mawag su penggalebeken nin. 16 Na entu bun ba i pegkandutan nu Kadenan sa kakukum'in sia makanggulalan kanu Isa al-Masih kanu da mapayag a 'gkapamagitung'u manga taw a mana bun su nakadalem kanu Mapia a Tutuma a ibpangusiat ku.Su manga Yahudi enggu su Kasuguan
17 Na seka a nan a pedtawagen nengka i ginawa nengka sa Yahudi, pedsaligan nengka su kabpaginugut'engka kanu kasuguan enggu ibpemamasela nengka i luyud ka kanu Kadenan, 18 'gkasabutan nengka kun su kahanda nu Kadenan enggu 'gkatawan nengka u ngin i 'gkaalus a manga galebekan kagina napamandu ka kun sia kanu kasuguan 19 taman sa 'gkatalanged'engka sa ginawa nengka i seka i pakaagak kanu manga taw a pamakasibay. Palitan ka kun kanu manga taw a sia kanu kalibutengan 20 enggu papedtuntay ka kun kanu manga taw a di gaid mamakatuntay enggu 'bpamandu kanu manga taw a mana wata pamun i itungan nin kagina 'bpaginugutan nengka i su kasuguan a san sa lekanu na lu ba matun su ilemu enggu su kabantang. 21 Na amaika maitu sa 'gkapamandu nengka su ped a taw na ngintu ka di nengka 'gkapamandu su ginawa nengka? Ibpamandu nengka i di kapanegkaw ugaid'a seka mismu na 'bpanegkaw. 22 Pedtalun nengka i di mapakay a 'gkiuga ugaid'a seka mismu na pegkiuga. Na di nengka bun a benal 'gkalilinian su manga pegkakadenanen ugaid'a 'bpamanegkawan nengka su manga walay a pedsimban kanu manga pegkakadenanen. 23 Ibpemamasela nengka i su kasuguan na sia sa lekanu ugaid'a pakapagkaya nengka su Kadenan sabap kanu kapedsungkang'engka kanu kasuguan. 24 Ka mana bun man su nakadalem kanu kitab a “Sabap sa lekanu na 'gkasakutu nu manga taw a dikena-Yahudi su ingala nu Kadenan.”b
25 Na pembalapantag bu man su inibpaliugat a kapapaletakc amaika ipenggulalan nu su kasuguan ugaid'a amaika di nu ipenggulalan su entu na su kinapaletak sa lekanu na da bun katagan nin. 26 Ugaid'a amaika ka su da mapaletak a manga taw a su dikena-Yahudi ka pakanggulalan nilan su kasuguan na timbang a silan i tidtu a napaletak. 27 Na su manga taw a nia a da mapaletak ugaid'a pakanggulalan nilan su kasuguan na pakapailay nilan i 'gkawagiban kanu a nadtalu a napaletak kagina apia san sa lekanu su kasuguan na pedsungkangen nu su entu. 28 Ka di man madtalu a Yahudi i taw amaika sabap bu sa nanggulugu nin su entu enggu nadtalu a napaletak. 29 Ka nia man tidtu-tidtu a taw a Yahudi na su taw a nabagud i pamusungan nin sia luyud kanu Suti a Ruh, dikena sia luyud kanu kasuguan. Na su maitu ba a taw na makatalima sa pugi a ebpun kanu Kadenan dikena ebpun kanu manusia.