3
Amaika maitu na ngin ba i kapianan nu kayahudi nu taw? Ngin i kabalapantag'in su kapapaletak? 2 Su kayahudi nu taw na madakel bun i kapianan nin. Nia muna-muna sia na su manga Yahudi na silan i sinaligan kanu manga kadtalu nu Kadenan. 3 Ugaid'a panun basi amaika su ped kanilan na di 'bpaginugut sa entu? Na ngintu, nia nin maena na kakulangan su katuman nu Kadenan kanu ngin i inibpasad'in? 4 Dili! Ka apia nia nin man kaaden i endalebut su langun nu taw na matidtu su Kadenan a mana bun su nakadalem kanu kitab a“Tembu ba pakawagib ka kanu kadtalu nengka
enggu seka bun i pakawagib kanu kukuman nengka.”a
5 Na aden a entu na aden edtalu sa “Amaika su kapembaladusa tanu ka labi a pakapailay kanu katidtu nu Kadenan na ngintu, nia nin maena na dikena wagib a siksan tanu nu Kadenan sa entu?” (Na su nia ba na mana bun su manga dalinan nu manusia.) 6 Dili! Ka amaika maitu na panun pan ba i kakukum'u Kadenan kanu dunia? 7 Aden a entu menem na aden edtalu sa lekanu sa laki sa “Amaika su di ku katidtu ka pakapailay sa katidtu nu Kadenan taman sa pakaenggay sa lekanin sa pugi, na ngintu ka dait pan a siksan aku nin sa kanu kabaladusan ku?” 8 Ngintu ka dikena nia edtalun i “Embaladusa tanu ka enggu 'bpeliu su ngin i mapia” a mana bun su kadtalu nu ped a taw a sungkang sa lekami sa maya ta kun sa maitu ba i ibpamandu nami? Na su maitu ba a manga taw na dait kanilan su siksa nu Kadenan.
Da man Taw a Ikelas
9 Na ngin i kataw nu, sekitanu a manga Yahudi na labi a mapia kumin kanu manga taw a dikena-Yahudi? Dikena! Ka mana bun su nalabit ku a entu a su langun na taw na naulipen nu kabaladusan magidsan pan i Yahudi atawa ka dikena-Yahudi 10 a mana bun su nakadalem kanu kitab a
“Da man ikelas a taw, apia sakataw;
11 apia sakataw na dala pakatuntay sa ngin i bantang, dala isa bu a 'bpangilay kanu Kadenan.
12 Langun na taw na nakasibay, nabaluy silan a da den katagan nin.
Da den penggula sa mapia, apia sakataw.”b
13 “Su ngali nilan na mana minggeba a lebeng;
su dila nilan na 'bpagusalen nilan sa kabpamagakal.”c
“Su bibil'ilan na mana bisa na nipay.”d
14 “Su ngali nilan na napenu na kapamelawak enggu sakit'a ginawa.”e
15 “Su ay nilan na adil a benal sa kaangay nin sa kaimatay.
16 Apia endaw silan 'bpawang na kagkaidan nilan su taw enggu mabinasa nilan,
17 di nilan katawan su lalan sa kalilintad.”f
18 “Da gilek'ilan kanu Kadenan.”g
19 Na 'gkatawan tanu i su ngin i nakadalem kanu kasuguan na nia nin 'gkasugat na su manga taw a nasakup'u entu ka enggu da makadawa nu apia entain. Na su langun na taw na semangul man sa kukuman nu Kadenan. 20 Na di makatimbang sa ikelas su apia entain a taw kanu Kadenan sia kanu kanggulalan nin kanu kasuguan.h Ugaid'a sabap kanu kasuguan na kaimamanan nu taw i baladusa sekanin.
Su Ukit a Kaikelas'u Taw
21 Na saguna, na nakapayag den u panun i katimbang'u Kadenan sa ikelas kanu apia entain sa dikena sia makanggulalan kanu kasuguan. Na naamad bun i entu sia kanu kasuguan a inisulat'u Musa enggu kanu inisulat'u ped pan a manga nabi, 22 sa nia katimbang'u Kadenan sa ikelas kanu apia entain a mamaginugut na sia makanggulalan kanu kasalig'ilan kanu Isa al-Masih. Ka da den man kambidayan nu taw 23 kagina su langun na taw na mimbaladusa, dala ikelas kanu adapan nu Kadenan a suti sa langun. 24 Ugaid'a sabap kanu da idsan nin a limu nu Kadenan a inenggay nin kanu manusia na makatimbang sa ikelas su taw sia makanggulalan kanu kapalipuas'u Isa al-Masih kanilan. 25 Sekanin i sinugu nu Kadenan a mabaluy a kurban asal'a maampun su kabaladusan nu taw sia makanggulalan kanu kinatuga nu lugu nin.i Na matalima nu taw su kaampun kanilan sia makanggulalan kanu kasalig'ilan sa lekanin. Na pinggula nu Kadenan i entu asal'a makapailay nin i wagib sekanin apia nia nin kaaden i pinalampas'in muna su kabaladusan nu taw kanu paganay sabap kanu katigkel'in. 26 Na pinggula nu Kadenan i entu ka enggu nin pakapailay saguna i wagib sekanin enggu itimbang'in sa ikelas su apia entain a semalig kanu Isa al-Masih.
27-28 Tembu ba da makamamasela tanu ka initimbang tanu sa ikelas dikena sabap kanu kapenggulalan kanu kasuguan ka sabap kanu kasalig kanu Isa al-Masih. Na entu ba i 'bpaginugutan tanu. 29 Na su Kadenan na dikena bu Kadenan nu manga taw a Yahudi ka Kadenan bun nu manga taw a dikena-Yahudi 30 kagina isa bu man su Kadenan. Na ipedtimbang'in sa ikelas su manga taw a Yahudij a semalig kanu Isa al-Masih enggu su manga taw a dikena-Yahudik a semalig bun kanu Isa al-Masih. 31 Na amaika maitu na nia nin maena na 'bpagawan tanu sa katagan su kasuguan sabap kanu kasalig? Dikena! Ka makin tanu pan 'gkaenggan sa katagan su kasuguan sia makanggulalan kanu kasalig.