Su Nabi Ibrahim i Upaman sa Katimbang sa Ikelas kanu Taw
4
Na nia upaman makapantag sa entu ba na su kaapu-apuan tanu a su Ibrahim. 2 Ka mana bu man ka initimbang sekanin sa ikelas sabap kanu pinggalebek'in na aden makamamasela nin. Ugaid'a dikena maitu, tembu ba dala makamamasela nin kanu Kadenan. 3 Ka nia man nakadalem kanu kitab na “Su Ibrahim na sinemalig kanu Kadenan. Na sabap sa entu na initimbang sekanin nu Kadenan sa ikelas.”a 4 Ka upama ka su taw a minggalebek ka nakatalima sa bayad na dikena i entu inenggay sa lekanin ka bayad i entu kanu pinggalebek'in. 5 Ugaid'a su taw a nia nin pedsaligan na su Kadenan, dikena nia nin pedsaligan su galebek'in na entu ba i ipedtimbang'u Kadenan sa ikelas, ka su Kadenan man i pedtimbang sa ikelas kanu manga taw a baladusa a pedsalig sa lekanin. 6 Nadtalu bun nu Nabi Daud i mapia den a benal kanu taw a ipedtimbang'u Kadenan sa ikelas sa dikena sabap kanu manga galebek'in, sa nia nin pidtalu na7 “Mapia den a benal kanu manga taw a inampun nu Kadenan su manga galebek'in a mawag
taman sa napunas su kabaladusan nin.
8 Mapia den a benal kanu taw a ipedtimbang'u Kadenan a Mapulu
sa da den kabaladusan nin.”b
9 Na ngintu, su kapianan a nia na kanu manga taw bu a napaletak a su Yahudi? Dikena! Ka apia su manga dala mapaletak a su dikena-Yahudi na amung sa entu. Na mana bun su nalabit ku a entu a su Nabi Ibrahim na initimbang'u Kadenan sa ikelas sabap kanu salig'in. 10 Na kanu basi i kinatimbang'u Kadenan sa ikelas kanu Ibrahim? Initimbang sekanin a ikelas unan pan nu kinapaletak lun, dikena ulian nu entu. 11 Na su kinapaletak lun na tanda bu i entu sa initimbang den sekanin a ikelas sabap kanu salig'in sa apia kanu timpu a da pan sekanin mapaletak. Na nia kahanda nu Kadenan sa entu na mabaluy sekanin a ama nu langun nu semalig kanu Kadenan magidsan pan i dala mapaletak a initimbang sa ikelas sabap kanu salig'ilan 12 enggu kanu manga taw a napaletak a sinemalig kanu Kadenan a mana bun su kaapuan tanu a su Ibrahim a sinemalig den unan pan nu kinapaletak sa lekanin.
Su Ukit a Katalima kanu Pasad'u Kadenan
13 Na dikena man sia nakanggulalan kanu kasuguan i kinatalima nu Nabi Ibrahim kanu pasad'u Kadenan sa ibpusaka nin sa lekanin su sakadunia taman kanu manga tupu nin ka sia nin natalima su entu kanu kinatimbang lun sa ikelas sabap kanu salig'in. 14 Na amaika man ka su manga taw bu a nasakup'u kasuguan i makatalima kanu ipebpusaka nu Kadenan a entu na dala maitu katagan nin su kapedsalig lun enggu su pasad'u Kadenan na dala bun maitu katagan nin. 15 Ka su kasuguan na nia nin man 'gkaunga na kasiksan nu Kadenan. Na dala taw a makasungkang sa kasuguan u dala kasuguan.
16 Namba i sabap'in i su pasad'u Kadenan na sia makanggulalan kanu kasalig ka enggu matalima su entu sa da bayad'in enggu matalanged i matalima i entu nu langun nu tupu nu Nabi Ibrahim a dikena bu kanu manga taw a nasakup'u kasuguan ka apeg den nu manga taw a da masakup'u kasuguan a aden salig'in a mana bun su Nabi Ibrahim. Ka langun tanu man na sekanin i nabaluy a ama tanu sa paginugut, 17 a mana bun su nakadalem kanu kitab a “Baluyn ku seka a ama nu madakel a bangsa.”c Tembu sia kanu adapan nu Kadenan na su Nabi Ibrahim i nabaluy a ama tanu. Su Kadenan a nia a 'bpaginugutan nin na su Kadenan a pakapambibiag kanu namamatay enggu pakapangaden kanu dala. 18 Tembu ba apia nia nin kaaden i da den inam sa mabaluy pan a ama nu manga bangsa su Ibrahim ugaid'a mana i su Ibrahim na da sekanin kaawi na inam sa tumanen nu Kadenan su inibpasad'in lun a “Mana kadakel'u bitun su mabaluy a tupu nengka.”d 19 Na dala 'gkalubay su salig'in apia nia nin kaaden i su badan nin na malubay den ka manga magatus lagun den i umul'in sa entu. Na su kaluma nin menem a si Sara na di embata. 20 Na dala a benal sekanin enggeda-geda sa di matuman su entu a pasad'u Kadenan sa lekanin ka makin pan pegkabagel su salig'in taman sa pebpugin nin pan su Kadenan 21 kagina masela i inam'in sa kapegkagaga nu Kadenan sa katuman nin sa kanu pasad'in sa lekanin. 22 Tembu ba sabap sa entu a salig'in na initimbang sekanin sa ikelas. 23 Na su nia a kadtalu a “Initimbang a ikelas” na dikena bu sa lekanin 24 ka taman den sa lekitanu. Sekitanu na itimbang'u Kadenan sa ikelas amaika semalig tanu sa lekanin a napambibiag 'bpaluman kanu Mapulu tanu a su Isa al-Masih. 25 Na minatay su Isa al-Masih sabap kanu kabaladusan tanu enggu pinambibiag bun sekanin 'bpaluman nu Kadenan ka enggu tanu makatimbang sa ikelas.