Su Unga nu Katimbang'u Kadenan sa Ikelas kanu Taw
5
Na kagina ka maitu na sabap sa initimbang tanu den a ikelas sia nakanggulalan kanu salig tanu na nia nin maena na nakambalingan tanu den kanu Kadenan sia nakanggulalan kanu Mapulu tanu a su Isa al-Masih. 2 Na sabap bun sa lekanin na nalusud tanu den kanu da idsan nin a limu nu Kadenan sia nakanggulalan kanu salig tanu taman sa 'gkagalaw tanu sabap kanu inam tanu sa malusud tanu kanu sigay nin. 3 Nia pan liu sa entu, na sia kanu kapedtala tanu sa manga kamalasayan na magalaw tanu kagina katawan tanu i su kamalasayan na nia nin unga na katigkel, 4 na nia unga nu katigkel na su ula-ula a kabagel a tindeg, na su ula-ula a kabagel a tindeg na nia nin unga na inam. 5 Na su inam a nia na di 'bpelis kagina pinalangkap den nu Kadenan kanu atay tanu su limu nin a sia nakanggulalan kanu Suti a Ruh a inenggay nin sa lekitanu.6 Ka kanu timpu man a da den kapegkagaga tanu sa kalipuas tanu, na entu bun ba mambu su gay a inadil'u Kadenan sa kanggihad'u Isa al-Masih kanu umul'in asal'a malipuas tanu a manga baladusa. 7 Na malegen nengka a benal matun i taw a inggihad'in i umul'in apia sabap pan kanu ikelas a taw, apia nia nin kaaden i basi aden bun matun a taw a inggihad'in i umul'in sabap kanu taw a mapia i palangay nin ugaid'a madelag a benal su entu. 8 Ugaid'a su Kadenan na inipailay nin su limu nin sa lekitanu sia kanu kinanggihad'u Isa al-Masih kanu umul'in sabap sa lekitanu kanu timpu a baladusa tanu pan. 9 Na kagina ka nakatimbang tanu den sa ikelas sabap kanu kinatuga nu lugu nu Isa al-Masih na labi a natatalanged tanu i malipuas tanu den kanu lipunget'u Kadenan sia makanggulalan sa lekanin. 10 Ka apia kanu timpu a sungkang tanu pan kanu Kadenan ka inimbalingan tanu nin sa lekanin sia nakanggulalan kanu kinapatay nu Tunggal'in na labi a natatalanged tanu i malipuas tanu den sabap kanu kinapambibiag lun 'bpaluman. 11 Liu pan sa entu, na enggalaw-galaw tanu kanu Kadenan sabap kanu pinggula nu Mapulu tanu a su Isa al-Masih a sabapan na kinambalingan tanu kanu Kadenan.
Su Kambidayan nu Nabi Adam enggu su Isa al-Masih
12 Na su kadusan na nakatingguma sia sa dunia sia nakanggulalan kanu sakataw a taw. Na nia unga nu kadusan na su kapatay,a na sabap sa entu na nakatuki su kapatay kanu langun nu taw kagina nakandusa su langun nu taw sabap sa entu ba. 13 Na unan paman nu kinapangaden kanu kasuguan na sia den sa dunia su kadusan ugaid'a dikena pan i entu pakatimbang sa kasungkang kanu kasuguan kagina dala pan kasuguan sa entu. 14 Ugaid'a apia ka maitu na unan pan nu timpu nu Nabi Musa na mindatu den sa dunia su kapatay apia kanu manga taw a dala embaladusa sa mana kanu kinambaladusa nu Nabi Adam sa kinasungkang'in kanu inisugu nu Kadenan.
Na su Nabi Adam na sekanin su tuladan nu Isa al-Masih a 'bpangingapan a pakauma. 15 Ugaid'a embidaya a benal su ibpangenggay nu Kadenan enggu su kinasungkang ka amaika sabap kanu kinasungkang'u sakataw a taw ka madakel i minatay na labi den a namelapay su limu nu Kadenan kanu madakel a taw sia nakanggulalan kanu da idsan nin a limu nu sakataw a taw a su Isa al-Masih. 16 Na su unga nu limu nu Kadenan a ibpagenggay nin na embidaya a benal kanu unga nu kinandusa nu sakataw a taw. Kagina su kadusan nu sakataw a entu a taw na nia nin unga na kasiksan. Ugaid'a su limu nu Kadenan a ibpagenggay nin na nia nin unga na katimbang sa ikelas kanu taw apia nia nin kaaden i madakel a benal i kinambaladusa nilan. 17 Na amaika su kinambaladusa nu sakataw a taw ka nadsabapan na kinandatu nu kapatay kanu manga taw, na maitu bun ba, sabap bun kanu sakataw a taw a su Isa al-Masih na labi a maaden su uyag-uyag a da taman nin kanu manga taw a makatalima kanu 'bpamelapay a limu nu Kadenan enggu itimbang'u Kadenan sa ikelas.
18 Na nia nin maena na sabap man kanu kinandusa nu sakataw a taw na dait a masiksa su langun nu taw ugaid'a sabap bun kanu kaikelasan a pinggula nu sakataw a taw na makatimbang sa ikelas su langun na taw taman sa maaden kanilan su uyag-uyag a da taman nin. 19 Ka sabap man kanu kinasungkang'u sakataw a taw na madakel i mimbaladusa ugaid'a sabap bun kanu kinabpatiunut'u sakataw a taw na madakel i makatimbang sa ikelas.
20 Na guna embuat su kasuguan na makin nangiseg i kapembaladusa ugaid'a u ngin i kabpangiseg'u kapembaladusa na labi den i kabpangiseg'u limu nu Kadenan a ibpagenggay nin. 21 Tembu ba u ngin i kinandatu nu kabaladusan kanu taw a nia nin unga na kapatay na maitu bun ba i kandatu nu limu nu Kadenan sia kanu kapedtimbang'in sa ikelas kanu taw a nia nin unga na uyag-uyag a da taman nin a sia makanggulalan kanu Mapulu tanu a su Isa al-Masih.