Su Bagu a Uyag-uyag sia kanu Isa al-Masih
6
Na ngin i madtalu tanu sa entu? Ngintu, makin tanu papanalusen su kapenggalebek tanu sa kabaladusan asal'a mangiseg su kakalimu nu Kadenan sa lekitanu sia makanggulalan kanu kapangampun nin? 2 Dili! Ka sekitanu na timbang a minatay tanu den sia kanu kabaladusan tembu di den dait a maguyag-uyag tanu pan sa maitu ba. 3 Ngintu, di nu katawan i langun tanu a nasalawatan sia kanu Isa al-Masih na unut tanu bun kanu kinapatay nin? 4 Nia nin maena na timbang a nakaamung tanu sa lekanin sa kinalebeng lun sia kanu kinapatay nin. Na mana bun kanu kinapambibiag 'bpaluman kanu Isa al-Masih sia nakanggulalan kanu kabarakat'u Kadenan, na maitu tanu bun ba makapaguyag-uyag tanu bun kanu bagu den a uyag-uyag sia kanu Isa al-Masih.5 Ka amaika nakaamung tanu kanu Isa al-Masih kanu kinapatay nin, na natatalanged a nakaamung tanu bun kanu kinapambibiag lun 'bpaluman. 6 Na katawan tanu i nakaunut den matay su andang a ula-ula tanu kanu kinapatay nin lu kanu kayu a pinambalawaga ka enggu matebped den kanu badan tanu su kabaladusan asal'a di tanu den maulipen nu entu. 7 Ka apia entain a taw i minatay den man na napukas den sa kapembaladusa. 8 Ugaid'a sekitanu a nakaamung kanu kinapatay nu Isa al-Masih na 'bpaginugutan tanu i makapaguyag-uyag tanu a kaped'in. 9 Ka 'gkatawan tanu i pinambibiag 'bpaluman su Isa al-Masih enggu di den sekanin temala sa kapatay 'bpaluman kagina da den bagel'u kapatay sa lekanin. 10 Na su kinapatay nin a entu na natebped'in su bagel'u kabaladusan tembu di den nasisita a matay pan sekanin 'bpaluman. Na saguna na 'bpaguyag-uyag sekanin sabap kanu Kadenan. 11 Tembu ba dait a itimbang'u den i ginawa nu sa minatay kanu den kanu kabaladusan ugaid'a 'bpaguyag-uyag kanu sabap kanu Kadenan sia kanu kinaisa nu kanu Isa al-Masih.
12 Kagina ka maitu, na di nu den mapandatu su kabaladusan kanu badan nu a 'gkapupus bun ka enggu di kanu den maulipen nu mawag a kiug'a ginawa nu. 13 Di nu den a benal musal su apia ngin kanu edsiap-siapan nu badan nu sa kanggula sa mawag. Ka makin nia nu enggula na inggihad'u su entu kanu Kadenan a mana bun kanu ngin i nakadait kanu taw a inenggan sa bagu den a uyag-uyag. Ipausal'u i ginawa nu sia kanu Kadenan sa kanggula sa mapia. 14 Ka dikena den man nia pendatu sa lekanu su kabaladusan kagina dikena kanu den sakup'u kasuguan ka sia kanu den nasakup kanu da idsan nin a limu nu Kadenan.
Su Kapaulipen sa Kanggula sa Mapia
15 Na amaika maitu sa dikena tanu den sakup'u kasuguan ka sakup tanu den nu da idsan nin a limu nu Kadenan na ngintu, makin tanu temalus kanu kapembaladusa tanu? Dili! 16 Ngintu, di nu 'gkatawan i ulipen kanu nu apia entain a 'bpaginugutan nu? Na amaika nia nu 'bpagunutan i kabaladusan na nia nin maena na ulipen kanu nu kabaladusan a nia nin unga na kapatay. Na amaika nia nu menem 'bpaginugutan na su Kadenan na ulipen kanu nu Kadenan a nia nin unga na katimbang sa ikelas lu sa lekanin. 17 Na kanu paganay na ulipen kanu nu kabaladusan ugaid'a sukul-sukul kanu Kadenan ka 'bpaginugutan nu sa senep sa atay su panduan a inipamandu sa lekanu. 18 Na kagina ka napukas kanu den kanu kabaladusan na ulipen kanu den nu kaikelasan.
19 Na sabap sa manusia kanu bu na 'bpagusal aku sa kadtalu a malemu nu katuntayan asal'a katuntayan aku nu. Mana bun su kinapaulipen nu kanu paganay kanu edsiap-siapan nu badan nu kanu mangaledsik a galebek enggu kapenggula sa mawag a nia nin unga na langun na dikena mapia, na saguna na maitu bun ba i kapaulipen nu kanu edsiap-siapan nu badan nu sa kanggula nu sa mapia a nia nin unga na kaikelasan.
20 Na kanu timpu a ulipen kanu nu kabaladusan na dala sa lekanu su kanggula sa kaikelasan. 21 Na ngin ba i napantiali nu kanu entu ba a manga pinggalebek'u a ipegkaya nu saguna? Na nia man unga nu langun nu entu na kapatay. 22 Ugaid'a saguna a napukas kanu den kanu kabaladusan na ulipen kanu den nu Kadenan, na nia unga nu entu na kaikelasan enggu uyag-uyag a da taman nin. 23 Ka nia man bayad'u kabaladusan na kapatay ugaid'a su ibpagenggay nu Kadenan na uyag-uyag a da taman nin sia makanggulalan kanu Mapulu tanu a su Isa al-Masih.