Su Kapukas kanu Bagel'u Kasuguan nu Nabi Musa
7
Manga lusud ku sa tian a pakatuntay kanu kasuguan, ngintu, 'gkatawan nu bun i su taw na nasakup bu nu kasuguana taman sa bibiag bu sekanin? 2 Nia nin upaman na su 'gkalumaya: Na su babay na taman sa bibiag pan su kaluma nin na nakaiket sekanin lun. Ugaid'a amaika matay den su kaluma nin na napukas den sekanin kanu atulan pantag kanu tiwalayan. 3 Tembu ba madtalu a pegkiuga su babay amaika edtampung sekanin sa ped a mama inunta na bibiag pamun su kaluma nin. Ugaid'a amaika minatay den su kaluma nin, na nakapukas den sekanin kanu atulan pantag kanu tiwalayan a nakaiket lun. Na amaika 'gkaluma sekanin 'bpaluman na di den madtalu a pegkiuga sekanin.4 Manga lusud ku sa tian na maitu kanu bun ba, napukas kanu den kanu bagel'u kasuguan sia nakanggulalan kanu kinapatay nu Isa al-Masih a pinambibiag 'bpaluman. Na napukas tanu sa entu ka enggu tanu malusud sa lekanin ka enggu tanu makaunga sa mapia kanu langun na galebekan sia kanu Kadenan. 5 Ka gagalu na sia tanu paman kanu andang a uyag-uyag tanu na su mawag a kiug'a ginawa tanu na makin 'bpangiseg sabap kanu kasuguan. Tembu ba pakanggalebek tanu sa galebekan a nia nin unga na kapatay. 6 Ugaid'a saguna na napukas tanu den kanu kasuguan ka timbang a minatay tanu den kanu entu a nakaulipen sa lekitanu ka enggu tanu makanggalebek sia kanu Kadenan sa dikena den kanu danden a ukit sia kanu kasuguan ka sia den kanu bagu a ukit sia kanu Suti a Ruh.
Su Kasuguan enggu su Kabaladusan
7 Na ngintu, nia nin maena na mawag su kasuguan? Dikena! Ka u dikena bu sabap kanu kasuguan na di ku katawan u ngin i kabaladusan. Nia nin upaman na di ku katawan i mawag besen su kakiug kanu ngin i aden kanu ped ku amaika dikena bu nadtalu sia kanu kasuguan i “Di nu maginagkay su ngin i aden kanu kaped'u.”b 8 Ugaid'a guna ku katawi i inisapal su entu na su kabaladusan sia sa laki na makin nin inisundul su langun na mawag a kiug'a ginawa sa kanggalebek ku lun. Ugaid'a amaika dala bu man kasuguan na timbang a minatay su kabaladusan. 9 Na nia ku kataw ka 'bpaguyag-uyag aku kanu dala pan kasuguan. Ugaid'a guna ku katawi su kasuguan na nauyag bun mambu su kabaladusan sia sa laki 10 taman sa timbang a minatay aku. Na su kasuguan a nia a nia nin katagan na katundan kanu taw sia kanu uyag-uyag na nia nin naunga sia sa laki na kapatay. 11 Kagina su kabaladusan na inusal'in su kasuguan sa kadulat'in sa laki. Na sabap sa entu na timbang a minatay aku. 12 Ka nia nin kabantang na suti man su kasuguan enggu su langun na ipedsugu na wagib enggu mapia.
13 Na ngintu, nia nin maena na su kasuguan a nia a nia nin ipedsugu na mapia na pakatundan sa laki sa kapatay? Dikena! Ugaid'a su kabaladusan i pedtundan sa laki sa kapatay sia nakanggulalan kanu kasuguan taman sa nakatimbang aku man sa minatay. Na natawan tanu man u ngin i kabaladusan enggu ngin i kawag'in su entu sabap kanu kasuguan. 14 Ka katawan tanu bun i su kasuguan na ebpun i nia kanu Suti a Ruh ugaid'a saki na manusia bu a naulipen nu kabaladusan. 15 Di ku 'gkatuntayan su ginawa ku, ka su pegkiugan ku penggula na di ku 'gkanggula ugaid'a su di ku 'gkalinian na entu ba i 'gkanggula ku. 16 Na amaika nia ku 'gkanggula na su di ku 'gkalinian na nia nin maena na nakasugat su kasuguan. 17 Tembu ba nia nin kabantang na su kabaladusan a sia sa laki i pedsundul sa laki sa kapenggula sa entu. 18 Ka katawan ku man i dala mapia sia sa kamamanusiay ku ka su 'gkapagitung ku a mapia na di ku 'gkanggula. 19 Dikena nia ku 'gkanggula su mapia a pegkiugan ku penggula ka nia ku 'gkanggula na su mawag a di ku 'gkalinian penggula. 20 Na amaika nia ku 'gkanggula na su di ku 'gkalinian na nia nin maena na su kabaladusan a sia sa laki i pedsundul sa laki sa kapenggula sa entu.
21 Kagina ka maitu na nia su naimamanan ku kanu ginawa ku sa amaika pegkiugan ku penggula i mapia na 'bpagungenen aku nu kabaladusan a sia sa laki. 22 Ka nia man sia kanu ginawa ku na 'gkalilinian ku gaid su kasuguan nu Kadenan 23 ugaid'a 'gkasipatan ku i aden ped a bagel a 'gkagedam ku sia kanu ginawa ku a 'bpagungen sa kapenggula ku kanu mapia a 'gkapagitung ku. Na mana aku nabilanggu kanu kabaladusan a nia sia sa laki. 24 Duan-duan ku den a taw. Entain ba basi i makapalipuas sa laki kanu nia a kabaladusan a pedtundan sa laki sa kapatay? 25 Na sukul-sukul aku a benal kanu Kadenan ka sekanin i minggula sa entu sia nakanggulalan kanu Mapulu tanu a su Isa al-Masih.
Na 'gkailay nu den ba a nia i 'gkambebetad ku. Sia kanu ginawa ku na pegkiugan ku penggula su kasuguan nu Kadenan ugaid'a 'bpagungenen aku nu kamamanusiay ku a pebpagulipen kanu kabaladusan.