Su Taw a 'Bpaguyag-uyag sia Luyud kanu Suti a Ruh
8
Na kagina ka maitu na apia entain i nalusud kanu Isa al-Masih na di den masiksa. 2 Kagina sia nakanggulalan kanu Isa al-Masih na su bagel'u Suti a Ruh a 'bpagenggay sa uyag-uyag na pinukas aku nin den kanu bagel'u kabaladusan enggu kapatay. 3 Ka su Kadenan den man i minggula kanu di 'gkagaga penggula nu kasuguan sa lekitanu sabap kanu kamamanusiay tanu. Na pinggula nu Kadenan su entu sia nakanggulalan kanu kinasugu nin kanu Tunggal'ina a pinabpalas'in sa baladusa a manusia ka enggu makagkurban kanu kabaladusan nu manusia. Na sia kanu kinanggihad'in kanu badan nin na tinebped'in den su bagel'u kabaladusan 4 asal'a su wagib a inibpaliugat'u kasuguan na matuman sia sa lekitanu a 'bpaguyag-uyag sa dikena sia kanu kamamanusiay ka sia kanu Suti a Ruh. 5 Kagina su manga taw a 'bpaguyag-uyag sia luyud kanu kamamanusiay na nia nin 'gkapagitung na sia luyud kanu kamamanusiay. Ugaid'a su manga taw a 'bpaguyag-uyag sia luyud kanu Suti a Ruh na nia nin 'gkapagitung na sia luyud kanu Suti a Ruh. 6 Na su taw a nia nin 'gkapagitung na sia luyud kanu kamamanusiay na nia nin kabpawangan na kapatay. Ugaid'a su taw a nia nin 'gkapagitung na sia luyud kanu Suti a Ruh na nia nin kabpawangan na uyag-uyag enggu kalilintad. 7 Kagina su itungan nu taw a sia luyud kanu kamamanusiay na sungkang kanu Kadenan. Na dikena nia nin 'gkapaginugutan su kasuguan nu Kadenan kagina di nin man a benal magaga i kapaginugut'in sa entu. 8 Na su maitu ba a taw na di makasuat kanu Kadenan.9 Ugaid'a sekanu na dikena kanu den luyud kanu kamamanusiay ka sia kanu den luyud kanu Suti a Ruh kagina su Ruh nu Kadenan na san den sa lekanu taman sa pedtapiden kanu nin. Ka amaika dala kanu taw su Ruh nu Isa al-Masih na dikena sekanin lusud kanu Isa al-Masih. 10 Ugaid'a kagina ka san den sa lekanu su Isa al-Masih na apia timbang a minatay den su badan nu sabap kanu kabaladusan na bibiag kanu bun sia luyud kanu Ruh sabap sa initimbang kanu den sa ikelas'u Kadenan. 11 Na amaika su Ruh nu napambibiag kanu Isa al-Masih ka pedtapid den sa lekanu, na su entu ba a napambibiag 'bpaluman sa lekanin na pambibiagen nin bun 'bpaluman su badan nu a 'gkapupus bun sia makanggulalan kanu Suti a Ruh nin a san den sa lekanu.
12 Tembu ba manga lusud ku sa tian, dikena den nakabpaliugat sa lekitanu i kapaguyag-uyag sia luyud kanu kamamanusiay. 13 Ka amaika maguyag-uyag kanu pamun sa maitu ba na nia nu kabpawangan na kapatay. Ugaid'a amaika tebpeden nu den su galebekan a kamamanusiay sia makanggulalan kanu Suti a Ruh na makapaguyag-uyag kanu. 14 Ka apia entain a taw i pendatuan nu Suti a Ruh nu Kadenan na entu ba i nabaluy a manga wata nu Kadenan. 15 Kagina dikena man nia nu natalima a endatu sa lekanu su gilek ka nia nu natalima na su Ruh a minaluy sa lekanu sa wata nu Kadenan. Tembu ba mapakay den a matawag tanu su Kadenan sa Ama.b 16 Na su Suti a Ruh demun i pebpagamad sia kanu ginawa tanu sa nabaluy tanu den a wata nu Kadenan. 17 Na amaika nabaluy tanu den a wata nu Kadenan, na isa tanu den a pebpusakan nu Kadenan a kaped'u Isa al-Masih a pebpusakan nin. Na nia dait na maped tanu nin bun kanu kamalasayan nin ka enggu tanu makaampit kanu sigay nin.
Su Sigay a Maampit'u manga Taw a Nalusud kanu Isa al-Masih
18 Ka sia sa laki, na su manga kamalasayan tanu sa saguna a timpu na di makatimbang kanu maampit tanu a sigay kanu mangauma a timpu. 19 Ka apia su manga pinangaden na pakapagingapa a benal sa kapayag kanu manga taw a nabaluy a wata nu Kadenan. 20 Kagina su langun man nu pinangaden na da makatalutup kanu ngin i pinangadenan kanilan sa dikena sa kanilan a kiug ka entu ba i kahanda nu nangaden kanilan. Na lusud sa kanu kahanda nu nangaden su inam 21 sa ilipuas su langun na pinangaden sia kanu kapegkaledak'ilan taman sa makaamung silan kanu naampit a sigay nu manga taw a nabaluy a manga wata nu Kadenan. 22 Na katawan tanu i sampay saguna na su langun na pinangaden na 'gkapasangan a benal a mana nia nin kalagidan na su kapasang'u masakit a 'bpelumpak kanu pembata a babay. 23 Na dikena bu su manga pinangaden a entu i pedtala sa maitu ka apia sekitanu a nakatalima kanu muna-muna a inenggay nu Kadenan a su Suti a Ruh na pedtala bun sa maitu ba gagalu na kabpagingapa tanu kanu katebus kanu badan tanu taman sa matalutup su kinabaluy sa lekitanu sa wata nu Kadenan. 24 Na entu ba i inam tanu iganat sa kinalipuas sa lekitanu. Na di madtalu a inam su entu amaika 'gkailay tanu den, ka entain pan besen i taw a edtalu sa 'gkainam'in su entu amaika 'gkailay nin den? 25 Ugaid'a nia man madtalu a 'gkainam na su di pan 'gkauma enggu 'bpagingapan tanu sa aden katigkel'in.
26 Na liu pan sa entu, na pedtabangan tanu nu Suti a Ruh sia kanu kalubayan tanu. Ka di tanu man 'gkatawan u ngin i dait a ibpangeni-ngeni tanu, na su Suti a Ruh den i 'bpangeni kanu langun na pangeni-ngeni tanu a di tanu den 'gkadtalu. 27 Na su Kadenan a pakailay kanu dalem'u atay tanu na 'gkasabutan nin bun su 'bpangenin nu Suti a Ruh kagina u ngin i 'bpangenin nu Suti a Ruh kanu sinuti nin na luyud bun kanu kahanda nu Kadenan.
28 Na katawan tanu man i langun na manggula na pegkahandan nu Kadenan i nia nin kabpawangan na kapianan kanu apia entain a pegkalimu lun a pinamili nin sia luyud kanu kahanda nin. 29 Ka kanu paganay paman na katawan nin den man u entain i pinamili nin. Na inisenggay nin den silan a makailing kanu Tunggal'in, ka enggu su Tunggal'in i mabaluy a pagkakan kanu langun nu 'bpamaginugut a mana edsusuled. 30 Na su manga inisenggay nin na entu ba su manga inenggat'in sa kapaginugut. Inenggan nin sa ukit a makatimbang sa ikelas kanu adapan nin su silan ba a entu a manga inenggat'in. Na su silan ba a entu a initimbang'in sa ikelas na paampiten nin kanu sigay nin.
Su Limu nu Kadenan
31 Na ngin pan ba i madtalu tanu pantag kanu langun nu nia? Amaika su Kadenan ka sia sa lekitanu na entain ba i makagaga semungkang sa lekitanu? 32 Na amaika su Tunggal'in ka da nin idsingit ka makin nin inenggay sabap sa lekitanu langun, na nia nin pan a entu pakadsingit sa lekitanu su apia ngin a nasisita tanu? 33 Na entain ba man i makasugat sa lekitanu sa kawagib a pinamili nu Kadenan? Ka su Kadenan demun i minaluy sa lekitanu sa ikelas. 34 Na da den makadtalu sa nawagiban tanu kagina su Isa al-Masih den i minatay sabap sa lekitanu.c Ugaid'a dikena entu bu, ka pinambibiag sekanin 'bpaluman enggu lu sekanin saguna kanu kawanan nu Kadenan enggu sekanin i 'bpamagelet sa lekitanu kanu Kadenan. 35 Na entain ba man i makapabpitas sa lekitanu kanu limu nu Masih? Apia su kapasang, kalidu na ginawa, kapamungkaid atawa ka kaimatay sa lekitanu, kanggutem, kamiskin enggu apia ngin a makagkaid na di makapabpitas sa lekitanu. 36 Ka mana bun su nakadalem kanu kitab a
“Sabap sa leka na uman-uman gay kanu kagagabian na mana kami pedsangul sa kapatay,
mana kami bun bili-bili a pedsumbalin.”d
37 Ugaid'a apia ka maitu i 'gkanggula tanu na subela-subela pan i kapanaban tanu sa kanu langun nu entu sia makanggulalan kanu pegkalimu sa lekitanu. 38 Ka nasisigulu ku man i apia su kapatay, su kauyag, su manga malaikat, su 'bpamegkamal a di 'gkangailay, su sagugunay a 'gkanggula atawa ka su di pan 'gkauma, su aden manga bagel'in 39 taman sa u ngin i aden kanu kawang-kawangan enggu kanu didalem'u lupa apeg den nu langun nu pinangaden na di makapabpitas sa lekitanu kanu limu nu Kadenan a sia kanu Mapulu tanu a su Isa al-Masih.