Su Kinapamili nu Kadenan kanu manga Tupu nu Israila
9
Su Isa al-Masih i pakailay sa su pedtalun ku a nia sa lekanu na benal sa ginawa ku. Dikena i nia kalebutan ka su Suti a Ruh demun a sia sa laki i napaamad lun i entu sa 2 sangat man a 'gkalidu i ginawa ku taman sa da den pinda nin i kapegkalingasa nu ginawa ku 3-4 sabap kanu di kabpaginugut'u manga lusud ku sa tian a manga taw a Israil kanu Isa al-Masih. Ka u mapakay bu man na saki den i isinta nu Kadenan enggu makapitas kanu Isa al-Masih asal bu na malipuas silan. Na silan ba a nia a manga taw i pinamili nu Kadenan a binaluy nin a manga wata nin enggu inipailay nin kanilan su sigay nin. Aden manga kapasadan nin kanilan taman sa inenggay nin kanilan su kasuguan. Napamandu silan sa tidtu a ukit sa kasimba taman sa aden manga pasad'u Kadenan kanilan. 5 Na katupuan nilan su manga badtug a kalukesanb enggu sia sa kanilan nakanggulalan su kinasia nu Masih sa dunia. Na pugin sekanin a Kadenan taman sa taman a labi a pegkakataw kanu langun-langun, amin.6 Na dikena nia nin maena i su da kasalig'u manga lusud ku sa tian a manga taw a Israil na da matuman su pasad'u Kadenan. Ka dikena langun a nadtalu a taw a Israil na taw nu Kadenan 7 enggu dikena langun na nadtalu a ebpun kanu Ibrahim na tupu nu Ibrahim ka nia nakadalem kanu kitab na “San makanggulalan kani Iskak su manga tupu a inibpasad ku sa leka.”c 8 Nia nin maena na dikena langun nu muliataw nu Ibrahim na nabaluy a wata nu Kadenan ka nia bu nabaluy a manga wata nu Kadenan na su manga muliataw bu a sia naluyud kanu inibpasad'u Kadenan. 9 Kagina nia pasad'u Kadenan na “Embalingan aku sa maya bun ba a timpu sa mauma a lagun, na si Sara na kaadenan den na wata-mama.”d
10 Na dikena entu bu, ka maitu bun ba i kadtalu nu Kadenan pantag kanu Ribika kanu timpu a kinagkagingay nin kanu leping a wata nin kanu kaluma nin a si Iskak a katupuan tanu. 11-12 Na unan pan nu kambata kanu leping a si Yakub enggu si Isaw, na pidtalu den nu Kadenan kani Ribika i “Na mapanunugu nu ali su kaka nin.”e Na su kinadtalu nu Kadenan kanu nia na kanu timpu a dala pan nanggalebek'ilan a mapia atawa ka mawag asal'a mailay i su kapamili nu Kadenan na dikena sia luyud kanu galebek'u manusia ka sia luyud kanu ngin i kiug'u Kadenan, 13 a mana bun su nakadalem kanu kitab a “Inikalimu ku si Yakub ugaid'a si Isaw na dikena.”f
14 Na ngin ba i madtalu tanu sa entu? Ngintu, dikena wagib su Kadenan sa entu? Wagib sekanin! 15 Ka pidtalu bun nu Kadenan kanu Musa i “Ikalimu ku su apia entain a pegkiugan ku pegkalimu, latan ku sa nanam su apia entain a pegkiugan ku 'bpelatan sa nanam.”g 16 Nia nin maena na su kapamili nu Kadenan na dikena sia luyud kanu kiug'u taw atawa ka kabpaginapas'u taw ka sia kanu kapegkalimu nu Kadenan. 17 Ka nadtalu bun nu Kadenan kani Piraun sia kanu kitab i “Binaluy ku seka a sultan ka enggu ku makapailay su kapegkagaga ku sia makanggulalan kanu ngin i ipatingguma ku sa leka ka enggu mabadtug su ingala ku sa lusud'u dunia.”h 18 Kagina ka maitu na ikalimu nu Kadenan su apia entain a pegkiugan nin pegkalimu enggu padtegasen nin menem su pamusungan nu apia entain a pegkiugan nin papedtegas i pusung'in.
Su Lipunget'u Kadenan enggu su Kapegkalimu nin
19 Na aden a entu na aden edtalu sa lekanu sa laki sa “Amaika maitu na ngintu ka ipedsendit pan nu Kadenan kanu manga taw su di nilan kapaginugut? Kagina u ngin i kiug'in na da bun isa a makagaga lun melen.” 20 Ugaid'a entain ka a makadtalu kanu Kadenan sa maitu? Manusia ka bu. Ngintu besen, madtalu nu inaden kanu minaden lun i “Ngintu ka maya i kinaaden nengka sa laki?” 21 Na mana bun i nia su 'bpangumbal sa binangga sa aden kawagib'in kanu budta sa kaumbal'in lun sa mapia a binangga enggu kadsalilidan demun a binangga.
22 Na maitu bun ba su Kadenan ugaid'a apia pegkiugan nin den a benal papedtingguma su lipunget'in kanu manga taw a dait kanu entu ba enggu pebpayag su kapegkagaga nin na tinigkelan nin a benal su entu apia nia nin kaaden i nauget'in den dait a binasan silan. 23 Na tinigkelan nin silan ka enggu nin pakapailay su da idsan nin a sigay nin kanu manga taw a inikalimu nin enggu inadil'in den kanu paganay pan a makaampit kanu sigay nin. 24 Na kaped tanu kanu manga taw a inenggat'u Kadenan sa kapaginugut lun sa dikena bu kanu manga taw a Yahudi ka apeg den nu manga taw a dikena-Yahudi 25 a mana bun su kadtalu nu Kadenan kanu Nabi Husia a
“Su dikena ku manga taw na tawagen ku a ‘Manga taw ku.’
Na su dikena ku ipegkalimu na ipegkalimu ku den.i
26 Na kanu uman i dalepa a pidtaluan sa ‘Dikena ku sekanu manga taw,’
na silan i tawagen sa ‘Nabaluy a wata nu kaisa-isa nin a Kadenan.’ ”j
27 Nakadalem bun kanu kitab i nia ibpananawag'u Nabi Isayas pantag kanu manga tupu nu Israil na “Apia man nia kadakel'u muliataw nu Israil na mana su kadakel'u pedtad kanu pamedtadan na paidu bu i malipuas kanilan ka su inisama bu, 28 kagina inggulalan nu Kadenan a Mapulu su kukuman nin kanu manga taw sa da kulang'in enggu pakagaganen nin su entu”k 29 a mana bun su naalung'u Nabi Isayas a
“U mana bu ka dala inisama nu Kadenan a Barakat sa Langun kanu manga tupu tanu, na nia tanu kailingan na su siudad a Sudum enggu Gumura a dala nasama lun.”l
Su Da Kapaginugut'u manga Taw a Israil kanu Mapia a Tutuma
30 Na ngin ba i madtalu tanu pantag sa nia? Su manga taw a dikena-Yahudi a da paginapas sa katimbang'u Kadenan kanilan sa ikelas na silan i initimbang'u Kadenan sa ikelas sabap kanu salig'ilan. 31 Ugaid'a su manga Yahudi a 'bpaginapas sa katimbang'u Kadenan kanilan sa ikelas sia luyud kanu kasuguan na dala makaapas sa entu. 32 Ngintu basi ka da nilan maapas su entu? Kagina da nilan paginapasa su entu sa ukit a kasalig'ilan ka pinaginapas'ilan su entu sa ukit a kinanggulalan nilan kanu kasuguan. Na nakasiud silan kanu watu a pakapasiud, 33 a mana bun su nakadalem kanu kitab a
“Minetad aku sa watu sa Zionm a kasiudan nu manga taw,
masela a watu a makapagebpa sa kanilan.
Ugaid'a apia entain i semalig lun na di makayaya.”n