10
Manga lusud ku sa tian, nia ku kiug enggu nia ku 'bpangeni-ngenin kanu Kadenan na malipuas su pagidsan ku a manga Yahudi. 2 Saki demun i makapangimbenal sa endaw taman i kabpaginapas'ilan kanu Kadenan ugaid'a malu nakasibay bu su kabpaginapas'ilan a entu. 3 Kagina di nilan 'gkatawan u ngin i ukit a katimbang'u Kadenan sa ikelas kanu taw, na 'bpaginapasen nilan su kabaluy nilan sa ikelas sa kanilan demun a ukit a dikena ukit'u Kadenan. 4 Ka su Isa al-Masih man su nabputusan nu kasuguan.a Na sabap sa entu na makatimbang sa ikelas su apia entain a semalig sa lekanin.Su Kalipuasan na kanu Langun nu Taw
5 Nia man inisulat'u Nabi Musa pantag kanu kaikelasan a sia makanggulalan kanu kapenggulalan kanu kasuguan na “Apia entain a taw i makanggulalan nin su langun nu kasuguan na makapaguyag-uyag sa da taman nin.”b 6 Ugaid'a pantag menem kanu katimbang'u Kadenan sa ikelas kanu taw sia makanggulalan kanu salig na “Di den nasisita a edtalun nengka pan kanu ginawa nengka i ‘Entain basi i 'bpapulu lu sa sulega?’ ” (asal'a makapangalimbaba nin sia su Masih) 7 “atawa ka ‘Entain basi i makapangalimbaba kanu dalepa nu namamatay?’ ” (asal'a makapambangun nin su Masih ebpun kanu namamatay). 8 Ka nia man kadtalu nu kitab na
“Su kadtalu nu Kadenan na masupeg sa leka, ka nan bun kanu ngali nengka enggu kanu pamusungan nengka.”c
(Na nia maena nu entu na su kasalig a mana su ibpangusiat'ami); 9 kagina amaika ipayag'u ngali nengka i su Isa al-Masih na Mapulu enggu paginugutan nengka sa senep sa atay i pinambibiag sekanin 'bpaluman nu Kadenan na malipuas ka. 10 Kagina su taw a 'bpaginugut sa senep sa atay na itimbang'u Kadenan sa ikelas enggu su taw a ipayag'in i pedsalig sekanin na malipuas. 11 Ka nia man nadtalu kanu kitab na “Apia entain i semalig sa lekanin na di makayaya.”d 12 Na da den kambidayan na Yahudi enggu dikena-Yahudi kagina isa bu su Mapulu a Mapulu nu langun nu taw enggu 'bpamalihala kanu langun a pedsupeg sa lekanin. 13 Ka mana bun su nakadalem kanu kitab a “Apia entain i mangeni kanu Mapulu sa ilipuas'in sekanin na malipuas.”e
14 Ugaid'a panun ba i kasupeg'ilan lun u dikena nilan 'bpaginugutan? Na panun menem i kapaginugut'ilan lun u da nilan pan makineg su pantag sa lekanin? Panun menem i kakineg'ilan pantag sa lekanin amaika dala menem mangusiat lun kanilan? 15 Na panun ba menem i kapangusiat pantag sa lekanin amaika dala sugun sa kapangusiat? Na mana bun su nakadalem kanu kitab a “Sangat i kapia nin su ay nu taw a 'bpangusiat sa kanu Mapia a Tutuma.”f 16 Ugaid'a dikena langun na 'gkapangusiatan na 'bpaginugut kanu Mapia a Tutuma, ka nia kadtalu nu Nabi Isayas sia kanu kitab na “Hu Kadenan a Mapulu, ngin i nia ka da gaid naginugut kanu kadtalu nami?”g 17 Na su kapaginugut man na unga nu kapakikineg, a su kapakikineg kanu kadtalu nu Kadenan pantag kanu Isa al-Masih. 18 Ugaid'a nia ku makaidsa na: Ngintu, da silan makakineg? Nakakineg bun silan kagina nadtalu bun kanu kitab i
“Su suala nilan na nakauma kanu embala-bala kanu dunia.
Su manga kadtalu nilan na nakauma kanu tedtab'u dunia.”h
19 Na ngintu, da katuntayi nu manga taw a Israil su entu? Ka apia su manga taw a dikena-Yahudi na nakatuntay sa entu, ka nalabit bun nu Nabi Musa su nia sia kanu kitab a
“Papangalikuden ku sekanu sa kanu ped a bangsa a da mamakatuntay;
pakalipungeten ku sekanu sia makanggulalan kanu bangsa a da mamakatuntay.”i
20 Na pidtalu bun nu Nabi Isayas sa da den gilek'in i
“Natun aku nu manga taw a dikena 'bpangilay sa laki;
inipayag ku i ginawa ku kanu manga taw a dikena 'bpagidsa pantag sa laki.” j
21 Na nia nin menem pidtalu pantag kanu manga taw a Israil na
“Kanu kagagabian na 'bpagenggaten ku bu su manga taw a di 'bpamaginugut enggu sungkang sa kambalingan nilan sa laki.”k