Su Kinalat sa Nanam'u Kadenan kanu manga Taw a Israil
11
Na nia ku makaidsa na ngintu, inikias den nu Kadenan su manga taw nin a Israil? Dikena! Ka apia saki na isa aku bun a taw a Israil a tupu nu Ibrahim sia kanu Buniamin. 2 Dikena inikias'u Kadenan su manga taw nin a pinamili nin den iganat pan kanu paganay. Ngintu, di nu katawan su kadtalu nu Nabi Ilias sia kanu kitab sa kanu kinambuku nin kanu Kadenan sungkang kanu manga taw a Israil? 3 Sa nia nin pidtalu na “Kadenan a Mapulu, pinangimatayan nilan su manga nabi nengka enggu bininasa nilan su manga pegkurbanan sa leka. Saki bu i nasama enggu pegkiugan aku nilan bun 'bpagimatay.”a 4 Ugaid'a nia inisawal'u Kadenan sa lekanin na “Aden inisama ku a pitu ngibu a manga taw a Israil a dala simba kani Baal.”b 5 Na maitu bun ba sa saguna a timpu, aden pamun inisama nu Kadenan a pinamili nin sia nakanggulalan kanu da idsan nin a limu nin. 6 Na amaika su entu ka sia nakanggulalan kanu da idsan nin a limu nu Kadenan na nia nin maena na dikena i entu sabap kanu manga galebek a mapia kagina amaika sia nakanggulalan kanu manga galebek na di madtalu i entu sa da idsan nin a limu nu Kadenan.7 Na nia nin maena na su manga taw a Israil na dala nilan maapas su pegkiugan nilan 'bpagapas, ka nia bu nakaapas lun na su manga taw a pinamili nu Kadenan. Na su ped kanilan na pinagkategas su ulu nilan 8 a mana su nakadalem kanu kitab a
“Inenggan nu Kadenan silan sa itungan a mana pedtulug,
mata a di makailay enggu tangila a di makakineg sampay den saguna.”c
9 Na pidtalu bun nu Nabi Daud sia kanu kitab i
“Su kanduli sia kanu agama nilan na baluy ka a makalitag enggu makadulat kanilan
a sabapan na kabinasa nilan a balas'u pinggula nilan.
10 Pagkalibuteng ka su kailay nilan ka enggu di silan mamakailay.
Na mabekut silan kanu mapasang a 'gkapamawa nilan taman sa taman.”d
11 Na nia ku menem makaidsa, na su kinagebpa nu manga taw a Israil na ngintu, di den silan makambangun? Makambangun pamun! Ugaid'a sabap kanu kinasungkang'ilan na nakasabpet kanu manga taw a dikena-Yahudi su kalipuasan ka enggu makapadsekel su manga taw a Yahudi. 12 Na amaika su kinasungkang'u manga Yahudi enggu su da nilan kaapas kanu ngin i 'bpaginapasen nilan ka nakaunga sa masela a palihala sia kanu manga taw a dikena-Yahudi taman den kanu sakadunia na labi den i kasela na palihala nu Kadenan kanu manga taw amaika nia den semalig sa lekanin na su manga taw a Yahudi.
Su Kalipuasan nu manga Taw a Dikena-Yahudi
13 Na nia ku menem madtalu sa lekanu a manga taw a dikena-Yahudi na saki na sinugu aku san sa lekanu enggu makamamasela ku su entu a galebekan 14 ka basi sabap kanu nia a galebekan ku na makapadsekel ku su manga pagidsan ku a Yahudi sa kapaginugut'ilan ka enggu apia su paidu bu kanilan na malipuas. 15 Na amaika su di kapedtalima nu Kadenan kanilan ka nabaluy a ukit sa kambalingan sa lekanin nu sakadunia, na labi den u nia den pambalinganen nu Kadenan sa lekanin na su manga taw a Yahudi ka su kapambibiag den 'bpaluman.
16 Na mana bun su inadum na amaika su ped kanu entu a inadum ka inigkurban kanu Kadenan na timbang a inigkurban bun su langun nu nasama a inadum.e Na maitu bun ba amaika ka su dalid'u kayu ka suti na suti bun su manga sapak'in. 17 Ugaid'a amaika su ped kanu manga sapak ka pinanebped enggu su sekanu a mana tadin a kayu a ulibus i inisumpat a makasambi kanu entu taman sa makaampit kanu den kanu dalid'u kayu 18 na da kanu emamasela kanu manga sapak a entu a pinanebped. Ka nia nu 'gkakalendem na sekanu i pakaampit kanu dalid'u kayu, dikena su dalid. 19 Na aden a entu na madtalu nu i “Pinanebped silan ka enggu kami makasambi.” 20 Benal su entu ugaid'a tanudi nu i pinanebped silan sabap kanu di nilan kabpaginugut. Na sekanu menem na inisumpat kanu sabap kanu salig'u. Tembu da kanu 'bpemamasela ka makin nia nu enggula na magilek kanu kanu Kadenan. 21 Kagina amaika su Kadenan ka da nin lilingaya temebped su tidtu a entu a sapak'in na sekanu pan a entu i kalilingayan nin? 22 Na ilay nu su kapasang'u Kadenan ka siksan nin su apia entain a di 'bpamaginugut lun. Na ilay nu bun su kakalimu nu Kadenan ka ikalimu kanu nin amaika menem ka makapanalus kanu sia kanu limu nin ka amaika dili na tebpeden kanu nin bun. 23 Na apia su silan a entu a tinebped'in den ka telenan nilan su di nilan kabpaginugut na isumpat bun silan 'bpaluman ka nia pan a entu di magaga nu Kadenan i entu? 24 Ka apia sekanu a nan a tadin a sapak a kayu a ulibus ka nakasumpat kanu nin sa apia nia nin kaaden i sakabias kanu kanu pidtangga mamula a ulibus na nia pan a entu di makasumpat su tidtu a manga sapak'in?
Su Kalipuas'u Kadenan kanu manga Taw a Israil
25 Manga lusud ku sa tian, na asal'a di kanu makamamasela na dait a katawan nu su nakapagena a nia a kahanda nu Kadenan sa su kategas'u ulu nu manga taw a Israil na gagalu bu i entu. Ka taman bu i entu sa di pan matalutup su kadakel'u dikena-Yahudi a makapapaginugut. 26 Ka u matalutup den su entu na su manga taw a Israil na malipuas den a mana bun su nakadalem kanu kitab a
“Su 'bpamelipuas na makabpun sa Zion,
pataligkudanan nin kanu manga tupu nu Yakub su kapaguyag-uyag a di kasuatan nu Kadenan.”f
27 “Na nia ba i kapasadan ku kanilan
sa kanu timpu a punasen ku den su kabaladusan nilan.”g
28 Na sabap kanu da kapamamantag'u manga taw a Yahudi kanu Mapia a Tutuma na nabaluy silan a sungkang kanu Kadenan ka enggu sekanu menem a manga taw a dikena-Yahudi na malipuas bun.h Ugaid'a amaika sia menem embitialan sa kanu kinapamili na ipegkalimu pamun silan nu Kadenan sabap kanu kinapamili nin kanu manga katupuan nilan. 29 Kagina su Kadenan na di man edsalin i itungan nin kanu manga pinamili nin enggu kanu manga pinalihalan nin. 30 Na mana bun su sekanu kanu paganay a sungkang kanu Kadenan ugaid'a saguna na inikalimu kanu den nu Kadenan sabap kanu kinasungkang'ilan a entu. 31 Na maitu bun ba mambu su manga Yahudi, saguna na nabaluy silan a sungkang ka enggu nilan bun matalima su limu nu Kadenan sia makanggulalan kanu kinakalimu nu Kadenan sa lekanu. 32 Ka su Kadenan na pinadtaday nin su langun nu taw sa kasungkang'ilan sa lekanin ka enggu nin makapailay kanilan su limu nin.
Su Pugi kanu Kadenan
33 Na ngin den i kadalem'u ilemu nu Kadenan enggu di matengkad su itungan nin! Di tanu magaga temuntay su kahanda nin enggu su ukit'in! Na mana bun su nakadalem kanu kitab a
34 “Entain ba i makatuntay kanu itungan nu Kadenan a Mapulu?
Atawa ka entain ba i makapamandu sa lekanin?”i
35 Atawa ka “Entain ba i makaenggay lun sa apia ngin a mabaluy a tademan nin lun?”j
36 Ka sekanin man i 'gkabpunan nu langun-langun enggu 'bpananalusan su langun nu entu sia makanggulalan sa lekanin enggu sabap sa lekanin. Pugin su Kadenan taman sa taman! Amin.