Su Uyag-uyag sia kanu Isa al-Masih
12
Manga lusud ku sa tian, sabap kanu madakel den a kinapagedam'u Kadenan sa lekitanu kanu lat a nanam'in na 'bpangenin ku sa lekanu i inggihad'u i ginawa nu kanu Kadenan a mana bun kurban, suti enggu pakasuat sa lekanin. Ka isa bun i nia a simba nu sa lekanin. 2 Di nu ibpeluyud i ginawa nu kanu ukit'u dunia ka makin nia nu enggula na ipabagu nu i ginawa nu kanu Kadenan sia makanggulalan kanu kabagu nin kanu itungan nu. Na amaika maitu na katuntayan nu sa tidtu-tidtu su kahanda nu Kadenan a mapia enggu dala kulang'in taman sa pakasuat sa lekanin.3 Na sia luyud kanu kapegkagaga a inenggay nu Kadenan sa laki a sinugu nin na edtalun ku sa lekanu i di ilayn na uman i isa i ginawa nin sa mapulu pan kanu ngin i dait sa lekanin. Ka makin nia nu enggula na pakatidtu nu su itungan nu sia luyud kanu salig a inenggay sa lekanu nu Kadenan. 4 Ka mana bun man su sakabadan a madakel i edsiap-siapan nin ugaid'a embibidaya i katagan nin, 5 na maitu tanu bun ba, matag tanu madakel na nabaluy tanu a sakabadan bu sia kanu Isa al-Masih, nakadsusumpat i uman i isa sa lekitanu. 6 Na embibidaya i inenggay sa lekitanu a kapegkagaga sia luyud kanu inipalihala nu Kadenan sa lekitanu. Na amaika kapayag kanu kadtalu nin i inipalihala nin sa lekanu na enggalebek'u su entu sia luyud kanu salig a inenggay nin sa lekanu. 7 Na amaika menem ka su kanggalebek sa kapianan kanu ped a taw na enggula nu bun su entu, amaika kapamandu na pamandu kanu bun, 8 amaika menem ka kapagkabagel kanu manggiginawa nu ped a taw na enggula nu su entu, amaika menem ka kapangalimuan na enggay kanu sa maluwag sa ginawa, amaika menem ka kapangulu na pangulu kanu sa endaw taman i magaga nu, amaika menem ka kapananabangan na tabang kanu sa aden kagalaw nin.
Su Dait a Ula-ula nu 'Bpamaginugut
9 Na 'gkakalimua kanu sa senep sa atay. Tangkai nu su mawag ka nia nu enggula na ngin i mapia. 10 'Gkakalimua kanu sa mana bun su edsusuled enggu enggan na uman i isa sa kabalapantag su ped'in. 11 Da kanu 'bpauk-pauk ka makin kanu pakamangun sa kanggalebek'u sa senep sa atay sia kanu Mapulu. 12 Sabap sa aden inam'u sia kanu Kadenan na dait a mapakagalaw kanu. Tigkeli nu su manga kamalasayan nu enggu di nu minda i kapangeni-ngeni nu. 13 Edtabang kanu menggay kanu manga nasisita nu 'bpamaginugut enggu patalus'u kanu walay nu su manga taw a dala 'gkatumpan nin.
14 Ipangeni-ngeni nu i palihalan nu Kadenan su 'bpamungkaid sa lekanu, di nu silan ipedsinta. 15 Amungi nu kanu kapegkagalaw nilan su manga taw a 'gkangagalaw enggu amungi nu bun kanu kapegkalidu na ginawa nilan su manga taw a 'gkangalidu i ginawa nin. 16 Na uman i isa na maguyag-uyag sa aden kalilintad'in kanu ped'in. Da kanu emamasela ka makin nia nu enggula na iluyud'u i ginawa nu kanu manga taw a da 'gkagaga nin. Di nu ipedtimbang i ginawa nu sa masela i nasabutan nu a taw.
17 Di nu semuli sa mawag su minggalebek sa lekanu sa mawag. Ka makin nia nu enggula na u ngin i mapia kanu langun nu taw asal'a di kanu katilan. 18 Paginapas kanu sa makapaguyag-uyag sa aden kalilintad'in kanu langun nu taw. 19 Manga lusud ku sa tian a papedtayan, da kanu a benal semuli sa mawag ka makin nu idedsa kanu Kadenan su entu. Kagina nia kadtalu nu Kadenan sia kanu kitab na “Saki i mataw semuli sa lekanu enggu mapapamayad kanilan.”a 20 Tembu ba “Amaika 'gkagutem su kuntela nu na pakan nu, amaika pakainem na painem'u. Ka amaika maitu na matun nin i kaya nin kanu ginawa nin.”b 21 Na da kanu a benal mapatalaw kanu mawag ka makin nu talaw su mawag sia makanggulalan kanu kanggalebek'u sa mapia.