Su Kapaginugut kanu 'Bpamegkamal
13
Na nia dait na paginugut kanu kanu 'bpamegkamal kanu dalepa. Kagina ebpun kanu Kadenan su kapegkamal'ilan a entu enggu su Kadenan i minetad kanilan. 2 Tembu ba apia entain i pedsungkang kanu 'bpamegkamal na nia nilan pedsungkangen na su pinamili nu Kadenan a inibetad'in kanu entu a kamal. Na sabap sa entu na masiksa su 'bpamedsungkang a entu. 3 Na di man dait a ikagilek'u manga taw a penggalebek sa mapia su 'bpamegkamal. Ugaid'a nia dait a magilek kanilan na su taw a penggalebek sa mawag. Na amaika pegkiugan nengka sa di nengka ikagilek su 'bpamegkamal na enggula ka sa mapia ka mapamedta ka nilan pan kanu mapia a entu a galebek'engka. 4 Kagina su 'bpamegkamal na silan su panunugun nu Kadenan, a lekanu bun a kapianan. Ugaid'a amaika enggula kanu sa mawag na dait a magilek kanu kanilan ka aden kawagib'ilan sa kasiksa nilan sa lekanu. Ka silan su panunugun nu Kadenan a pedsiksa kanu manga taw a penggalebek sa mawag. 5 Kagina ka maitu na paginuguti nu silan sa dikena bu sabap sa kaabungan nu su kasiksan ka sabap sa katawan nu i entu ba i pakasugat a penggulan.6 Na entu bun ba i sabap'in u ngintu ka pembayad tanu sa buwis kagina su 'bpamegkamal na silan su panunugun nu Kadenan a penggulawasen nilan su kapenggulalan nilan kanu entu a galebekan nilan. 7 Tembu ba inggay nu su ngin i dait a ibpagenggay. Su dait a pembayad sa buwis na mayad sa buwis enggu kanu manga ped pan a dait a pembayadan. Pagadatan su dait a 'bpagadatan enggu su dait menem a badtugen na badtug'u.
Su Kagkakalimua nu Uman i Isa
8 Nia dait kanu uman i isa sa lekitanu na dala utang'in a dala nin kabayadi nia tabia na su inibpaliugat a kagkakalimua nu uman i isa kanu ped'in. Kagina su malimu kanu ped'in na 'gkatuman nin su kasuguan. 9 Na su manga kasuguan a “Da ka 'gkiuga, da ka mangimatay, da ka manegkaw, di ka maginagkay su ngin i aden kanu ped'engka,”a apeg den nu ped pan a kasuguan na naputus bu sa satiman a kasuguan a “Ikalimu nengka su ped'engka sa mana bun su kakalimu nengka kanu ginawa nengka.”b 10 Na su taw a malimu na di enggalebek sa mawag kanu ped'in. Tembu ba su kakalimu na 'gkatuman nin su kasuguan.
11 Dait a enggula nu i nia ka katawan nu i nia den ba su timpu a dait a gemedam kanu. Ka su kutika nu kalipuasan na masupeg den gaid sa lekitanu saguna kumin kanu timpu a kinabaluy tanu a maginugut kanu Mapulu. 12 Su kalibuteng'u magabi na 'gkapupus den ka pakauma den su kalinawag'u malamag, tembu ba dait a tagaken tanu den su manga galebek'u kalibutengan ka nia tanu den isangan na su kanggula sa mapia a mabaluy a matalem tanu a manga taw a nalusud kanu kaliwanagan. 13 Maguyag-uyag tanu sa mapia kagina sekitanu na sia tanu den nalusud kanu kaliwanagan. Di tanu enggulan i kanggalaw-galaw sa subela, kandalangutan, kamustakilan a galebek, kanguda na ginawa, kapamagukag enggu kasekel sa dikena mapia. 14 Ka makin nia tanu isangan kanu ginawa tanu na su ula-ula a ebpun kanu Isa al-Masih a Mapulu tanu enggu di tanu a benal unutan su kamamanusiay a kiug'u ginawa tanu.