Su Di Kasugat sa Kawagib kanu Lusud sa Tian
14
Na talima nu sa mapia su lusud'u sa tian a malubay pamun i salig'in enggu di nu ipebpalawa amaika embidaya i itungan nu pantag kanu ngin i dait enggu di dait a enggulan. 2 Upama, su ped na 'bpaginugut silan sa apia ngin a pegken na makan. Su ped menem a malubay pamun i salig'in na kamu bu i pegken nilan. 3 Na dili pakabulugan nu taw a pegkan sa apia ngin su taw a di pegkan kanu ped a embalangan na pegken. Na maitu bun ba, di bun wagiban nu taw a di pegkan kanu ped a embalangan na pegken su taw a pegkan sa apia ngin a pegken ka tinalima bun silan nu Kadenan. 4 Na entain ka ba a pedsugat sa kawagib kanu panunugun nu ped? Su mapulu nin bu i mataw lun milay u pakasuat sekanin atawa ka dili. Ugaid'a makasuat man sekanin ka tabangan sekanin nu Mapulu nin.5 Na aden manga taw a sia sa kanilan na aden labi a balapantag a gay kumin kanu manga ped a gay enggu aden bun manga taw a mamagidsan bun su langun nu gay. Na sia den kanu taw su entu u ngin i kailay nilan lun sa dala kandua-dua nilan lun. 6 Na su manga taw a 'bpaginugut sa aden gay a labi a balapantag kumin kanu ped a gay na penggulan nilan i entu a makasuat kanu Mapulu. Na maitu bun ba su taw a 'bpaginugut sa mapakay a makan su apia ngin a pegken na penggulan nin bun su entu a makasuat bun kanu Mapulu sabap sa ipedsukul-sukul'in bun i entu kanu Kadenan. Na maitu bun ba kanu taw a di pegkan kanu ped a embalangan nu pegken na penggulan nin bun su entu a makasuat kanu Mapulu ka ipedsukul-sukul'in bun i entu kanu Kadenan.
7 Na dala man isa sa lekitanu a 'bpaguyag-uyag atawa ka pebpatay asal'a masuat'in i ginawa nin. 8 Ka u 'bpaguyag-uyag tanu man na 'bpaguyag-uyag tanu sa kapanunuat tanu kanu Mapulu. Na maitu bun ba u pebpatay tanu na pebpatay tanu sa kapanunuat tanu kanu Mapulu ka enggu apia 'bpaguyag-uyag tanu atawa ka pebpatay tanu na sia tanu bun kanu Mapulu. 9 Ka nia ba man i sabapan a kinapatay nu Isa al-Masih enggu kinambibiag'in 'bpaluman na asal'a mabaluy sekanin a Mapulu sia kanu manga bibiag enggu sia kanu namamatay.
10 Tembu ba di tanu pakabulugan enggu sugaten sa kawagib su lusud tanu sa tian kagina langun tanu na semangul bun kanu kukuman nu Kadenan 11 a mana bun su nakadalem kanu kitab a
“Saki su Kadenan a Mapulu taman sa taman, na ibpasad ku i langun na taw na semugiud sa laki
enggu ipangimbenal'ilan i saki su Kadenan.”a
12 Nia nin maena na langun tanu na mauma tanu bun sia kanu adapan nu Kadenan su langun nu penggalebeken tanu.
Su Di Kapangaden sa Kadsabapan na Kambaladusa nu Lusud sa Tian
13 Kagina ka maitu na di tanu den sugaten sa kawagib su uman i isa sa lekitanu ka makin nia tanu enggulan na abungan tanu i makaaden tanu sa kadsabapan na kandusa nu lusud tanu sa tian. 14 Na sia luyud kanu Mapulu a su Isa al-Masih na natalatantu ku i dala pegken a di mapakay a kanen. Ugaid'a amaika su taw ka sia sa lekanin na di mapakay a kanen su pegken a entu, na di dait a kanen nin su entu. 15 Na amaika sabap kanu pegken nengka ka pegkalat i ginawa nu lusud'engka sa tian na nia nin maena na dikena den pakaluyud sa kapegkalimu su penggulan nengka a entu. Na di ka semuguti sa mabinasa su lusud'engka sa tian sabap bu kanu pegken nengka kagina isa bun sekanin a sabapan sa kinanggihad'u Isa al-Masih kanu umul'in. 16 Tembu ba apia nia nin kaaden i mapia sa leka su entu na di ka penggula amaika kadsabapan na kadtalu nu ped a taw sa dikena mapia. 17 Kagina sia kanu kapendatu nu Kadenan na dikena makapantag kanu manga pegken atawa ka kabpanginem ka pantag kanu kaikelasan, kalilintad enggu kagalaw a ibpagenggay nu Suti a Ruh. 18 Na apia entain a taw a penggalebekan nin su Isa al-Masih a aden sa lekanin su manga maitu ba a ukit na pakasuat sekanin kanu Kadenan enggu kanu manga taw.
19 Tembu ba nia tanu paginapasen na kanggula tanu sa makalilintad kanu uman i isa enggu makapagkabagel kanu uman i isa. 20 Di tanu enggulan i sabap bu kanu pegken tanu na mabinasa su galebekan nu Kadenan. Ka apia ngin man a pegken na mapakay a kanen ugaid'a di mapia amaika makandusa su lusud'engka sa tian sabap kanu pegken nengka. 21 Nia dait na amaika su kakan sa sapu atawa ka kainem sa makalangut atawa ka kanggula sa apia ngin ka punan a kandusa nu ped'engka na di ka penggula su entu. 22 Na apia ngin i paginugut'engka pantag sa entu na lekanu bun den i entu kanu Kadenan. Ka sangat den man i kapia nin kanu taw amaika dala kandua-dua nin kanu ngin i 'bpaginugutan nin a mapia. 23 Ugaid'a apia entain i aden kandua-dua nin inunta na kineman bun na pakandusa ka nia nin maena na su kapegkan nin na dikena den pakaluyud kanu ngin i paginugut'in. Kagina apia ngin man i enggulan a dikena pakaluyud kanu paginugut tanu na kabaladusan.