Su Kanggula sa Ngin i Makagkapia kanu Ped a Taw
15
Na sekitanu a mabagel den i salig'in na dait a edsabalan tanu su manga lusud tanu sa tian a malubay pamun i salig'in sia kanu ngin i kalubayan nilan. Di tanu enggulan su endaw bu i pakasuat kanu ginawa tanu. 2 Nia dait a enggulan nu uman i isa sa lekitanu na endaw i makagkapia kanu manga ped tanu enggu edtabangan tanu silan kanu kagkabagel'u salig'ilan. 3 Ka apia man su Isa al-Masih na dikena nia nin pinggula u ngin i pakasuat kanu ginawa nin ka mana bun su nakadalem kanu kitab a “Hu Kadenan ku, na uman ka nilan 'bpagumpaken na timbang a saki i 'bpagumpaken nilan.”a 4 Na langun man a nakasulat kanu kitab na inisulat i entu asal'a makapamandu sa lekitanu ka enggu maaden sa lekitanu su inam sia makanggulalan kanu kasabal enggu kabagel'u manggiginawa a pakaenggay nu nakadalem a entu kanu kitab. 5 Na pangeni-ngenin ku kanu Kadenan a 'gkabpunan nu kasabal enggu kabagel'u manggiginawa sa tabangan kanu nin sa makapaguyag-uyag kanu sa aden kalilintad'in kanu uman i isa sa lekanu sia luyud kanu Isa al-Masih 6 asal'a makapagisa-isa kanu sa kapugi kanu Kadenan a Ama nu Mapulu tanu a su Isa al-Masih a Kadenan nin bun.Su Mapia a Tutuma kanu manga Taw a Dikena-Yahudi
7 Kagina ka maitu na taliman sa mapia nu uman i isa su ped'in a mana bun su kinatalima nu Isa al-Masih sa lekanu ka enggu mapugi su Kadenan. 8 Ka nia ku madtalu sa lekanu na su Isa al-Masih na nabaluy a panunugun kanu manga taw a Yahudi ka enggu mailay su katidtu nu Kadenan sa tumanen nin su ngin i inibpasad'in kanu manga kalukesan nami 9 enggu kanu manga taw menem a dikena-Yahudi na mapugi nilan su Kadenan sabap kanu lat a nanam'in. Ka mana bun su nakadalem kanu kitab a
“Kagina ka maitu na pugin ku seka sia kanu kaadapan nu manga taw a dikena-Yahudi
enggu edsengal aku sa kapugi kanu ingala nengka.”b
10 Pidtalu bun kanu kitab i
“Sekanu a manga a taw a dikena-Yahudi na enggalaw-galaw kanu a kaped'u manga taw nu Kadenan.”c
11 “Langun nu a manga taw a dikena-Yahudi na pugi nu su Kadenan a Mapulu.
Pugin sekanin nu langun nu taw!”d
12 Na pidtalu bun nu Nabi Isayas i
“Ebpun kanu tupu nu Yisi su makatindeg a endatu kanu manga taw a dikena-Yahudi;e
sia sa lekanin su inam'u manga taw a dikena-Yahudi.”f
13 Na pangeni-ngenin ku kanu Kadenan a 'bpagenggay sa inam sa ipagedam'in sa lekanu su tidtu-tidtu a kagalaw enggu kalilintad sia kanu kapedsalig'u ka enggu mangiseg su inam'u sia makanggulalan kanu kabarakat'u Suti a Ruh nu Kadenan.
14 Manga lusud ku sa tian, na 'gkasisigulu ku kanu ginawa ku i linemangkap sa lekanu su langun nu mapia enggu ilemu taman sa magaga nu den mamapata su uman i isa sa lekanu. 15 Ugaid'a apia ka maitu na inisulat ku den sa maliwanag a patadem sa lekanu su ngin i manga dait, sabap kanu limu nu Kadenan a inenggay nin sa laki 16 sa kinabaluy nin sa laki sa masugu nu Isa al-Masih kanu manga taw a dikena-Yahudi. Na su galebekan ku kanilan na su kabpangusiat kanu Mapia a Tutuma a ebpun kanu Kadenan. Na su galebekan ku a nia na mana bun i entu kanu galebekan nu 'bpangurban asal'a su manga taw a dikena-Yahudi na iling-iling'u kurban na matalima silan sia kanu Kadenan a nasuti silan sia nakanggulalan kanu Suti a Ruh. 17 Kagina ka maitu na makamamasela ku su Isa al-Masih sia kanu galebekan ku kanu Kadenan. 18 Ka dala man makamamasela ku a liu kanu ngin i pinggalebek'u Isa al-Masih a sia nakanggulalan sa laki, magidsan pan i sia kanu kangadtalu ku enggu galebek ku ka enggu makapapaginugut su manga taw a dikena-Yahudi 19 sia makanggulalan kanu kabarakat'u Suti a Ruh nu Kadenan enggu kanu manga tanda a kagaipan. Tembu ba iganat sa Awrusalimg taman den kanu embala-bala a dalepa sa Ilirikum na nalapat ku den mangusiat sa kanu Mapia a Tutuma pantag kanu Isa al-Masih. 20 Na nia ku man kahanda na makapangusiat ku su Mapia a Tutuma pantag kanu Isa al-Masih kanu manga dalepa a dala pamun makakineg pantag sa lekanin, dikena kanu manga dalepa a napangusiatan den pantag sa lekanin ka enggu dikena nia ku makapapanalus su galebekan a naludsuan den nu ped a taw. 21 Ka mana bun man su nakadalem kanu kitab a
“Mailay sekanin nu manga taw a da kapayagi pantag sa lekanin
enggu katuntayan sekanin nu manga taw a da kapanudtuli pantag sa lekanin.”h
Su Kahanda ni Bulus sa Kabpelu nin sa Ruma
22 Na entu ba i sabap'in u ngintu ka di aku babaya pakasan sa lekanu san sa Ruma ka nangusiat aku pan kanu nia ba a manga dalepa. 23-24 Ugaid'a kagina ka da den manggalebek ku sia saguna na 'gkapangingalap ku i mamakapagilaya tanu sa kasan ku amaika lemu aku den sa Espanya. Saleta na nakapila lagun den i kapegkiug ku pedsan sa lekanu. Na katawan ku i magalaw aku sa kanu kapamagilaya tanu san apia mangagan aku bu san. 'Gkapangingalap ku bun i katabangan aku nu sa katalus ku sa Espanya. 25 Ugaid'a lemu aku muna sa Awrusalim ka enggu ku makasigkil lu su manga tabang kanu manga taw a 'bpamaginugut. 26 Kagina 'gkalinian a benal'u manga lusud tanu sa tian sa Masidunia enggu Akaya i kadtabangan nilan su manga miskinan a 'bpamaginugut lu sa Awrusalim. 27 Na 'gkalilinian nilan a benal penggula su nia ka nia nin man kabantang na masela a benal i tademan nilan kanu manga lusud tanu sa tian sa Awrusalim. Ka amaika su manga taw a dikena-Yahudi ka naumunan silan kanu dikena matakapala a palihala a ebpun kanu Suti a Ruh na dait bun a edtabangan nilan su manga Yahudi sa matakapala a palihala. 28 Na amaika makasigkil ku den su nalimud a manga tabang'ilan lu kanu manga lusud tanu sa tian sa Awrusalim na makaaut aku den sa lekanu sa kabpawang ku sa Espanya. 29 Na katawan ku i su kasan ku sa lekanu na matalima tanu langun su dala kulang'in a palihala a ebpun kanu Isa al-Masih.
30 Manga lusud ku sa tian, na aden 'bpangenin ku sa lekanu. Na sabap kanu Mapulu tanu a su Isa al-Masih enggu kanu limu nu Suti a Ruh na 'bpangenin ku i tabangi aku nu mangeni-ngeni kanu Kadenan 31 sa ilipuas aku nin kanu kapamungkaid'u manga taw a dikena 'bpamaginugut sa dalepa a Yudia enggu taliman sa mapia nu 'bpamaginugut lu sa Awrusalim su tabang a nia a ipedsigkil ku kanilan. 32 Na amaika maitu, u miug su Kadenan na magalaw aku sa kasan ku sa lekanu taman sa makapangintelenen aku a kaped'u. 33 Na pangeni-ngenin ku i langun nu na tapiden nu Kadenan a 'gkabpunan nu kalilintad. Amin.