Su manga Salam
16
Na ipapegkilala ku sa lekanu su lusud tanu sa tian a babay a si Pibi, isa sekanin a 'gkasaligan kanu umpungan nu 'bpamaginugut sa dalepa a Kinkiria. 2 Na talima nu sekanin a 'bpaginugut kanu Mapulu sa ukit a katalima nu 'bpamaginugut kanu ped'in. Edtabangi nu sekanin kanu apia ngin a nasisita nin san sa lekanu ka masela gaid i nakadtabang'in sa laki taman kanu madakel a taw.3 Isalam aku nu bun kani Akilaa enggu kanu kaluma nin a si Prisila a kaped'ami bun a gumagalebek sia kanu Isa al-Masih. 4 Silan su manga taw a timbang a inisigkil'ilan su umul'ilan sabap sa laki. Na dikena bu saki i pakadsukul-sukul kanilan ka apeg den nu manga umpungan nu 'bpamaginugut a dikena-Yahudi. 5 Isalam aku nu bun kanu 'bpamaginugut a pendidilimudan kanu walay ni Prisila enggu Akila. Salam bun kanu papedtayan ku a si Ipinitus. Sekanin i muna-muna a naginugut kanu Isa al-Masih kanu prubinsia a Asia. 6 Salam bun kani Mariam a 'bpaginapas a benal pedtabang sa lekanu. 7 Isalam aku nu bun kani Andruniku enggu Yunia a manga pagidsan ku bun a Yahudi a naped ku sa bilangguan.b Silan pan i nangauna maginugut kanu Isa al-Masih kumin sa laki enggu katawan a benal silan nu manga sinugu nu Isa al-Masih. 8 Isalam aku nu bun kani Ampliatus a papedtayan ku sia kanu Mapulu tanu. 9 Salam bun kani Urbanus a pagidsan tanu bun a gumagalebek sia kanu Isa al-Masih taman kanu papedtayan ku a pakat a si Istakis. 10 Maitu bun, salam bun kani Apilis a pakasuat kanu Isa al-Masih taman den kanu sakatiwalayan ni Aristubulus. 11 Salam bun kani Hirudiun a pagidsan ku a Yahudi taman kanu manga lusud tanu sa tian sa paginugut kanu sakatiwalayan ni Narsisus.
12 Isalam aku nu bun kani Tripina enggu Tripusa a manga gumagalebek bun kanu Mapulu. Salam bun kanu papedtayan ku a pakat a si Pirsisa, masela a benal i nakadtabang'in sia kanu galebekan kanu Mapulu. 13 Salam bun kani Rupus a pinamili sia kanu Mapulu taman den kanu ina nin a timbang a ina ku bun. 14 Maitu bun, isalam aku nu bun kani Asinkritus, Pligun, Hirmis, Patrubas enggu kani Hirmas taman kanu manga lusud tanu bun sa tian a manga kaped'ilan. 15 Salam bun kani Pilulugus enggu Yulia taman kani Nirius apeg'u suled'in a babay enggu kani Ulimpas taman den kanu 'bpamaginugut a kaped'ilan.
16 Na salamen na uman i isa i ped'in sia luyud kanu kinasuti lun nu Kadenan. Pedsalamen kanu bun nu langun na umpungan nu 'bpamaginugut kanu Isa al-Masih sia.
17 Manga lusud ku sa tian, pangingati nu su manga taw a 'bpangaden sa kabpipitas enggu papedsibay sa lekanu sia makanggulalan kanu ibpamandu nilan a sungkang kanu manga tidtu a panduan a natalima nu. Pangabungi nu a benal silan. 18 Ka su maitu ba a manga taw na dikena silan gumagalebek kanu Mapulu tanu a su Isa al-Masih ka nia nilan 'bpaginugutan na kanu kanilan bu a kiug. Na sia makanggulalan kanu manga mapia enggu mamis a kangadtalu nilan na pakapasibay nilan su manga taw a paidu i nasabutan nin. 19 Na 'gkagalaw aku a benal sa napayag den kanu langun su katulangedan nu sa kabpaginugut kanu Mapulu. Ugaid'a nia ku kalinian na 'gkategel kanu sia kanu ngin i mapia enggu abungi nu su ngin i mawag. 20 Na su Kadenan a 'bpagenggay sa kalilintad na di den gaid mauget na ipatalaw nin sa lekanu su kapegkagaga nu Datu na Giadsal. San sa lekanu su da idsan nin a limu nu Mapulu tanu a su Isa al-Masih.
21 Pedsalamen kanu bun ni Timuti a kaped ku a gumagalebek sia kanu Mapulu enggu si Lusius, Yasun enggu Supatir a manga pagidsan ku bun a Yahudi. 22 (Saki menem si Tirsius a nasugu semulat kanu nia ba a sulat. Pedsalamen ku bun sekanu sia luyud kanu Mapulu tanu).
23 Pedsalamen kanu bun ni Gayus a pedtuganul sa laki sia enggu kanu umpungan nu 'bpamaginugut a pendidilimudan kanu walay nin. Na maitu bun si Irastu a pedtuganul sa kuleta nu siudad enggu su suled tanu sa paginugut a si Kuartus na pedsalamen kanu nilan bun. 24 Palihalan kanu langun nu Mapulu tanu a su Isa al-Masih. Amin.c
Su Pugi kanu Kadenan
25 Pugin su Kadenan a papegkabagel kanu salig'u a sia luyud kanu Mapia a Tutuma a inipangusiat ku sa lekanu pantag kanu Isa al-Masih. Su Mapia a nia a Tutuma na nakapagena a kahanda nu Kadenan sa kanu nauget den a timpu 26 ugaid'a saguna na inipayag den sia nakanggulalan kanu manga inisulat'u manga nabi sia luyud kanu ngin i inisugu nu Kadenan a Mapulu a da taman nin asal'a su langun na bangsa na makapaginugut sa lekanin sia makanggulalan sa kasalig lun. 27 Na su Kadenan bu i pakataw kanu langun-langun. Pugin sekanin taman sa taman sia makanggulalan kanu Isa al-Masih. Amin.
Wassalam