Sulat kanu Manga Taw sa Galasia
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na inisulat'i Bulus, lu pakatumpa kanu manga lumpukan nu 'bpamaginugut kanu Isa al-Masih sa dalepa a Galasia. Na su kinasulat'in sa nia na kanu timpu a manga limapulu lagun ulian nu kinambata kanu Isa al-Masih. Na su dalepa ba a nia a Galasia na sakup bun nu dalepa a Turkey ugaid'a sa saguna a timpu na dala den su nia a dalepa. Su manga taw sa Galasia kanu entu a timpu na nia kadakelan kanilan na dikena-Yahudi, dikena sakup'u kasuguan nu manga Yahudi.
Na nia kahanda ni Bulus kanu kinasulat'in sa nia na asal'a makapambalingan nin su 'bpamaginugut sa dalepa a Galasia sia kanu tidtu a panduan nu Mapia a Tutuma pantag kanu Isa al-Masih kagina kanu nia ba a manga timpu na aden manga gulu a 'bpamandu sa dikena tidtu a panduan. Inipaninindeg bun ni Bulus i ginawa nin pantag kanu kinapamili nu Kadenan sa lekanin asal'a makapayag'in su tidtu a lalan sia kanu Isa al-Masih. Inipangimbenal'in i su Kadenan enggu su Isa al-Masih demun i namili sa lekanin sa kapebpayapat'in kanu tidtu a Mapia a Tutuma, dikena ebpun kanu itungan nu manusia.
Na nia pidtalu ni Bulus pantag kanu nia na dala salakaw a mapia a tutuma liu kanu Mapia a Tutuma a inipangusiat'in pantag kanu Isa al-Masih. Na su 'bpamamandu a nia na manga taw bun a Yahudi a nasakup'u kasuguan. Na nia nilan ibpamandu na nasisita kun a inggulalan nilan su danden a kasuguan kanu manga taw a Yahudi a mana su kapapaletak asal'a matalima silan nu Kadenan. Ugaid'a nia pidtalu ni Bulus na di den nasisita a inggulalan nilan pan su kasuguan a nia kagina nalangkum den i entu sia kanu salig kanu Isa al-Masih asal'a matalima silan nu Kadenan.
Pinatuntayan bun ni Bulus kanilan i inenggay nu Kadenan su kasuguan a nia asal'a pakapailay kanu taw u ngin i dait a enggulan nilan gagalu na di pan pakauma su inibpasad a sia makabpun kanu tupu nu Ibrahim a su Isa al-Masih. Tembu nia dait na maginugut su taw kanu Isa al-Masih asal'a makatimbang silan sa ikelas sia makanggulalan kanu kasalig sa lekanin, dikena su kanggulalan kanu kasuguan. Ka dala man taw a makatimbang sa ikelas sia kanu kanggulalan nin kanu kasuguan kagina dala taw a magaga nin enggulalan su langun nu kasuguan.