Sulat kanu Manga Taw sa Ipisu
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na inisulat'i Bulus a lu pakatumpa kanu lumpukan nu 'bpamaginugut kanu Isa al-Masih sa dalepa a Ipisu taman den kanu embala-bala a dalepa a sakup bun nu Turkey sa saguna a timpu. Na su kinasulat'i Bulus sa nia na bilanggu sekanin lu sa dalepa a Ruma sabap kanu paginugut'in kanu Masih apeg den nu manga sulat'in a lu pakatumpa kanu 'bpamaginugut sa dalepa a Kulusas enggu dalepa a Pilipi enggu su kinasulat'in kani Pilimun.
Na nia kahanda ni Bulus kanu kinasulat'in sa nia na papedtuntayan nin kanu 'gkatumpan nu sulat'in a nia i inenggan silan nu Kadenan sa masela a palihala a mana su kinaampun kanilan asal'a makambalingan silan kanu Kadenan enggu su kinapamili kanilan nu Kadenan a mabaluy a kandatuan nin sia makanggulalan kanu kinaisa nilan sia kanu Isa al-Masih. Ipebpagilay bun ni Bulus i nakapitas tanu kanu Kadenan sabap kanu kabaladusan tanu ugaid'a sabap kanu limu nu Kadenan na inilipuas tanu nin enggu inenggan tanu nin sa bagu a uyag-uyag sia kanu kinanggihad'u Isa al-Masih kanu umul'in enggu su kinapambibiag lun 'bpaluman. Na langun tanu a 'bpamaginugut kanu Isa al-Masih na nalipuas tanu atawa ka nakambalingan tanu den kanu Kadenan dikena sabap kanu galebekan tanu a mapia ka sabap kanu da idsan nin a limu nu Kadenan. Papedtuntayan bun ni Bulus kanu manga dikena-Yahudi a 'bpamaginugut kanu Isa al-Masih i kagina ka naisa den silan sia kanu Isa al-Masih na isa den silan a pendatuan nu Kadenan a mana bun su manga Yahudi a 'bpaginugut kanu Isa al-Masih. Na iling-iling'u taw na nia ulu na su Isa al-Masih enggu nia menem badan na su langun nu 'bpamaginugut sa lekanin magidsan i Yahudi enggu dikena-Yahudi.
Ibpangeni-ngeni bun ni Bulus i pagkabagelen silan nu Kadenan sia makanggulalan kanu Suti a Ruh enggu magedam'ilan su kasela na limu nu Kadenan kanilan. Na kagina ka nalusud den silan kanu Isa al-Masih na mapalalayun su kasaumpung'ilan kagina timbang a sakapamilia bu silan sia kanu Isa al-Masih. Uman i isa na inenggan nu Kadenan sa kapegkagaga a mausal'in sia kanu kapangiseg'u 'bpamaginugut kanu Isa al-Masih. Pidsinantal bun ni Bulus su pantag kanu ngin i wagib kanu tiwalay, manga lukes enggu manga wata, ulipen enggu mapulu. Ulian nu entu na nasisita tanu su kelung a ebpun kanu Kadenan ka dikena tanu pembunua sa matakapala ka nia tanu man pakambunua na su bagel'u di 'gkangailay a mana su bagel'u manga saitan.