Sulat kanu Manga Taw sa Pilipi
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na inisulat'i Bulus kanu timpu a namakatelupulu lagun ulian nu kinambibiag 'bpaluman nu Isa al-Masih. Na lu sa bilangguan sa dalepa a Ruma natabu i kinasulat'i Bulus sa nia sabap kanu kapebpayapat'in kanu Mapia a Tutuma pantag kanu Isa al-Masih.
Lu i nia pakatumpa kanu lumpukan nu 'bpamaginugut sa dalepa a Pilipi a sakup'a Ruma kanu paganay ugaid'a saguna na sakup den nu dalepa a Greece. Kadakelan kanu manga taw sa dalepa a Pilipi kanu paganay na dikena-Yahudi ka manga taw sa dalepa a Ruma. Si Bulus demun i napasampay sa kanu Mapia a Tutuma makapantag kanu Isa al-Masih sa kanu nia a manga taw. Na su 'bpamaginugut na pedtala sa malasay sabap kanu kapedsalig'ilan kanu Isa al-Masih kagina kanu paganay na ipedtimbang'ilan su Sultan sa Ruma sa mana kadenan enggu pedtawagen nilan bun a 'bpamelipuas enggu mapulu. Na kagina ka su 'bpamaginugut a nia na manga taw bun sa Ruma na makamana-mana nakadsambi nilan su Sultan sa Ruma kanu Isa al-Masih.
Na nia kahanda ni Bulus kanu kinasulat'in sa nia na asal'a makadsukul-sukul sekanin kanu 'bpamaginugut kanu manga tabang'ilan sa lekanin enggu kanu kinaamung'ilan mapapayapat kanu Mapia a Tutuma. Pegkiugan nin bun sa 'gkabagel i manggiginawa nilan sa ukit a kadtalu nin kanilan sa apia nabilanggu sekanin na pakapayapat bun su Mapia a Tutuma.
Na pinangeni bun ni Bulus kanu 'bpamaginugut i mamagayun silan taman sa papagisan nilan i itungan nilan ka enggu entu ba i mailay nu ped a taw kanilan. Ipulu na uman i isa i ped'in enggu nia nilan pagitungen na dikena bu su kagkapia nu ginawa nilan ka apeg den nu kagkapia nu ginawa nu ped'ilan, nia masela na ibaba nilan i ginawa nilan a mana bun su Isa al-Masih.
Nalabit bun ni Bulus i apia nia nin pan kaaden i pedtala silan sa kamalasayan na dait a enggalaw-galaw silan a mana bun su kapegkagalaw nin, kagina dikena bu nia inenggay nu Kadenan kanilan i kapianan sa kapaginugut kanu Isa al-Masih ka apeg den nu kanggumalasayan sabap kanu Isa al-Masih.
Nia mauli sa entu na pidtalu bun ni Bulus kanu nia a sulat'in i nia ukit a katimbang'u Kadenan sa ikelas kanu taw na kasalig'in kanu Isa al-Masih dikena sa ukit a kanggulalan nin kanu kasuguan.